ନୟାଗଡ଼ ଅଫିସ/ ରଣପୁର, ୧୩।୨ (ସ୍ବ.ପ୍ର.): ଘର ତିଆରି ପାଇଁ ନିଅଁ ଖୋଳା ଯାଉଥିବାବେଳେ ମାଟିତଳୁ ପ୍ରାୟ ୧୦ ଝୁଡ଼ି କଉଡ଼ି ବାହାରିଛି। ଶୁକ୍ରବାର ନୟାଗଡ଼ ଜିଲା ରଣପୁର ବ୍ଲକ ତାଳକଣି ପଞ୍ଚାୟତ ନଛିପୁର ଗଁାରେ ଏହି ଘଟଣା ସାମ୍ନାକୁ ଆସିବା ପରେ ଚର୍ଚ୍ଚାର ବିଷୟ ହୋଇଛି। ନଛିପୁର ଗଁାର ନାରାୟଣ ସାହୁ ନିଜର ପୁରୁଣା ଘର ଭାଙ୍ଗି ନୂଆ ଘର ନିର୍ମାଣ ଆରମ୍ଭ କରିଛନ୍ତି। ଏଥିପାଇଁ ଶ୍ରମିକମାନେ ନିଅଁ ଖୋଳୁଥିଲେ। ୪ ଫୁଟ ଖୋଳିବା ପରେ ଏକ ମାଟି ଘମ ଦେଖିବାକୁ ମିଳିଥିଲା। ୫ଫୁଟର ଏହି ମାଟିଘମ ଭିତରେ କଉଡ଼ିଗୁଡ଼ିକ ସୁରକ୍ଷିତ ଅବସ୍ଥାରେ ରହିଥିଲା। ପୂର୍ବ ପୁରୁଷମାନେ କଉଡ଼ିକୁ ଟଙ୍କା ପରି ବ୍ୟବହାର କରୁଥିଲେ। ନାରାୟଣଙ୍କ ପୂର୍ବଜମାନେ ସେମାନଙ୍କ ପିଲାମାନଙ୍କ ପାଇଁ ବୋଧହୁଏ କଉଡ଼ି ପୋତି ରଖିଥିଲେ। ଏ କଥା ପ୍ରଚାରିତ ହେବା ପରେ ନାରାୟଣଙ୍କ ଘରେ କଉଡ଼ି ଦେଖିବା ପାଇଁ ସ୍ଥାନୀୟ ଲୋକଙ୍କ ଭିଡ଼ ଜମିଥିଲା।
