ଭୁବନେଶ୍ୱର, ୬।୩(ବ୍ୟୁରୋ):ଓଡ଼ିଶା ରାଜ୍ୟ ଔଷଧ ନିଗମ ପକ୍ଷରୁ ଟିକାର ନିରାପଦ ପରିବହନ ପାଇଁ ୧୦ଟି ତାପ ସଂରକ୍ଷିତ ଯାନ ଓ ଆଉ ୫ଟି ଭ୍ରାମ୍ୟମାଣ ଯାନ କିଣାଯାଇଛି। ଏ ନେଇ ରବିବାର ସ୍ବାସ୍ଥ୍ୟ ବିଭାଗ ପକ୍ଷରୁ ସୂଚନା ଦିଆଯାଇଛି। ରାଜ୍ୟରେ ଗୋଟିଏ ରାଜ୍ୟସ୍ତରୀୟ ଟିକା ସଂରକ୍ଷଣ ଭଣ୍ଡାର ରହିଥିବାବେଳେ ୩୦ ଜିଲାରେ ଟିକା ଗଚ୍ଛିତ କେନ୍ଦ୍ର ଓ ୧,୯୯୦ଟି ନିରାପଦ ଶୀତଳୀକରଣ କେନ୍ଦ୍ର ରହିଛି। ଏ ସମସ୍ତ ଟିକା ଭଣ୍ଡାର ଓ ଟିକାକରଣ କେନ୍ଦ୍ରକୁ ଏସବୁ ତାପ ସଂରକ୍ଷିତ ଯାନ ମାଧ୍ୟମରେ ଟିକା ପରିବହନ ହେବ। ଏହି ଯାନଗୁଡ଼ିକ ରାଜ୍ୟରେ ସହଜ ଟିକା ଯୋଗାଣର ସୁନିଶ୍ଚିତ କରିବା ପାଇଁ ରାଜ୍ୟ ଟିକା ସଂରକ୍ଷଣ ଭଣ୍ଡାର ଏବଂ ୯ଟି ଆଞ୍ଚଳିକ ଟିକା ସଂରକ୍ଷଣ କେନ୍ଦ୍ର ଯଥା ବାଲେଶ୍ୱର, ବଲାଙ୍ଗୀର, ବ୍ରହ୍ମପୁର, ଭୁବନେଶ୍ୱର, କଟକ, କୋରାପୁଟ, ଫୁଲବାଣୀ, ସମ୍ବଲପୁର ଏବଂ ସୁନ୍ଦରଗଡ଼ରେ ଅବସ୍ଥାପିତ କରାଯିବ।
ସେହିପରି ସୁଦୂର ଗ୍ରାମାଞ୍ଚଳରେ ସ୍ବେଚ୍ଛାକୃତ ରକ୍ତଦାନକୁ ପ୍ରୋତ୍ସାହିତ କରିବା ଓ ରକ୍ତ ସଂଗ୍ରହ ପାଇଁ ରକ୍ତ ସଂରକ୍ଷଣ ଯାନ ବିଭିନ୍ନ ସ୍ବାସ୍ଥ୍ୟ ସୁବିଧା କେନ୍ଦ୍ରଗୁଡ଼ିକୁ ଯୋଗାଇ ଦିଆଯାଇଛି। ୨୦୧୯ରେ ୯ଟି ଭ୍ରାମ୍ୟମାଣ ରକ୍ତ ସଂଗ୍ରହ ଯାନ ଏସ୍ସିବି ମେଡିକାଲ କଲେଜ, ଏମ୍କେସିଜି ମେଡିକାଲ କଲେଜ, ଭିମ୍ସାର ବୁର୍ଲା, ବଲାଙ୍ଗୀର, ବାରିପଦା ବାଲେଶ୍ୱର ଓ ବରଗଡ଼ ଜିଲା ମୁଖ୍ୟ ଚିକିତ୍ସାଳୟ ଏବଂ ରାଉରକେଲା ଆର୍ଜିଏଚ୍କୁ ଯୋଗାଇ ଦିଆଯାଇଥିଲା। ଫଳରେ ୨୦୨୦ରେ ରକ୍ତ ସଂଗ୍ରହ ଅନୁପାତ ୮୯.୯୧୭ ୟୁନିଟ୍ରୁ ବୃଦ୍ଧି ପାଇ ୨୦୨୨ରେ ୧,୭୬.୭୪୭ ୟୁନିଟ୍ରେ ପହଞ୍ଚତ୍ପାରିଛି। ଏହି କାର୍ଯ୍ୟକ୍ରମକୁ ତ୍ୱରାନ୍ବିତ କରିବା ପାଇଁ ଆଉ ୫ଟି ସମ୍ପୂର୍ଣ୍ଣ ରୂପେ ବିକଶିତ ହୋଇଥିବା ଭ୍ରାମ୍ୟମାଣ ରକ୍ତ ସଂଗ୍ରହ ଯାନ ନିଗମ ପକ୍ଷରୁ କିଣାଯାଇଛି। ଏଥିରେ ସମସ୍ତ ପ୍ରକାରର ନୂତନ ଜ୍ଞାନକୌଶଳ ସଜ୍ଜିତ ଅତ୍ୟାଧୁନିକ ବ୍ୟବସ୍ଥା ରହିଛି।