ନୂଆଦିଲ୍ଲୀ,୩୦।୮: ୨୦୨୪ ମାର୍ଚ୍ଚ ସୁଦ୍ଧା ୧୦୦ ବନ୍ଦେ ଭାରତ ଟ୍ରେନ ନିର୍ମାଣ ଲାଗି କେନ୍ଦ୍ର ସରକାର ଯୋଜନା ରଖିଛନ୍ତି। ଭାରତୀୟ ରେଳପଥ ପକ୍ଷରୁ ଏ ନେଇ ପ୍ରସ୍ତୁତି କରାଯାଇଥିବା ଜଣାପଡିଛି। ୨୦୨୩ ଅଗଷ୍ଟ ୧୫ ସୁଦ୍ଧା ଦେଶର ପ୍ରମୁଖ ସହରଗୁଡିକୁ ୭୫ ବନ୍ଦେ ଭାରତ ଟ୍ରେନ ଚଳାଇବାକୁ ଲକ୍ଷ୍ୟ ରଖାଯାଇଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସ୍ବାଧୀନତା ଦିବସ ଅଭିଭାଷଣରେ କହିଥିଲେ। ଏହି କାର୍ଯ୍ୟକ୍ରମକୁ ଆଗକୁ ବଢ଼ାଇବା ଲାଗି ରେଲଓ୍ବେ ପକ୍ଷରୁ ବିଭିନ୍ନ ଟେଣ୍ଡର ଜାରି କରାଯାଇଛି। ଏହା ମଧ୍ୟରେ ୫୮ ବନ୍ଦେ ଭାରତ ରେକ୍ ଲାଗି ପ୍ରପଲସନ ସିଷ୍ଟମ ଏବଂ ଅନ୍ୟାନ୍ୟ ଯନ୍ତ୍ରାଂଶ ସାମିଲ ରହିଛି। ୪୪ ବନ୍ଦେ ଭାରତ ଏକ୍ସପ୍ରେସର ରେକ୍ ଲାଗି ମେଧା ସର୍ଭୋ ନାମକ କମ୍ପାନୀକୁ ଚଳିତବର୍ଷ କଣ୍ଟ୍ରାକ୍ଟ ପ୍ରଦାନ କରାଯାଇଛି। ଏହି ୨ କଣ୍ଟ୍ରାକ୍ଟରେ ମୋଟ ୧୦୨ ଟ୍ରେନ ସାମିଲ ରହିଥିବା ପ୍ରକ୍ରିୟା ସହ ଜଡିତ ଜଣେ ଅଧିକାରୀ ମତ ପ୍ରକାଶ କରିଛନ୍ତି।