ବ୍ରହ୍ମପୁର ଅଫିସ,୧୩।୩: ପୌର ନିର୍ବାଚନ ପାଇଁ ନାମାଙ୍କନ ପ୍ରତ୍ୟାହାର ଲାଗି ଚାପ ଓ ଧମକ ଯୋଗୁ ୧୦ ଭାଜପା ପ୍ରାର୍ଥୀ ଅଜ୍ଞାତବାସରେ ଅଛନ୍ତି। ଅନ୍ୟପକ୍ଷରେ ଭାଜପାର ସଂଗୀନ ଅଭିଯୋଗ ପରେ ଶନି ଓ ରବିବାର ପ୍ରାର୍ଥତ୍ପତ୍ର ପ୍ରତ୍ୟାହାର ପ୍ରକ୍ରିୟା ପ୍ରଶାସନ ବନ୍ଦ ରଖିଛନ୍ତି। ସୂଚନାଯୋଗ୍ୟ, ଇତିମଧ୍ୟରେ ୩ ଭାଜପା ପ୍ରାର୍ଥୀ ନାମାଙ୍କନ ପ୍ରତ୍ୟାହାର କରିବାରୁ ବିଜେଡିର କର୍ପୋରେଟର ପ୍ରାର୍ଥୀମାନେ ନିର୍ଦ୍ୱନ୍ଦ୍ୱ ହୋଇଛନ୍ତି। ପ୍ରତିବାଦରେ ଭାଜପା ନେତା ଓ କର୍ମୀ ଗତ ଶୁକ୍ରବାର ଦିନତମାମ ନିର୍ବାଚନ ଅଧିକାରୀଙ୍କ ଦପ୍ତର ପାଖରେ ଜଗି ରହିବାରୁ କେହି ପ୍ରତ୍ୟାହାର କରିପାରି ନ ଥିଲେ। ପୁରୁଣାକାଳିଆ ଲୋକେ କହିବାନୁସାରେ ନାମାଙ୍କନ ପ୍ରତ୍ୟାହାର ନିମନ୍ତେ ଧମକ ଦେବା ଶତାଧିକ ବର୍ଷର ଏହି ପୌର ଇତିହାସରେ ପ୍ରଥମ। ବ୍ରହ୍ମପୁରରେ ବିଏମ୍ସି ମେୟର ଓ କର୍ପୋରେଟର ପ୍ରାର୍ଥୀମାନଙ୍କ ନିର୍ବାଚନୀ ପ୍ରଚାର ଶନିବାର ପ୍ରତିଯୋଗିତାମୂଳକ ହୋଇଥିଲା। ବିଜେଡି, ଭାଜପା ଓ କଂଗ୍ରେସର ଭୋଟ ପ୍ରଚାରରେ ମହାନଗର କମ୍ପିଥିଲା। ବିଜେଡି ପକ୍ଷରୁ ୭, ୮, ୯, ୧୦ ଓ ୧୧ନଂ. ୱାର୍ଡରେ ଜୋରଦାର ପ୍ରଚାର କରାଯାଇଥିଲା। ମେୟର ପ୍ରାର୍ଥୀ ସଂଘମିତ୍ରା ଦଳାଇଙ୍କ ସହିତ ଏମ୍ପି ଚନ୍ଦ୍ରଶେଖର ସାହୁ, ବିଧାୟକ ବିକ୍ରମ ପଣ୍ଡା, ଜିଲା ସଭାପତି ରମେଶ ଚନ୍ଦ୍ର ଚ୍ୟାଉ ପଟ୍ଟନାୟକ ଓ ଅନ୍ୟମାନେ ଥିଲେ। ରାଲିରେ ଶହ ଶହ କର୍ମୀ ଓ ଅଞ୍ଚଳବାସୀ ସାମିଲ ହୋଇଥିଲେ। ସେହିପରି ଭାଜପା ମେୟର ପ୍ରାର୍ଥୀ ସବିତା ସୁଆରଙ୍କ ପ୍ରଚାର ମଙ୍ଗ ଧରିଥିଲେ କାହ୍ନୁ ଚରଣ ପତି ଓ ଅନ୍ୟମାନେ। ୱାର୍ଡ ନଂ ୮ରୁ ଭୋଟ ପ୍ରଚାର ଆରମ୍ଭ ହୋଇ ଅନ୍ୟ ୱାର୍ଡ ପରିକ୍ରମା କରିଥିଲା।
ସେହିପରି ଯେଉଁ କେତେକ ବିଜେଡିରୁ ଟିକେଟ ନ ପାଇ ବିଦ୍ରୋହୀ ସାଜିଛନ୍ତି ଓ ସ୍ବାଧୀନ ଭାବେ ମଇଦାନକୁ ଓହ୍ଲାଇଛନ୍ତି ବିଭିନ୍ନ ୱାର୍ଡରେ ସେମାନେ ଆମ ନେତା ନବୀନ କହି ଭୋଟ ପ୍ରଚାର କରୁଛନ୍ତି। ଫଳରେ ଅଞ୍ଚଳବାସୀ ଓ ବିଜେଡି ପ୍ରାର୍ଥୀ ଅଡ଼ୁଆରେ ପଡ଼ିଛନ୍ତି। ବିଦ୍ରୋହୀମାନଙ୍କୁ ନାମାଙ୍କନ ପ୍ରତ୍ୟାହାର ନିମନ୍ତେ ମାନଭଞ୍ଜନ କରାଯାଉଛି। ଆସନ୍ତା ସୋମବାର ସନ୍ଧ୍ୟାରେ ମନାଇବା ପର୍ବ ସଫଳ ନା ବିଫଳ ତାହା ସ୍ପଷ୍ଟ ହେବ।
