ନୂଆଦିଲ୍ଲୀ,୧୪।୧୧(ପି.ଟି.): ଦେଶର ସ୍ବାସ୍ଥ୍ୟସେବା କ୍ଷେତ୍ରକୁ ପର୍ଯ୍ୟାପ୍ତ ମାନବ ସମ୍ବଳ ଯୋଗାଇବା ଲକ୍ଷ୍ୟରେ ୨୦୨୭ ସୁଦ୍ଧା ୧୦୦ଟି ଜିଲା ହସ୍ପିଟାଲର ଉନ୍ନତୀକରଣ କରାଯାଇ ନୂଆ ମେଡିକାଲ କଲେଜରେ ପରିଣତ କରାଯିବ। ସ୍ବାସ୍ଥ୍ୟ ମନ୍ତ୍ରଣାଳୟ ଏଭଳି ଏକ ପ୍ରସ୍ତାବ ଆଣିଛି। କେନ୍ଦ୍ରୀୟ ଯୋଜନାରେ ଜିଲା ହସ୍ପିଟାଲ କିମ୍ବା ରେଫରାଲ ହସ୍ପିଟାଲଗୁଡ଼ିକର ଉନ୍ନତୀକରଣ କରାଯିବ। ପ୍ରତି ମେଡିକାଲ କଲେଜ ପାଇଁ ୩୨୫ କୋଟି ଟଙ୍କା ବ୍ୟୟ ହେବ। ଏଥିରେ କେନ୍ଦ୍ର ସରକାରଙ୍କ ଭାଗ ୬୦ ପ୍ରତିଶତ ଏବଂ ରାଜ୍ୟ ଭାଗ ୪୦ ପ୍ରତିଶତ ରହିବ ବୋଲି ସରକାରୀ ସୂତ୍ରରୁ ଜଣାପଡ଼ିଛି। ତେବେ ଉତ୍ତରପୂର୍ବାଞ୍ଚଳ ଏବଂ ସ୍ବତନ୍ତ୍ର ବର୍ଗରେ ଥିବା ରାଜ୍ୟରେ କେନ୍ଦ୍ର ରାଜ୍ୟ ପାଣ୍ଠି ଅନୁପାତ ୯୦:୧୦ ରହିବ। ସ୍ବାସ୍ଥ୍ୟ ମନ୍ତ୍ରଣାଳୟର ଉପରୋକ୍ତ ପ୍ରସ୍ତାବକୁ ଖର୍ଚ୍ଚ ବିଭାଗ ଅନୁମୋଦନ କରିଥିବାବେଳେ ଏନେଇ ଏକ କ୍ୟାବିନେଟ ନୋଟ୍ ପ୍ରସ୍ତୁତ ହୋଇଛି।
ପୂର୍ବରୁ ୩ ପର୍ଯ୍ୟାୟରେ ୧୫୭ଟି ମେଡିକାଲ କଲେଜକୁ ମଞ୍ଜୁରୀ ମିଳିଥିବାବେଳେ ସେଥିରୁ ୯୩ଟି କାର୍ଯ୍ୟକ୍ଷମ ହେଲାଣି। ଅନ୍ୟଗୁଡ଼ିକ ବିଭିନ୍ନ ପର୍ଯ୍ୟାୟରେ ନିର୍ମାଣାଧୀନ ରହିଛି। ପ୍ରସ୍ତାବିତ ୧୦୦ ମେଡିକାଲ କଲେଜ ୧୦ ଲକ୍ଷରୁ ଊର୍ଦ୍ଧ୍ୱ ଜନସଂଖ୍ୟା ବିଶିଷ୍ଟ ୧୦୦ଟି ଜିଲାରେ ସ୍ଥାପନ ହେବ, ଯେଉଁଠି ପୂର୍ବରୁ ସରକାରୀ କିମ୍ବା ଘରୋଇ ମେଡିକାଲ କଲେଜ ନ ଥିବ। ଏହା ବ୍ୟତୀତ ପୂର୍ବରୁ ଅନୁମୋଦିତ ୧୫୭ ମେଡିକାଲ କଲେଜ ସହ ସଂଯୋଗ କରି ନର୍ସିଂ କଲେଜ ଖୋଲିବା ଲାଗି କେନ୍ଦ୍ରୀୟ ଯୋଜନାରେ ୧୦ କୋଟି ଟଙ୍କା ଲେଖାଏ ଯୋଗାଇ ଦିଆଯିବ।
