କୋଲକାତା,୧।୮ : ପଶ୍ଚିମବଙ୍ଗର କୁଚବିହାରଠାରେ ଏକ ଯାତ୍ରୀବାହୀ ଗାଡ଼ି ବିଦ୍ୟୁତ ତାର ସଂସ୍ପର୍ଶରେ ଆସିବା ପରେ ୧୦ ଜଣଙ୍କ ମୃତ୍ୟୁ ଘଟିଛି। ଏହି ଘଟଣାରେ ଆହତ ହୋଇଥିବା ଲୋକଙ୍କୁ ଉଦ୍ଧାର କରାଯାଇ ଚିକିତ୍ସା ଲାଗି ଜଲପାଇଗୁଡି ଡାକ୍ତରଖାନାକୁ ପଠାଯାଇଛି।
ମାଥାଭଙ୍ଗା ଅତିରିକ୍ତ ଏସପି କହିଛନ୍ତି ଯେ ପ୍ରାଥମିକ ଅନୁସନ୍ଧାନରୁ ଜଣାପଡିଛି ଯେ ଗାଡିର ପଛ ଭାଗରେ ସ୍ଥାପିତ ଜେନେରେଟର (ଡିଜେ ସିଷ୍ଟମ) ର ତାର ଯୋଗୁ ଗାଡିରେ ବିଦ୍ୟୁତ୍ ସଂଚରଣ ହୋଇଥିବାର ଅନୁମାନ କରାଯାଉଛି। ରବିବାର ବିଳମ୍ବିତ ରାତିରେ ଏହି ଦୁର୍ଘଟଣା ଘଟିଛି। ଏହି ଦୁର୍ଘଟଣାରେ ଆହତ ହୋଇଥିବା ୨୭ ଜଣଙ୍କ ମଧ୍ୟରୁ ୧୬ ଜଣଙ୍କୁ ସାମାନ୍ୟ ଆଘାତ ଲାଗିଛି।
ପୋଲିସ କହିଛି ଯେ ଜାଲପେଶ ଯାଉଥିବା ଏକ ଯାତ୍ରୀବାହୀ ଯାନ ରବିବାର ରାତି ୧୨ଟା ସମୟରେ ମଖଲିଗଞ୍ଜ ପୋଲିସ ଷ୍ଟେସନର ଧର୍ଲା ବ୍ରିଜ ନିିକଟରେ ବିଦ୍ୟୁତ ତାର ସଂସ୍ପର୍ଶରେ ଆସିଥିଲା। ସମସ୍ତ ଯାତ୍ରୀ ସୀତାକୁଚି ପୋଲିସ ଷ୍ଟେଶନ ଅଞ୍ଚଳର ବାସିନ୍ଦା ଥିଲେ ଏବଂ ଏହି ଦୁର୍ଘଟଣା ସମ୍ପର୍କରେ ସେମାନଙ୍କ ପରିବାର ଲୋକଙ୍କୁ ସୂଚନା ଦିଆଯାଇଛି। ଗାଡି ଜବତ କରାଯାଇଛି କିନ୍ତୁ ଡ୍ରାଇଭର ଏପର୍ଯ୍ୟନ୍ତ ଫେରାର ଅଛନ୍ତି। ବରିଷ୍ଠ ଅଧିକାରୀମାନେ ଘଟଣାସ୍ଥଳରେ ଉପସ୍ଥିତ ଅଛନ୍ତି। ଉଦ୍ଧାର କାର୍ଯ୍ୟରେ ପୋଲିସ ପକ୍ଷରୁ ସହାୟତା ଜାରି ରହିଛି।