ନୂଆଦିଲ୍ଲୀ: ପ୍ରାୟ ୧୦୦ ବର୍ଷ ପରେ ପୁଣି ଫେରିଛନ୍ତି ଓ୍ବଲ୍ଭରିନ୍ସ୍(ଆମେରିକୀୟ ନେଉଳ)। ଆମେରିକାର ଓ୍ବାଶିଂଟନସ୍ଥିତ ମାଉଣ୍ଟ ରେନିଅର ନ୍ୟାଶନାଲ ପାର୍କରେ ଏମାନଙ୍କ ସନ୍ଧାନ ମିଳିଛି। ଏ ନେଇ ନିକଟରେ ମାଉଣ୍ଟ ରେନିଅର ନ୍ୟାଶନାଲ ପାର୍କ ସର୍ଭିସେସ୍ ପକ୍ଷରୁ ଏକ ଭିଡିଓ ଟୁଇଟରରେ ଶେୟାର କରାଯାଇଛି। ଆମେରିକାର ଉତ୍ତରାଞ୍ଚଳରେ ଦେଖାଯାଉଥିବା ଏହି ସର୍ବବୃହତ୍ ନେଉଳ ପ୍ରଜାତିଙ୍କୁ ଦୀର୍ଘବର୍ଷ ଧରି ଦେଖିବାକୁ ମିଳୁ ନ ଥିଲା। ଏବେ ପୁଣି ଏମାନଙ୍କ ଫେରିବା ଏକ ଭଲ ସୂଚନା ବୋଲି କୁହାଯାଇଛି। ୩୫ ସେକେଣ୍ଡର ଏହି ଭିଡିଓରେ ୩ଟି ଆମେରିକୀୟ ନେଉଳଙ୍କୁ ବରଫାଞ୍ଚଳର ଶେଷଭାଗରେ ଦେଖିବାକୁ ମିଳିଛି। ପରେ ଏମାନେ ସବୁଜ ପଡ଼ିଆ ଦେଇ ଜଙ୍ଗଲ ମଧ୍ୟକୁ ଦୌଡ଼ୁଥିବା ଦେଖାଯାଇଛି। ଏହି ଭିଡିଓଟିକୁ ଟ୍ରାଭିସ୍ ହାରିଶ୍ ରେକର୍ଡ କରିଥିବା ସୂଚନା ମିଳିଛି। ତେବେ ନ୍ୟାଶନାଲ ପାର୍କ ସର୍ଭିସେସ୍ ଓ୍ବେବ୍ସାଇଟ୍ ଅନୁଯାୟୀ, ଏହା ଏକ ବିଲୁପ୍ତ ପ୍ରଜାତି ବୋଲି ଜଣାପଡ଼ିଛି। ଏହି ଟୁଇଟ୍ ଅନେକ ଲୋକଙ୍କ ଦୃଷ୍ଟି ଆକର୍ଷଣ କରିଛି। ଏହି ବିରଳ ପ୍ରଜାତି ନେଉଳଙ୍କ ଫେରିବାନେଇ ଅନେକ ଟୁଇଟର ବ୍ୟବହାରକାରୀ ଖୁସି ବ୍ୟକ୍ତି କରିଛନ୍ତି। ମାଉଣ୍ଟ ରେନିଅର ଜାତୀୟ ଉଦ୍ୟାନର ଅଧୀକ୍ଷକ ଚିପ୍ଜେଙ୍କିନ୍ସ ମଧ୍ୟ ଏହି ଆମେରିକୀୟ ନେଉଳଙ୍କ ପ୍ରତ୍ୟାବର୍ତ୍ତନକୁ ନେଇ ଉତ୍ସାହିତ ଥିବା ଓ୍ବେବ୍ସାଇଟ୍ରେ ପ୍ରକାଶ କରିଛନ୍ତି। ଏଠାରେ ଅଧିକ ସଂଖ୍ୟାରେ ମାଂସାଶୀ ପ୍ରାଣୀଙ୍କ ଉପସ୍ଥିତି, ଆମ ପାର୍କର ସ୍ଥିତି ଏବଂ ବନ୍ୟପ୍ରାଣୀଙ୍କ ଠିକ୍ ପରିଚାଳନାକୁ ଦର୍ଶାଉଛି ବୋଲି ସେ କହିଛନ୍ତି। ଉଲ୍ଲେଖଯୋଗ୍ୟ, ବାସସ୍ଥାନ ଅଭାବ, ଶିକାର ଏବଂ ପରିବେଶ ପରିବର୍ତ୍ତନ ଯୋଗୁ ଏହି ବିରଳ ପ୍ରଜାତିଙ୍କ ସଂଖ୍ୟା ଲୋପପାଇବାରେ ଲାଗିଛି। ତେବେ ଏମାନଙ୍କ ପ୍ରତ୍ୟାବର୍ତ୍ତନ ଏକ ଶୁଭ ସୂଚନା ନିଶ୍ଚୟ।