ବଲାଙ୍ଗୀର ଅଫିସ, ୧୫ା୯: ଶେୟାର ମାର୍କେଟରେ କମ୍ଦିନରେ ଟଙ୍କା ଦ୍ୱିଗୁଣିତ ହେବା ଆଶାରେ ଧାର ଉଧାର କରି ୧୦ ଲକ୍ଷ ଟଙ୍କା ଖଟାଇଥିବା ଜଣେ ବ୍ୟକ୍ତି ସର୍ବସ୍ବାନ୍ତ ହେବା ପରେ ବିଷପିଇ ଜୀବନ ହାରିଛନ୍ତି। ଏଭଳି ଏକ ଅଘଟଣ ଘଟିଛି ବଲାଙ୍ଗୀର ଜିଲା ସିନ୍ଧେକେଲା ଥାନା ଅନ୍ତର୍ଗତ ଗନ୍ଧର୍ଲା ଗ୍ରାମରେ। ମୃତକ ହେଲେ ବିନୋଦ କୁମାର ଯାଦବ(୫୦)। ଶେୟାର ମାର୍କେଟର ଜଣେ ଦଲାଲଙ୍କ ହାବୁଡ଼ରେ ପଡ଼ିବା ପରେ ବିନୋଦଙ୍କ ଏଭଳି ଦୁର୍ଦ୍ଦଶା ହୋଇଛି।
ଶେୟାର ମାର୍କେଟରେ ଟଙ୍କା ବୁଡ଼ିଯିବା କଥା ଜାଣିବା ପରେ କିଛିଦିନ ହେଲା ବିନୋଦ କୁମାର ମାନସିକ ଅବସାଦରେ ଥିଲେ। ମଙ୍ଗଳବାର ସେ ବିଷ ପିଇ ଦେଇଥିବା ପରିବାର ଲୋକେ ଜାଣିବା ପରେ ତାଙ୍କୁ ତୁରନ୍ତ ସ୍ଥାନୀୟ ହସ୍ପିଟାଲ ନେଇଥିଲେ। ହେଲେ ସେଠାରେ ଅବସ୍ଥା ଉଦ୍ବେଗଜନକ ହେବାରୁ ତାଙ୍କୁ ବଲାଙ୍ଗୀର ଭୀମ ଭୋଇ ମେଡିକାଲ କଲେଜ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା। ହେଲେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ମୃତ ବିନୋଦଙ୍କ ସ୍ତ୍ରୀଙ୍କ ଅଭିଯୋଗ ହେଲା ଯେ, ଦିଲ୍ଲୀର ଜଣେ ଶେୟାର ମାର୍କେଟ ଦଲାଲ ଓମ୍ପ୍ରକାଶ ଶେୟାର ମାର୍କେଟରେ ଟଙ୍କା ଡବଲ ହେବା ଲୋଭ ଦେଖାଇ ବିନୋଦଙ୍କଠାରୁ ପ୍ରାୟ ୧୦ ଲକ୍ଷ ଟଙ୍କା ଠକି ନେଇଥିଲେ। ବିନୋଦ ନିଜର ସମ୍ପତ୍ତି ବିକ୍ରି କରି ଏବଂ ବିଭିନ୍ନ ଲୋକଙ୍କଠାରୁ ଧାର ଉଧାର କରି ଶେୟାର ମାର୍କେଟ ଦଲାଲ ଓମ୍ପ୍ରକାଶଙ୍କୁ ଟଙ୍କା ଦେଇଥିଲେ। ଏପରିକି ତାଙ୍କ ସ୍ତ୍ରୀ ଏସ୍ଏଚ୍ଜି ଏବଂ ଅନ୍ୟମାନଙ୍କଠାରୁ ୩ ଲକ୍ଷ ଟଙ୍କା ଯୋଗାଡ଼ କରି ଦେଇଥିଲେ। ବହୁ ଦିନ ଧରି ଟଙ୍କା ନ ମିଳିବାରୁ ଓମ୍ପ୍ରକାଶଙ୍କୁ ଫୋନ୍ କରି ଘଟଣା ସମ୍ପର୍କରେ ବୁଝିଥିଲେ। ଏହାପରେ ଓମ୍ପ୍ରକାଶ ଦେଢ଼ ଲକ୍ଷ ଟଙ୍କାର ଏକ ଚେକ୍ ବିନୋଦଙ୍କୁ ଦେଇ ସ୍ଥାନୀୟ ବ୍ୟାଙ୍କରେ ଡିପୋଜିଟ କଲେ ଟଙ୍କା ପାଇବେ ଏବଂ ଏଭଳି ଚେକ୍ ମାଧ୍ୟମରେ ନିରନ୍ତର ବ୍ୟବଧାନରେ ଦୁଇଗୁଣା ଟଙ୍କା ଫେରି ପାଇବେ ବୋଲି କହିଥିଲେ। ବିନୋଦ ଉକ୍ତ ଚେକ୍କୁ ନେଇ ସ୍ଥାନୀୟ ଏକ ବ୍ୟାଙ୍କରେ ଡିପୋଜିଟ କରିବା ପରେ ତାହା ବାଉନ୍ସ ହୋଇଯାଇଥିଲା। ଏହାପରେ ଓମ୍ପ୍ରକାଶଙ୍କ ସହ ଆଉ କୌଣସି ଯୋଗାଯୋଗ ସମ୍ଭବ ହୋଇ ନ ଥିଲା। ଏଥିରୁ ବିନୋଦ ଠକାମିରେ ପଡିଥିବା ଜାଣିପାରିଥିଲେ। ଏପଟେ ଧାରଉଧାର ଦେଇଥିବା ଲୋକେ ଟଙ୍କା ଫେରସ୍ତ କରିବାକୁ ବିନୋଦଙ୍କୁ ବାରମ୍ବାର କହିଥିଲେ। ଏହି ଚାପରେ ମାନସିକ ବିଷାଦଗ୍ରସ୍ତ ହୋଇ ଶେଷରେ ବିନୋଦ ବିଷ ପିଇ ଦେଇଥିବା ଜଣାପଡିଛି। ବିନୋଦଙ୍କ ମୃତଦେହ ବ୍ୟବଚ୍ଛେଦ ପରେ ବୁଧବାର ପରିବାର ଲୋକଙ୍କୁ ଦିଆଯାଇଥିଲା। ଘଟଣା ସମ୍ପର୍କରେ ସିନ୍ଧେକେଲା ଥାନାଧିକାରୀ ଆଲୋକ ବେହେରାଙ୍କୁ ପଚାରିବାରୁ ଟଙ୍କା ଠକେଇ ନେଇ କୌଣସି ଅଭିଯୋଗ ହୋଇ ନ ଥିବା କହିଛନ୍ତି। ଘଟଣାଟି ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।