ବାରିପଦା ଅଫିସ,୧୫।୪
ମୟୂରଭଞ୍ଜ ଜିଲା ପଲ୍ଲୀଶ୍ରୀ ମେଳା ଆନୁକୂଲ୍ୟରେ ଜିଲା କୃଷି ଓ ଆନୁସଙ୍ଗିକ ବିଭାଗ ପକ୍ଷରୁ କୃଷି ମହୋତ୍ସବ ଉଦ୍ଘାଟିତ ହୋଇଯାଇଛି। ଏହି ପରିପ୍ରେକ୍ଷୀରେ ଜିଲାର ୨୬ଟି ବ୍ଲକର ଚାଷୀଙ୍କୁ ଆତ୍ମା ଆନୁକୂଲ୍ୟରେ ତାଲିମ ଦିଆଯାଇଛି। ୧୦୦ ଚାଷୀ, ସ୍ବୟଂ ସହାୟିକା ଗୋଷ୍ଠୀର ସଦସ୍ୟ ଓ ମହିଳା ଚାଷୀ ୪ଦିନ ଧରି ତାଲିମ କାର୍ଯ୍ୟକ୍ରମରେ ଅଂଶ ଗ୍ରହଣ କରିଛନ୍ତି। ଏହି ଅବସରରେ ପ୍ରାକୃତିକ କୃଷି ଓ ଫସଲ ବିବିଧତା ସମ୍ପର୍କରେ ଆଲୋଚନାଚକ୍ର ଅନୁଷ୍ଠିତ ହୋଇଥିଲା। ମୁଖ୍ୟ ଜିଲା କୃଷି ଅଧିକାରୀ ରବୀନ୍ଦ୍ର ଖଟୁଆ, ଅନ୍ୟତମ ଅତିଥି ଭାବେ ପ୍ରକଳ୍ପ ନିର୍ଦ୍ଦେଶିକା ଭବାନୀ ଶଙ୍କର କାଲୋ ଯୋଗଦାନ କରି ‘ସବୁଜ କୃଷି’ର ଭିତ୍ତିଭୂମି ଓ ମୟୂରଭଞ୍ଜ ଜୈବ ମଣ୍ଡଳର ସୁରକ୍ଷା ସମ୍ବନ୍ଧରେ ଆଲୋଚନା କରିଥିଲେ। ପ୍ରାରମ୍ଭରେ ସହକାରୀ କୃଷି ନିର୍ଦ୍ଦେଶକ ଡ.ମନୋଜ କୁମାର ଚାନ୍ଦ ଚାଷୀମାନଙ୍କୁ ଉନ୍ନତମାନର କୃଷି ପଦ୍ଧତି ମାଧ୍ୟମରେ ଫସଲ ବିବିଧତା ସମ୍ପର୍କରେ ବୁଝାଇଥିଲେ। ଉଦ୍ୟାନ କୃଷି, ଗୋପାଳନ, ମାଛ ଓ କୁକୁଡ଼ା ଚାଷ ମାଧ୍ୟମରେ ସମନ୍ବିତ ଚାଷ ପଦ୍ଧତିକୁ ଆପଣାଇବା ପାଇଁ ପରାମର୍ଶ ଦେଇଥିଲେ। ଭୁବନେଶ୍ୱରସ୍ଥିତ କନକ ବାୟୋସାଇନ୍ସ ଓ ରିସର୍ସ ଫାଉଣ୍ଡେସନର ନିର୍ଦ୍ଦେଶକ ଡ.ଦୀପକ କୁମାର ସାହୁ ଉପସ୍ଥିତ ରହି ଜୈବିକ ଚାଷରେ ବାସନା ଧାନର ଚାହିଦାକୁ ପାଥେୟ କରି ଚାଷୀମାନଙ୍କୁ ବାସନା ଧାନ ଚାଷ କରିବାକୁ ପରାମର୍ଶ ଦେଇଥିଲେ। ଲଘୁ ଶସ୍ୟ ଚାଷ ତଥା ସନ୍ତୁଳିତ ଖାଦ୍ୟ ଆହାର ଦିଗରେ ୱାସନର ରିସର୍ସପର୍ସନ ପୁଲକ ରଞ୍ଜନ ନାୟକ ଗୁରୁତ୍ୱାରୋପ କରିଥିଲେ। ଏହି ଅବସରରେ ଫସଲ ଉତ୍ପାଦନରେ ଉଲ୍ଲେଖନୀୟ ସଫଳତା ପାଇଁ ପ୍ରତି ବ୍ଲକରୁ ଜଣେ ଲେଖାଏ ଚାଷୀଙ୍କୁ ମିଶାଇ ମୋଟ ୨୬ଜଣଙ୍କୁ ସମ୍ମାନିତ କରାଯାଇଥିଲା। ମଧୁସ୍ମିତା ଜେନା ଧନ୍ୟବାଦ ଅର୍ପଣ କରିଥିଲେ।