ବାରିପଦା ଅଫିସ,୨୮ା୧: ମୟୂରଭଞ୍ଜ ଅତିରିକ୍ତ ଜିଲା ଓ ଦୌରା ଜଜ ତଥା ସ୍ବତନ୍ତ୍ର ପୋକ୍ସୋ କୋର୍ଟରେ ଶୁକ୍ରବାର ଏକ ନାବାଳିକା ବଳାତ୍କାର ମାମଲାର ରାୟ ପ୍ରକାଶ ପାଇଛି। ଜଜ ସୁମିତା ଜେନା ଏହାର ବିଚାର କରି ଦୋଷୀଙ୍କୁ ୧୦ବର୍ଷ ସଶ୍ରମ କାରାଦଣ୍ଡରେ ଦଣ୍ଡିତ କରିଛନ୍ତି। ଏହା ସହିତ ୧୦ହଜାର ଟଙ୍କା ଜରିମାନା ଓ ଅନାଦାୟେ ଅଧିକ ୬ମାସ ଜେଲ ଦଣ୍ଡ ଭୋଗିବାକୁ ରାୟରେ ଉଲ୍ଲେଖ କରିଛନ୍ତି। ଅଭିଯୁକ୍ତ ଜଣକ ହେଲେ କପ୍ତିପଦା ଥାନା ଅଧୀନ ରାଇକାଳୀ ଗ୍ରାମର ଅର୍ଜ୍ୁନ ଟୁଡୁ(୨୬)। ତେବେ ଉପଯୁକ୍ତ ପ୍ରମାଣ ଅଭାବରୁ ଦୁଇ ଅଭିଯୁକ୍ତ ସାଲ ମୁର୍ମୁ ଓ ବାରିଆଲ ଟୁଡୁଙ୍କୁ କୋର୍ଟ ନିର୍ଦ୍ଦୋଷରେ ଖଲାସ କରିଛନ୍ତି। ଏହା ବ୍ୟତୀତ ପୀଡ଼ିତାଙ୍କୁ କ୍ଷତିପୂରଣ ବାବଦରେ ୪ଲକ୍ଷ ଟଙ୍କା ସହାୟତା ଦେବାକୁ ଜିଲା ଆଇନ ସହାୟତା କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଛନ୍ତି।
ମାମଲାର ବିବରଣୀ ଅନୁଯାୟୀ, ୨୦୧୬ ନଭେମ୍ବର ୧୫ରେ ଜନୈକା ନାବାଳିକା ରାଇକାଳୀ ଗ୍ରାମସ୍ଥିତ ମାମୁ ଘରକୁ ଯାଇଥିଲେ। ସେହିଦିନ ସନ୍ଧ୍ୟାରେ ମାମୁ ଘର ଲୋକଙ୍କ ସହ ଯାତ୍ରା ଦେଖି ତହିଁ ପରଦିନ ଘରକୁ ଫେରୁଥିଲେ। ବାଟରେ ଯିବା ସମୟରେ ଅଭିଯୁକ୍ତ ଅର୍ଜୁନ ଓ ସାଲ ତାଙ୍କୁ ଏକ ମୋଟର ସାଇକେଲରେ ରାଇକାଳୀ ନେଇଯିବାକୁ କହି ନିକଟସ୍ଥ ଜଙ୍ଗଲରେ ବଳାତ୍କାର କରିଥିଲେ। ୨ ଦିନ ଜଙ୍ଗଲରେ ରଖି ପାଶବିକ ଅତ୍ୟାଚାର କରିବା ସହ ଘଟଣା ସମ୍ପର୍କରେ କାହାକୁ ନ ଜଣାଇବା ପାଇଁ ଧମକ ଚମକ ଦେଇଥିଲେ। ପରେ ୧୮ ତାରିଖରେ ଅଭିଯୁକ୍ତ ଦ୍ୱୟ ନାବାଳିକାଙ୍କୁ ନେଇ ୱାର୍ଡସଭ୍ୟ ବାରିଆଲ ଟୁଡୁଙ୍କ ଘରେ ଛାଡ଼ିବା ପରେ ସେଠାରେ ମଧ୍ୟ ସେ ବଳାତ୍କାରର ଶିକାର ହୋଇଥିଲେ। ଖବରପାଇ ପରିବାର ଲୋକେ ୨୦ତାରିଖରେ ରାଇକାଳୀ ଗ୍ରାମରେ ପହଞ୍ଚତ୍ ଝିଅଠାରୁ ସମସ୍ତ କଥା ଶୁଣି ୨୧ତାରିଖରେ କପ୍ତିପଦା ଥାନାରେ ଲିଖିତ ଅଭିଯୋଗ କରିଥିଲେ। ଏନେଇ ପୋଲିସ ଏକ ମାମଲା କେସ (ନଂ. ୧୧୦/୧୬) ରୁଜୁ କରି ୩ ଅଭିଯୁକ୍ତଙ୍କୁୁ ଗିରଫ କରି କୋର୍ଟ ଚାଲାଣ କରିଥିଲା। ପୋକ୍ସୋ କୋର୍ଟର ସ୍ବତନ୍ତ୍ର ଆଇନଜୀବୀ ଅଭିନ୍ନ କୁମାର ପଟ୍ଟନାୟକ ମାମଲା ପରିଚାଳନା କରୁଥିଲେ।