ଭୁବନେଶ୍ୱର, ୧୩।୩(ବ୍ୟୁରୋ): ଶେୟାର ମାର୍କେଟ୍ରେ ନିବେଶ ନାଁରେ ପ୍ରାୟ ୧୦ କୋଟି ଟଙ୍କା ଠକେଇ ର଼୍ୟାକେଟର ରହସ୍ୟ ଉନ୍ମୋଚନ କରିଛି କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା (ଇଓଡବ୍ଲ୍ୟୁ)। ଏଥିରେ ସମ୍ପୃକ୍ତ ଆଇଏଏଭିଆଇସି ପ୍ରାଇଭେଟ୍ ଲିମିଟେଡ୍ର ୨ ନିର୍ଦ୍ଦେଶକଙ୍କୁ ମୁମ୍ବାଇର ବାନ୍ଦ୍ରା ଅଞ୍ଚଳରୁ ଗିରଫ କରାଯାଇଛି। ଅଭିଯୁକ୍ତମାନେ ହେଲେ ଅର୍ପନ ପଟେଲ ଓ ଆଦ୍ୟଜ୍ୟୋତି ନାୟକ। ସେମାନଙ୍କଠାରୁ ୯୦ ହଜାର ଟଙ୍କା ସହ ଲାପ୍ଟପ,ମୋବାଇଲ ଫୋନ ଓ ହାର୍ଡ ଡିସ୍କ ଜବତ କରାଯାଇଛି। ତେବେ ଗିରଫ ପରେ ସେମାନଙ୍କୁ ବାନ୍ଦ୍ରାସ୍ଥିତ ଅତିରିକ୍ତ ମୁଖ୍ୟ ମେଟ୍ରୋପଲିଟାନ ମାଜିଷ୍ଟ୍ରେଟ୍ଙ୍କ କୋର୍ଟରେ ହାଜର କରାଯାଇଥିଲା। ସେଠାରୁ ଟ୍ରାଞ୍ଜିଟ ରିମାଣ୍ଡରେ ଅଣାଯାଇ କଟକସ୍ଥିତ ଓପିଆଇଡି କୋର୍ଟରେ ହାଜର କରିବ ଇଓଡବ୍ଲ୍ୟୁ। ପଚରାଉଚରା ଓ ପ୍ରାଥମିକ ତଦନ୍ତରୁ ଇଓଡବ୍ଲ୍ୟୁ ତାଙ୍କଠାରୁ ବହୁ ଗୁରୁତ୍ୱପୂର୍ଣ୍ଣ ତଥ୍ୟ ହାସଲ କରିଛି। ସେମାନେ ମୁମ୍ବାଇର ଖାର ଅଞ୍ଚଳରେ ଘର ଭଡ଼ା ନେଇ ଏହି ଠକେଇ ର଼୍ୟାକେଟ ଚଳାଇଥିଲେ। ଓଡ଼ିଶା ସମେତ ଝାଡଖଣ୍ଡ, ମଧ୍ୟପ୍ରଦେଶ, ମହାରାଷ୍ଟ୍ର, ରାଜସ୍ଥାନ, ଗୁଜରାଟ, ଆନ୍ଧ୍ରପ୍ରଦେଶ, ପଶ୍ଚିମବଙ୍ଗ ଆଦି ରାଜ୍ୟକୁ ତାଙ୍କ ଠକେଇ ସାମ୍ରାଜ୍ୟ ଲମ୍ବିଛି। ଓଡ଼ିଶାରୁ ପ୍ରାୟ ୪ଶହ ନିବେଶକଙ୍କଠାରୁ ୫କୋଟି ଟଙ୍କା ଠକି ନେଇଥିବା ଜଣାପଡିଛି।
ସୂଚନାନୁଯାୟୀ, ଦୁଇ ଅଭିଯୁକ୍ତ ୨୦୨୦-୨୧ ରେ www.iaavic.com ୱେବ୍ ସାଇଟ ଖୋଲିଥିଲେ। ଏହାପରେ ଆଇଏଏଭିଆଇ୍ସି ପ୍ରାଇଭେଟ ଲିମିଟେଡ୍ କମ୍ପାନୀ ମାଧ୍ୟମରେ ଶେୟାର ମାର୍କେଟରେ ଟଙ୍କା ବିନିଯୋଗ କଲେ ଅଧିକ ସୁଧ ମିଳିବ ବୋଲି ଲୋକଙ୍କ ବିଶ୍ୱାସ ଜମାଇବା ଲାଗି ଆକର୍ଷଣୀୟ ଅଫର ସହ ଭିଡିଓ ୟୁଟ୍ୟୁବ୍ରେ ଛାଡିଥିଲେ। ପ୍ରଥମେ ୨ ହଜାରରୁ ୧ ଲକ୍ଷ ଭିତରେ ନିବେଶ କରିବାକୁ ପଡିବ। ତାଙ୍କ ରେଫରେନ୍ସରେ ଅନ୍ୟକେହି ନିବେଶ କଲେ ୧୫ ପ୍ରତିଶତ ଲାଭ ଦିଆଯିବ। ଏହି ଟଙ୍କା ଷ୍ଟକ୍ ମାର୍କେଟରେ ବିନିଯୋଗ ହେବ ଓ ପ୍ରତିଦିନ ଲାଭର ୧ ପ୍ରତିଶତ ଜମାକାରୀଙ୍କ ଆକାଉଣ୍ଟକୁ ପଠାଇ ଦିଆଯିବ। ୧୦ ମାସରୁ ବର୍ଷେ ଭିତରେ ମୂଳଜମାର ଦୁଇ ଗୁଣା ପାଇବାର ଲୋଭ ଦେଖାଇ କୋଟି କୋଟି ଟଙ୍କା ଆଦାୟ କରିଥିଲେ। ଏପରିକି ନିବେଶକଙ୍କ ବିଶ୍ୱାସ ଜନ୍ମାଇବା ପାଇଁ ଅଭିଯୁକ୍ତମାନେ କମ୍ପାନୀର ଲଗ୍ଇନ୍ ଆଇଡି, ପାସ୍ୱାର୍ଡ, ଟୋଲ ଫ୍ରି ନମ୍ବର ବି ଜାରି କରିଥିଲେ। ୨୦୨୧ ଜୁଲାଇରେ ଯାଜପୁର ଜିଲା ବିଞ୍ଝାରପୁର ଅଞ୍ଚଳର ସ୍ବାଧୀନ କୁମାର ସ୍ବାଇଁ ଏଥିରେ ୧୫ ଲକ୍ଷ ଟଙ୍କା ନିବେଶ କରିଥିଲେ। ପରବର୍ତ୍ତୀ ସମୟରେ ସେ ଠକେଇର ଶିକାର ହୋଇଥିବା ଜାଣିବା ପରେ କ୍ରାଇମବ୍ରାଞ୍ଚ ଇଓଡବ୍ଲ୍ୟୁରେ ଅଭିଯୋଗ କରିଥିଲେ।
