ବେଙ୍ଗାଲୁରୁ: ଗୋଡ଼ ଚେନ୍ରେ ବନ୍ଧାହୋଇଥିବା ଅବସ୍ଥାରେ ପଦ୍ମାସନରେ ସମୁଦ୍ର ମଧ୍ୟରେ ପହଁରି ରେକର୍ଡର ଆଶା ରଖିଛନ୍ତି କର୍ନାଟକର ଜଣେ ଶିକ୍ଷକ। ଉଡୁପି ଜିଲା କୁଣ୍ଡପୁର ଜାତୀୟସ୍ତରୀୟ କାଲ୍ମଞ୍ଜା ସରକାରୀ ସ୍କୁଲରେ ଶିକ୍ଷକତା କରୁଥିବା ନାଗରାଜ୍ ଖାର୍ଭି ଶୁକ୍ରବାର ଏଭଳି ଏକ ପ୍ରଚେଷ୍ଟାରେ ସଫଳତା ପାଇଛନ୍ତି। ପଦ୍ମାସନ ସ୍ଥିତିରେ ସେ ୨୫ ମିନିଟ ୧୬ ସେକେଣ୍ଡରେ ୧ କି.ମି. ସମୁଦ୍ରପଥ ଅତିକ୍ରମକରି ଲକ୍ଷ୍ୟସ୍ଥଳ ତନ୍ନିର୍ଭାଭି କୂଳରେ ପହଞ୍ଚିଥିଲେ। ସକାଳେ ଉତ୍ତରା ପବନ ବହୁଥିଲେ ମଧ୍ୟ ସେ ନିଜ ବଳ ପ୍ରୟୋଗକରି କୂଳରେ ପହଞ୍ଚିଥିଲେ। ଏ ବିଷୟରେ ନାଗରାଜ୍ ନିଜ ପ୍ରତିକ୍ରୟାରେ କହିଛନ୍ତି, ଦୀର୍ଘବର୍ଷର ପରିଶ୍ରମର ଫଳ ମିଳିଛି। ସେହିପରି ନାଗରାଜ୍ଙ୍କ ସଫଳତାରେ ତାଙ୍କ କୋଚ୍ ବି. କ୍ରିଷ୍ଣା ନାଇକ୍ ଭାବବିହ୍ବଳ ହୋଇପଡ଼ିଛନ୍ତି। ଏଥିପୂର୍ବରୁ ନାଗରାଜ୍ ଜାନୁୟାରୀରେ ୨ ସ୍ବର୍ଣ୍ଣ ଏବଂ ଏକ ବ୍ରୋଞ୍ଜ ପଦକ ପାଇଛନ୍ତି। ଏପରିକି ପହଁରା ଏବଂ ଯୋଗର ଉପକାରିତା ବିଷୟରେ ଲୋକଙ୍କୁ ସଚେତନ କରିବାକୁ ମଧ୍ୟ ଯୋଜନା ରଖିଥିବା ସେ କହିଛନ୍ତି। ଏଥିପୂର୍ବରୁ ପଦ୍ମାସନ ସ୍ଥିତିରେ ପହଁରିବାରେ ଏଯାବତ୍ କୌଣସି ରେକର୍ଡ ସ୍ଥାପନ ହୋଇନାହିଁ। ତେଣୁ ତାଙ୍କର ଏହି ସଫଳତାର ଏକ ଡିଭିଡି ଦୁଇ ଗେଜେଟେଡ୍ ଅଧିକାରୀଙ୍କ ଦସ୍ତଖତ ସହ ଇଣ୍ଡିଆ ବୁକ୍ ଅଫ୍ ରେକର୍ଡ ଏବଂ ଲିମ୍କା ବୁକ୍ ଅଫ୍ ରେକର୍ଡକୁ ପଠାଯିବ ବୋଲି ନାଗରାଜ୍ କହିଛନ୍ତି।