କଟକ ଅଫିସ,୫ା୯:ଏକ କିଲୋ ଓଜନର ନକଲି ସୁନାବତି ଦେଇ ୧୦ ଲକ୍ଷ ଟଙ୍କା ଠକିନେବା ଅଭିଯୋଗରେ କ୍ୟାଣ୍ଟନ୍ମେଣ୍ଟ ପୋଲିସ ଜଣେ ଅଭିଯୁକ୍ତଙ୍କୁ ଗିରଫ କରି ରବିବାର କୋର୍ଟ ଚାଲାଣ କରିଛି। ସେ ହେଲେ ବାଲେଶ୍ୱର ଜିଲା ବାଲିଆପାଳ ଥାନା ଅନ୍ତର୍ଗତ କେନ୍ଦୁଆଡିଅ ଗ୍ରାମର ସନ୍ନ୍ୟାସୀ ଜେନା(୨୭)। ତାଙ୍କଠାରୁ ଏକ ବାଇକ୍(ଓଡି ୦୧ ଏକେ-୫୪୩୬), ୫୦ ହଜାର ଟଙ୍କା, ୧ କେଜି ଓଜନର ନକଲି ସୁନାବତି, ୩ଟି ମୋବାଇଲ ଫୋନ୍ ଜବତ କରାଯାଇଛି। ଏଥିସହ ସନ୍ନ୍ୟାସୀ ଓ ତାଙ୍କ ସ୍ତ୍ରୀଙ୍କ ନାମରେ ଥିବା ଦୁଇଟି ପୃଥକ୍ ବ୍ୟାଙ୍କ ଆକାଉଣ୍ଟକୁ ଅଚଳ କରି ଦିଆଯାଇଛି, ଯେଉଁଥିରେ ୨,୯୭,୦୦୦ ଟଙ୍କା ଜମା ଅଛି।
ପୋଲିସ ସୂଚନା ଅନୁଯାୟୀ, ଜଗତ୍ସିଂହପୁର ଜିଲା ବାଲିକୁଦା ଥାନା ଅନ୍ତର୍ଗତ ଆମ୍ବାସାଲ ଗ୍ରାମର ଯଚୀନ୍ଦ୍ର ଦଳାଇ(୪୯)ଙ୍କର କଟକ ବିଡ଼ାନାସୀ ଥାନା ଅଧୀନ କନିକା ଛକରେ ଏକ ପାଥୋଲାବ୍ ରହିଛି। ସନ୍ନ୍ୟାସୀ ଜଳେଶ୍ୱର ଅଞ୍ଚଳରୁ ଆସୁଥିବା ରୋଗୀମାନଙ୍କ ସହ ନିୟମିତ ତାଙ୍କ ପାଥୋଲାବ୍କୁ ଆସି ଯଚୀନ୍ଦ୍ରଙ୍କ ସହ ଭଲ ସମ୍ପର୍କ ସୃଷ୍ଟି କରିଥିଲେ। କିଛିଦିନ ପରେ ସନ୍ନ୍ୟାସୀ ଯଚୀନ୍ଦ୍ରଙ୍କୁ କହିଥିଲେ, ମୋ ପାଖରେ ଏକ କିଲୋ ଓଜନର ଏକ ସୁନାବତି ରହିଛି। ତାହାକୁ ବିକ୍ରି କରିବାକୁ ଚାହୁଁଛି। ସନ୍ନ୍ୟାସୀଙ୍କ କହିବା ମୁତାବକ ଯଚୀନ୍ଦ୍ର ଗତ ଜୁନ୍ ୫ରେ ବାଲେଶ୍ୱର ଯାଇ ଉକ୍ତ ସୁନାବତି ଦେଖିବା ସହ ସେଥିରୁ ସାମାନ୍ୟ ଅଂଶ ଭାଙ୍ଗି ପରୀକ୍ଷା ପାଇଁ କଟକ ଆଣିଥିଲେ। ପରୀକ୍ଷା ପରେ ଉକ୍ତ ସୁନାବତି ଅଂଶ ଅସଲି ବୋଲି ଯଚୀନ୍ଦ୍ର ଜାଣିବାକୁ ପାଇଥିଲେ। ଫଳରେ ଉଭୟଙ୍କ ମଧ୍ୟରେ ସୁନାବତି ବିକ୍ରିକୁ ନେଇ ୧୦ ଲକ୍ଷ ଟଙ୍କାର ଡିଲ୍ ହୋଇଥିଲା। ଜୁନ୍ ୨୨ ଅପରାହ୍ନରେ ସନ୍ନ୍ୟାସୀ ସୁନାବତିକୁ ଧରି କଟକ ଇନ୍ଡୋର୍ ଷ୍ଟାଡିୟମ ନିକଟରେ ପହଞ୍ଚତ୍ଲେ। ସେହିପରି ଯଚୀନ୍ଦ୍ର ନିଜ ଶାଳକଙ୍କୁ ନେଇ ସେଠାରେ ପହଞ୍ଚତ୍ବା ସହ ସନ୍ନ୍ୟାସୀଙ୍କୁ ୧୦ ଲକ୍ଷ ଟଙ୍କା ଦେଇ ଉକ୍ତ ସୁନାବତିକୁ ନେଇଆସିଥିଲେ। ପରବର୍ତ୍ତୀ ସମୟରେ ଉକ୍ତ ସୁନାବତିର ପୂରା ଅଂଶକୁ ପରୀକ୍ଷା କରିବା ପରେ ତାହା ନକଲି ବୋଲି ଜଣାପଡ଼ିଥିଲା। ଫଳରେ ଯଚୀନ୍ଦ୍ର ଠକାମିର ଶିକାର ହୋଇଥିବା ଜାଣିବାକୁ ପାଇଥିଲେ। ଏନେଇ ସେ ସନ୍ନ୍ୟାସୀଙ୍କ ମୋବାଇଲ ନମ୍ବରରେ ଯୋଗାଯୋଗ କରି ବିଫଳ ହୋଇଥିଲେ। ଏ ସମ୍ପର୍କରେ ସେ କ୍ୟାଣ୍ଟନ୍ମେଣ୍ଟ ଥାନାରେ ଅଭିଯୋଗ କରିବା ପରେ ପୋଲିସ ଏକ ମାମଲା(ନଂ.୧୦୯/୨୨) ରୁଜୁ କରିଥିଲା। ତଦନ୍ତ ସମୟରେ ସନ୍ନ୍ୟାସୀ ଓ ତାଙ୍କ ସ୍ତ୍ରୀ ନକଲି ସୁନାବତି ବିକ୍ରି ଜରିଆରେ ୧୦ ଲକ୍ଷ ଟଙ୍କା ଠକେଇ ପାଇଁ ଯୋଜନା କରିଥିବା ପୋଲିସ ଜାଣିବାକୁ ପାଇଥିଲା। ଉକ୍ତ ୧୦ ଲକ୍ଷ ଟଙ୍କାରୁ କିଛି ଟଙ୍କା ବାଲିଆପାଳ ଷ୍ଟେଟବ୍ୟାଙ୍କ ଶାଖାରେ ସନ୍ନ୍ୟାସୀ ନିଜ ନାମରେ ଥିବା ଆକାଉଣ୍ଟରେ ଜମା କରିଥିଲେ। ସେହିପରି ଆଉ କିଛି ଟଙ୍କାକୁ ବାଲିଆପାଳ ୟୁକୋ ବ୍ୟାଙ୍କ ଶାଖାରେ ତାଙ୍କ ସ୍ତ୍ରୀଙ୍କ ନାମରେ ଜମା କରିଥିଲେ। ଏଥିସହ ଆଉ କିଛି ଟଙ୍କାକୁ ମଧ୍ୟ ବାଲିଆପାଳ ବିବିସିସି ବ୍ୟାଙ୍କରେ ସନ୍ନ୍ୟାସୀ ତାଙ୍କ ସ୍ତ୍ରୀଙ୍କ ନଁାରେ ଏକ ନୂଆ ଆକାଉଣ୍ଟ ଖୋଲି ଜମା କରିଥିଲେ। ସନ୍ନ୍ୟାସୀଙ୍କ ସ୍ତ୍ରୀ ଉକ୍ତ ଆକାଉଣ୍ଟରୁ ସାଢ଼େ ୬ ଲକ୍ଷ ଟଙ୍କା ସେପ୍ଟେମ୍ବର ୨ ତାରିଖରେ ଉଠାଇଥିବା ପୋଲିସ ଜାଣିବାକୁ ପାଇଥିଲା । ଏନେଇ ଅଧିକ ତଦନ୍ତ ଚାଲୁ ରହିଥିବା ପୋଲିସ ସୂତ୍ରରୁ ଜଣାଯାଇଛି।