ବଇଣ୍ଡା,୧୭।୭(ପରିକ୍ଷିତ ସାହୁ): ଦୀର୍ଘ ୬ବର୍ଷ ହେବ କାମ ଚାଲୁଛି, ହେଲେ ଏହା ସମାପ୍ତ ହୋଇପାରୁନାହଁି। ଗୋଟିଏ ଠିକାସଂସ୍ଥାରୁ ଆଉ ଗୋଟିଏ ଠିଆ ସଂସ୍ଥାକୁ ଦାୟିତ୍ୱ ଦିଆଯାଉଛି। ଏପରିକି ମାର୍ଚ୍ଚ ୨୦୨୪ ସୁଦ୍ଧା ସମସ୍ତ କାମ ସାରିବା ପାଇଁ ପ୍ରଶାସନିକସ୍ତରରେ ନିର୍ଦ୍ଦେଶନାମା ରହିଥିବାବେଳେ କାମ ବହୁ ମନ୍ଥର ଗତିରେ ଚାଲୁଛି। ଏପରି କି ଅନେକ ସ୍ଥାନରେ ନିମ୍ନମାନର କାର୍ଯ୍ୟ କରାଯାଉଥିବା ଯୋଗୁ ଏହା ନିର୍ମାଣ ନ ସରୁଣୁ ଫାଟି ଯାଉଥିବା ଅଭିଯୋଗ ହେଉଛି। କଟକ-ସମ୍ବଲପୁର ୫୫ ନମ୍ବର ଜାତୀୟ ରାଜପଥର ଅନୁଗୋଳ ଜିଲା କିଶୋରନଗର ବ୍ଲକ ଲୁହାମୁଣ୍ଡାଠାରେ କରାଯାଇଥିବା ରାସ୍ତା ମାତ୍ର ୧୦ ଦିନ ହୋଇଥିବାବେଳେ ତାହା ଫାଟି ଆଁ କରିଛି। ବିଭାଗୀୟ ଅଧିକାରୀମାନେ କାମର ତଦାରଖ କରୁ ନ ଥିବା ଯୋଗୁ ରାସ୍ତାର ଅବସ୍ଥା ଏମିତି ହେଉଥିବା ସାଧାରଣରେ ଅଭିଯୋଗ ହୋଇଛି। ଏ ସମ୍ପର୍କରେ ତଦନ୍ତ କରିବା ସହ ନୂତନ ଭାବେ ଆଉ ଥରେ ରାସ୍ତା ନିର୍ମାଣ କରିବା ପାଇଁ ଲୁହାମୁଣ୍ଡା ଅଞ୍ଚଳ ଯୁବଗୋଷ୍ଠୀ ପକ୍ଷରୁ ଜିଲାପ୍ରଶାସନ ନିକଟରେ ମଙ୍ଗଳବାର ଅଭିଯୋଗପତ୍ର ମାଧ୍ୟମରେ ଦାବି କରାଯାଇଛି।
ଅଭିଯୋଗପତ୍ରରେ ଦର୍ଶାଯାଇଛି, କିଶୋରନଗର ବ୍ଲକର ଜାମୁନାଳିଠାରୁ ଭାଙ୍ଗମୁଣ୍ଡା ପର୍ଯ୍ୟନ୍ତ ୪୦ କିମି ନିର୍ମାଣାଧୀନ ରାସ୍ତା ସମ୍ପୂର୍ଣ୍ଣ ହୋଇପାରୁନାହଁି। ରାସ୍ତାର ୮୦ ପ୍ରତିଶତ କାମ ହୋଇସାରିଥିବା ବେଳେ ଆଉ ୨୦ ପ୍ରତିଶତ ଶେଷ ହୋଇପାରି ନାହଁି। ହେଲେ ଏହା ୨୦ଟି ସ୍ଥାନରେ ଫାଟି ଯାଇଥିବା ଦେଖାଯାଇଛି। ବହୁବାର ଠିକାସଂସ୍ଥା ବିରୋଧରେ ଅଞ୍ଚଳବାସୀ ଜିଲାପ୍ରଶାସନଠାରୁ ଆରମ୍ଭ କରି ଜାତୀୟ ରାଜପଥ ବିଭାଗଙ୍କୁ ଅଭିଯୋଗ କରିଥିଲେ ମଧ୍ୟ କୌଣସି ସୁଫଳ ମିଳୁନାହିଁ। ଜାତୀୟ ରାଜପଥର କମରେଇ ଠାରେ ପ୍ରଥମେ ରାସ୍ତା ଫାଟି ଯାଇଥିବାବେଳେ କିଛିଦିନ ହେବ ପାଗବନ୍ଦା, ରାଣୀଭୂଇଁ, କମରେଇ, ନୂଆଭୂଇଁ, ବଇସିଣା, ଗୁରୁଜାଙ୍ଗ, ଖଇରମୁଣ୍ଡା, ଚମ୍ପାପୁର, ସୁସବ, ହଣ୍ଡପା, ଠେଲକନାଳି, ଡେବେରାପାଲି ଆଦି ସ୍ଥାନରେ ରାସ୍ତାରେ ଫାଟ ଦେଖାଯାଉଛି। ରାସ୍ତା ୩ ରୁ ୪ ମିଟର ଲମ୍ବ ପର୍ଯ୍ୟନ୍ତ ଫାଟିଯାଇଥିବାବେଳେ କାର୍ଯ୍ୟ ନିମ୍ନମାନର ହେଉଥିବା ଅଭିଯୋଗ ହୋଇଛି। ଠିକାସଂସ୍ଥା ପକ୍ଷରୁ ଜାତୀୟ ରାଜପଥ ନୂତନ ରାସ୍ତା ନିର୍ମାଣ କରାଯାଉଥିବାବେଳେ କୌଣସି ପ୍ରଶାସନିକ ଅଧିକାରୀ କିମ୍ବା ଏନ୍ଏଚ୍ ବିଭାଗର ଅଧିକାରୀ ଉପସ୍ଥିତ ରହୁନାହାନ୍ତି। ଏପରିକି ଠିକ୍ ଭାବେ ପୂର୍ବରୁ ମାଟି ପରୀକ୍ଷଣ କରାଯାଇ ନାହଁି। ନିମ୍ନମାନର କାମ ହେଉଥିବାବେଳେ ଆଗକୁ ଏହି ରାସ୍ତାର ଭବିଷ୍ୟତକୁ ନେଇ ଅଞ୍ଚଳବାସୀ ଚିନ୍ତିତ ହୋଇପଡିଛନ୍ତି। ଲୁହାମୁଣ୍ଡାଠାରେ ଅଣ୍ଡରପାସ କାମ ଆରମ୍ଭ ହୋଇଥିବାବେଳେ ଅଣ୍ଡରପାସର ଦୁଇ ପାର୍ଶ୍ୱରେ ମାଟି ସମତଳ ସହ ମେଟାଲ କରାଯାଇ ପିଚୁ କାମ କରାଯାଇଛି। ପିଚୁ କାମ ସରିବାର ମାତ୍ର ୧୦ ଦିନ ହୋଇଥିବାବେଳେ ରାସ୍ତା ଫାଟି ଆଁ କଲାଣି। ଏହି ରାସ୍ତା ଦେଇ ପ୍ରତ୍ୟେକ ଦିନ ସହସ୍ରାଧିକ ଗାଡି ଯାତାୟାତ କରୁଥିବାବେଳେ ପିଚୁ କାମ ଅତିନିମ୍ନମାନର କରାଯାଇଥିବା ଯୋଗୁ ରାସ୍ତା ଫାଟି ଯାଇଥିବା ଅଞ୍ଚଳବାସୀ ଅଭିଯୋଗ କରିଛନ୍ତି। ଜିଲା ପ୍ରଶାସନ ଏଥିପ୍ରତି ଦୃଷ୍ଟି ଦେଇ ପଦକ୍ଷେପ ନେବାକୁ ସାଧାରଣରେ ଦାବି ହୋଇଛି। ଏ ନେଇ ଠିକାସଂସ୍ଥାର ପରିଚାଳକ ରାଜ ବିହାରୀ ସିଂଙ୍କୁ ପଚାରିବାରୁ କୌଣସି ମନ୍ତବ୍ୟ ନ ଦେଇ ପ୍ରସଙ୍ଗକୁ ଏଡାଇ ଦେଇଥିଲେ।