ଅହମଦାବାଦ,୬।୧୧: ଭାରତୀୟ ନାଗରିକତ୍ୱ ହାସଲ କରିଥିବା ପାକିସ୍ତାନର ୧,୦୩୨ ହିନ୍ଦୁ ଶରଣାର୍ଥୀ ଆଗାମୀ ଗୁଜରାଟ ବିଧାନସଭା ନିର୍ବାଚନରେ ପ୍ରଥମ ଥର ପାଇଁ ଭୋଟ ଦେବେ। ଗତ ୫ ବର୍ଷ ମଧ୍ୟରେ ଅହମଦାବାଦ ଜିଲାପାଳ ଏହି ଶରଣାର୍ଥୀମାନଙ୍କୁ ଭାରତୀୟ ନାଗରିକତ୍ୱ ପ୍ରଦାନ କରିଛନ୍ତି। ନୂଆ ସରକାର ଗଠନରେ ସେମାନେ ପ୍ରଥମ ଥର ପାଇଁ ମତାଧିକାର ସାବ୍ୟସ୍ତ କରିବାକୁ ଯାଉଛନ୍ତି। ପାକିସ୍ତାନରେ ସଂଖ୍ୟାଲଘୁ ସମ୍ପ୍ରଦାୟର ଏହି ସଦସ୍ୟମାନେ ବିଭିନ୍ନ ମକଦ୍ଦମାରେ ଅତିଷ୍ଠ ହୋଇ ଦେଶ ଛାଡ଼ି ଭାରତରେ ଶରଣ ନେଇଥିଲେ। ୨୦୧୬ ଏବଂ ୨୦୧୮ ଗେଜେଟ୍ ଅନୁଯାୟୀ ପାକିସ୍ତାନ, ବାଂଲାଦେଶ ଏବଂ ଆଫଗାନିସ୍ତାନରୁ ଆସିଥିବା ହିନ୍ଦୁ, ଶିଖ୍, ଖ୍ରୀଷ୍ଟିଆନ ଏବଂ ପାର୍ସିମାନଙ୍କୁ ଭାରତୀୟ ନାଗରିକତ୍ୱ ପ୍ରଦାନ କରିବା ଲାଗି ଅହମଦାବାଦ, ଗାନ୍ଧୀନଗର ଏବଂ ଭୁଜ୍ ଜିଲାପାଳଙ୍କୁ କ୍ଷମତା ଦିଆଯାଇଥିଲା। ଗତ ଅଗଷ୍ଟ ୨୨ରେ ଗୃହମନ୍ତ୍ରୀ ହର୍ଷ ସାଙ୍ଗ୍ଭି ଅହମଦାବାଦ ଜିଲାପାଳଙ୍କ କାର୍ଯ୍ୟାଳୟରେ ପାକିସ୍ତାନର ୪୦ ହିନ୍ଦୁ ଶରଣାର୍ଥୀଙ୍କୁ ଭାରତୀୟ ନାଗରିକତ୍ୱ ପ୍ରଦାନ କରିଥିଲେ।