ମସ୍କୋ, ୧୯।୫ : ରୁଷିଆର ପ୍ରତିରକ୍ଷା ମନ୍ତ୍ରଣାଳୟ କହିଛି ଯେ ଚଳିତ ସପ୍ତାହରେ ମାରିଓପୋଲର ଆଜୋଭଷ୍ଟାଲ ପ୍ଲାଣ୍ଟରେ ପ୍ରାୟ ୧୦୦୦ ୟୁକ୍ରେନ ସୈନ୍ୟ ଆତ୍ମସମର୍ପଣ କରିଛନ୍ତି। ୧୯ ଏପ୍ରିଲରେ ରୁଷିଆର ସୈନ୍ୟମାନେ ପ୍ଲାଣ୍ଟ ଉପରେ ଆକ୍ରମଣ କରି ଏହାର ବଡ଼ ଅଞ୍ଚଳ ନଷ୍ଟ କରିଦେଇଥିଲେ।
ଏହି ଆତ୍ମସମର୍ପଣ ପରେ ବନ୍ଦର ସହର ମାରିଅପୋଲରେ ଏବେ ଯୁଦ୍ଧ ସମାପ୍ତ ହୋଇଥିବା ଜଣାପଡିଛି। ଏହା ରୁଷିଆ ଦଖଲକୁ ଆସିଛି। ତେବେ ପ୍ଲାଣ୍ଟ ଭିତରେ କେତେଜଣ ୟୁକ୍ରେନ୍ ସୈନ୍ୟ ରହିଛନ୍ତି ତାହା ସ୍ପଷ୍ଟ ହୋଇନାହିଁ।
ଏଥି ସହିତ, ୟୁକ୍ରେନର ଏହି ସହର ଏବେ ଏକ ଅଳିଆ ଗଦାରେ ପରିଣତ ହୋଇଛି। ରୁଷିଆ ପ୍ରତିରକ୍ଷା ମନ୍ତ୍ରଣାଳୟର ମୁଖପାତ୍ର ମେଜର ଜେନେରାଲ ଇଗୋର କନଶେନକୋଭ ବୁଧବାର କହିଛନ୍ତି ଯେ ୯୫୯ ୟୁକ୍ରେନ ସୈନିକ ସୋମବାର ଠାରୁ ଆଜୋଭଷ୍ଟାଲ ଇସ୍ପାତ କାରଖାନା ଛାଡିଛନ୍ତି। ୟୁକ୍ରେନର ଡେପୁଟି ପ୍ରତିରକ୍ଷା ମନ୍ତ୍ରୀ ହାନ୍ନା ମାଲେୟାର କହିଛନ୍ତି ଯେ ଯୁଦ୍ଧ ବନ୍ଦୀଙ୍କ ମୁକ୍ତ ହେବା ପାଇଁ ଆଲୋଚନା ଚାଲିଛି।
ୟୁକ୍ରେନର ରାଷ୍ଟ୍ରପତି ଭୋଲଡିମିର ଜେଲେନସ୍କି କହିଛନ୍ତି ଯେ ୟୁକ୍ରେନ ଉପରେ ଆକ୍ରମଣ ଆରମ୍ଭରୁ ରୁଷିଆ ମାରିଅପୋଲକୁ ଟାର୍ଗେଟ କରିଥିଲା।
