ଦୁନିଆରେ ଏପରି କିଛି ଘଟଣା ଘଟେ, ଯାହା ଉପରେ ବିଶ୍ୱାସ କରିବା ମୁସ୍କିଲ ହୋଇଯାଏ। ସେଭଳି ଏକ ଘଟଣା କୋଲକାତାରେ ଘଟିଛି। ଏଠାରେ ଜଣେ ବ୍ୟକ୍ତିଙ୍କୁ ଦେଖି ଲୋକମାନେ ତାଙ୍କ ପେଟରେ ଛୁଆ ଥିବା ନେଇ କହୁଥିଲେ। ହେଲେ ସତ ଜଣାପଡ଼ିବା ପରେ ସମସ୍ତେ ଚମକି ପଡ଼ିଛନ୍ତି। ତାଙ୍କ ପେଟରୁ ଛୁଆ ନୁହେଁ ବରଂ ୧୦ କିଲୋଗ୍ରାମ ଓଜନର ଟ୍ୟୁମର ବାହାରିଛି।
ଘଟଣାଟି ଏପରି। କୋଲକାତାରେ ରୁହନ୍ତି ୪୫ ବର୍ଷୀୟ ଅର୍ଣ୍ଣବ ମୁଖାର୍ଜୀ। ତାଙ୍କ ପେଟ ଧିରେ ଧିରେ ବଢ଼ିବାରେ ଲାଗିଥିଲା। ଏହାକୁ ନେଇ ଅର୍ଣ୍ଣବ ଚିନ୍ତାରେ ରହୁଥିଲେ। ଦୁଇ ମାସ ଧରି ତାଙ୍କ ପେଟରେ ଯନ୍ତ୍ରଣା ହେଉଥିଲା। କ’ଣ ହେଉଛି ତାହା ଜାଣିବା ପାଇଁ ଡାକ୍ତରଙ୍କ ପରାମର୍ଶ ଲୋଡିଥିଲେ ହେଁ ସତ ଜଣାପଡ଼ି ନ ଥିଲା। ମାତ୍ର ଦୁଇ ମାସରେ ଟ୍ୟୁମର ୪ ଗୁଣ ବଢ଼ି ଯାଇଥିଲା। ଲୋକମାନେ ସେ ଜନ୍ମ କରିବାକୁ ଯାଉଥିବା କହି ଚିଡ଼ାଉଥିଲେ। ଶେଷରେ ସେ ପୁଣିଥରେ ଡାକ୍ତରଙ୍କ ପାଖକୁ ଯିବା ପରେ ପେଟରେ ଟ୍ୟୁମର ଥିବା ଜାଣିବାକୁ ପାଇଥିଲେ।
ଡାକ୍ତରମାନେ ଅର୍ଣ୍ଣବଙ୍କୁ ସର୍ଜରୀ କରିବାକୁ ପରାମର୍ଶ ଦେଇଥିଲେ। ଦୀର୍ଘ ୪ ଘଣ୍ଟାର ଅପରେଶନ ପରେ ୧୦ କିଗ୍ରା ଓଜନର ଟ୍ୟୁମରକୁ ତାଙ୍କ ପେଟରୁ ବାହାର କରାଯାଇଥିଲା। ଯଦି ଆଉ ବିଳମ୍ବ ହୋଇଥାନ୍ତା ତେବେ ସେ ଗୁରୁତର ହୋଇଯାଇଥାନ୍ତେ ବୋଲି ଡାକ୍ତରମାନେ କହିଥିଲେ। ଏବେ ତାଙ୍କର ଚିକିତ୍ସା କରାଯାଉଛି। ତେବେ ତାଙ୍କର କ୍ୟାନ୍ସର ଥିବା ମଧ୍ୟ ଜଣାପଡ଼ିଛି।