ଅପରାଧୀଙ୍କୁ ଧରିବା ପାଇଁ ପୋଲିସକୁ ବେଳେବେଳେ ବହୁତ କଷ୍ଟ କରିବାକୁ ପଡ଼ିଥାଏ। କିଛି ମାମଲାରେ ସଫଳତା ମିଳେ ତ ଆଉ କେତେବେଳେ ଅପରାଧୀ ଚକ୍ମା ଦେଖାଇ ଖସିଯାଏ। ଏପରିକି ଅପରାଧୀଙ୍କୁ ଧରିବା ପାଇଁ ପୋଲିସ ପ୍ରଶାସନ ବହୁ ଅର୍ଥ ମଧ୍ୟ ଖର୍ଚ୍ଚ କରିଥାଏ। ଏହିପରି ଏକ ଘଟଣା ତାଇଓ୍ବାନରେ ଦେଖିବାକୁ ମିଳିଛି। ୧୦୦ ଟଙ୍କାର ଦହି ଚୋରି କରିଥିବା ଜଣେ ଛାତ୍ରୀଙ୍କୁ ଧରିବା ପାଇଁ ପୋଲିସ ୪୨୦୦୦ ଟଙ୍କା ଖର୍ଚ୍ଚ କରିଦେଇଛି। ତାଇଓ୍ବାନର ରାଜଧାନୀ ତାଇପେ ପୋଲିସ ଏପରି ଖର୍ଚ୍ଚାନ୍ତ ହୋଇଛି। ଏପରିକି ଛାତ୍ରୀ ଜଣଙ୍କ ଡିଏନ୍ଏ ଟେଷ୍ଟ ବି କରାଇଛି ପୋଲିସ।
ତାଇପେ ଚାଇନିଜ୍ କଲ୍ଚର ୟୁନିଭରସିଟିରେ ପଢୁଥିବା ଜଣେ ଛାତ୍ରୀ ଅନ୍ୟ ୫ ଛାତ୍ରୀଙ୍କ ସହ ଏକ ଫ୍ଲାଟ୍ରେ ଭଡ଼ାରେ ରହୁଥିଲେ। ଛାତ୍ରୀମାନେ ଦହି ବୋତଲ ହଷ୍ଟେଲର ଫ୍ରିଜ୍ରେ ରଖିଥିଲେ। ଏହି ଫ୍ରିଜ୍ଟି ଶେୟାରିଂରେ ଥିଲା। ତେବେ ଦହି ବୋତଲ ଫ୍ରିଜ୍ରୁ ଗାଏବ ହୋଇଯାଇଥିଲା। ଏହା ପରେ ସମସ୍ତଙ୍କୁ ପଚରାଗଲା। ମାତ୍ର ଦହି ମିଳିଲା ନାହିଁ। ପରେ ଛାତ୍ରୀମାନେ ପୋଲିସ ନିକଟରେ ଅଭିଯୋଗ କରିଥିଲେ। ଅଭିଯୋଗ ପାଇ ପୋଲିସ ତଦନ୍ତ ଆରମ୍ଭ କରିଥିଲା। ମାତ୍ର ସଫଳତା ମିଳି ନ ଥିଲା। ଏଥିପାଇଁ ପୋଲିସ ଫରେନସିକ୍ ଟିମ୍ର ମଧ୍ୟ ସହାୟତା ନେଇଥିଲା। ଖାଲି ଏତିକି ନୁହେଁ ଅଭିଯୁକ୍ତଙ୍କ ଡିଏନ୍ଏ ଟେଷ୍ଟ କରାଇଥିଲା। ଏଥିପାଇଁ ୪୨୦୦୦ ଟଙ୍କା ଖର୍ଚ୍ଚ କରିଥିଲା ପୋଲିସ। ଅନ୍ୟପକ୍ଷରେ ସୋସିଆଲ ମିଡିଆରେ ପୋଲିସର ଏହି କାରନାମା ପାଇଁ ଲୋକେ ବେଶ୍ ମଜା ଉଡ଼ାଉଛନ୍ତି। ପୋଲିସ ଜନସାଧାରଣଙ୍କ ପଇସା ଅଯଥାରେ ବରବାଦ କରୁଥିବା ୟୁଜରମାନେ ଅଭିଯୋଗ କରିଛନ୍ତି। ୟୁଜରମାନେ କହିଛନ୍ତି, ମାତ୍ର ୧୦୦ ଟଙ୍କାର ଦହି ପାଇଁ ଏତେ ଟଙ୍କା ଖର୍ଚ୍ଚ?