ସାଧାରଣତଃ ୭୦-୮୦ ବର୍ଷ ବୟସ ହେଇଗଲେ ମଣିଷ ଶରୀର ଏତେ ଦୁର୍ବଳ ହେଇଯାଏ ଯେ, ବସିବା ଉଠିବା, ଚାଲିବା କଷ୍ଟକର ହୋଇଯାଏ। ଦୃଷ୍ଟିଶକ୍ତି, ଶ୍ରବଣ ଶକ୍ତି ବି କମିଯାଏ। ତେବେ ଜାଣି ଆଶ୍ଚର୍ଯ୍ୟ ହେବେ ୧୦୬ ବର୍ଷ ବୟସର ଜଣେ ବୃଦ୍ଧା ନା କେବଳ ବେଶ୍ ଚଳଚଞ୍ଚଳ ଅଛନ୍ତି, ବରଂ ସେ ଟାଟୁ ପରି ସୂକ୍ଷ୍ମ କାର୍ଯ୍ୟ କରୁଛନ୍ତି। ସେ ହେଉଛନ୍ତି ଫିଲିପାଇନ୍ସର ହ୍ବାଙ୍ଗ ଆଡ଼। ସେ ମାରିୟା ଓଗେ ନାମରେ ବି ବେଶ୍ ପରିଚିତ। ୧୫ ବର୍ଷ ବୟସର ହୋଇଥିବାବେଳେ ସେ ସ୍ବତନ୍ତ୍ର ବଟୋକ ଟାଟୁର ପାରମ୍ପରିକ ପଦ୍ଧତି ନିଜ ବାପାଙ୍କଠାରୁ ଶିଖିଥିଲେ। ଫିଲିପାଇନ୍ସର ବୁସ୍କଲାନାରେ ସେ ଟାଟୁ କରନ୍ତି। ତାଙ୍କୁ ସବୁଠାରୁ ପୁରୁଣା ମମ୍ବାବାତୋକ ଟାଟୁ ଆର୍ଟିଷ୍ଟ ଭାବେ ଗଣନା କରାଯାଏ। ଏଠାକାର କଳିଙ୍ଗା ପରମ୍ପରା ଅନୁଯାୟୀ ପୁରୁଷମାନେ ଯେବେ ଶତ୍ରୁଙ୍କୁ ମାରିବା ଲାଗି ଯୁଦ୍ଧ କରିବାକୁ ଯାଉଥିଲେ, ତା’ପୂର୍ବରୁ ସେମାନେ ଏହି ଟାଟୁ କରୁଥିଲେ। ଆଉ ମହିଳାମାନେ ନିଜ ସୌନ୍ଦର୍ଯ୍ୟ ବର୍ଦ୍ଧନ ପାଇଁ ଏହି ଟାଟୁ କରୁଥିଲେ। ଏହି ବହୁ ପୁରାତନ ଟାଟୁ କଳାର ପରମ୍ପରାକୁ ବଜାୟ ରଖିଛନ୍ତି ହ୍ବାଙ୍ଗ। ବୟସ ଏତେ ହୋଇଥିଲେ ହେଁ, ତାଙ୍କ ହାତ ଥରେ ନାହିଁ କି ଦୃଷ୍ଟି ଶକ୍ତି କମି ନାହିଁ। ଆଉ ସେ ବେଶ୍ କୁଶଳତାର ସହ ସୁନ୍ଦର ଟାଟୁ କରିପାରୁଛନ୍ତି। ତେଣୁ ତାଙ୍କ ପାଖରେ ଗ୍ରାହକଙ୍କର ଭିଡ ଜମେ। ନିଜେ ତଳେ ବସି ଗ୍ରାହକଙ୍କୁ ଉପରେ ବସାଇ ବାଉଁଶର ଏକ ଖାସ୍ ଉପକରଣ ବ୍ୟବହାର କରି ଟାଟୁ କରନ୍ତି। ତେଣୁ ହ୍ବାଙ୍ଗଙ୍କୁ ସବୁଠାରୁ ବୟସ୍କା ଟାଟୁ ଆର୍ଟିଷ୍ଟ ଭାବେ ଗଣନା କରାଯାଉଛି। ତା’ସହ ସେ ଚଳିତ ବର୍ଷ ଭୋଗ ମାଗାଜିନ୍ର ପ୍ରଚ୍ଛଦରେ ବି ସ୍ଥାନ ପାଇଛନ୍ତି। ଫଳରେ ସେ ହୋଇପାରିଛନ୍ତି ଭୋଗ ମାଗାଜିନ୍ର ପଚ୍ଛଦ ମଣ୍ଡନ କରିଥିବା ସବୁଠାରୁ ବୟସ୍କା ମହିଳା।