ଭୁବନେଶ୍ୱର, ୮।୭(ବ୍ୟୁରୋ): ଓଡ଼ିଶା ପାଇଁ ମଧ୍ୟାହ୍ନଭୋଜନ ବାର୍ଷିକ ଅଟକଳ ଓ ଯୋଜନା ବୈଠକ ବୁଧବାର ଭାରତ ସରକାରଙ୍କ ଶିକ୍ଷା ବିଭାଗ ଦ୍ୱାରା ଅନୁଷ୍ଠିତ ହୋଇଯାଇଛି। ଏହି ବୈଠକରେ ବିଭାଗୀୟ ସଚିବ ଅନିତା କରୱାଲ୍ ସଭାପତିତ୍ୱ କରିଥିଲେ। ଯୁଗ୍ମ ସଚିବ ରାମଚନ୍ଦ୍ର ମୀନା, ନିର୍ଦ୍ଦେଶକ ବିଜୟ ଭାସ୍କର ଗୁରାଲା ଏବଂ ଅନ୍ୟ ପଦାଧିକାରୀ ଉପସ୍ଥିତ ରହି ଓଡ଼ିଶା ମଧ୍ୟାହ୍ନଭୋଜନ ପରିଚାଳନା ଓ ବାର୍ଷିକ ଅଟକଳର ଆଲୋଚନାରେ ଭାଗ ନେଇଥିଲେ। ରାଜ୍ୟ ସରକାରଙ୍କ ବିଦ୍ୟାଳୟ ଓ ଗଣଶିକ୍ଷା ବିଭାଗର ପ୍ରମୁଖ ଶାସନ ସଚିବ ସତ୍ୟବ୍ରତ ସାହୁ ଏବଂ ରାଜ୍ୟ ନୋଡାଲ ଅଧିକାରୀ (ମଧ୍ୟାହ୍ନଭୋଜନ) ବଜେଟ୍ ଉପସ୍ଥାପନ କରିବା ସହିତ ରାଜ୍ୟରେ ଚାଲିଥିବା ବିଭିନ୍ନ ଅଭିନବ ପଦକ୍ଷେପ ଉପସ୍ଥାପନ କରିଥିଲେ। ଶିକ୍ଷା ସଚିବ ଅନିତା କରୱାଲ୍ ଓଡ଼ିଶାର ମଧ୍ୟାହ୍ନ ଭୋଜନ ସଚେତନତା ମେଳା, ରକ୍ତହୀନତା ଦୂରୀକରଣ ଅଭିଯାନ, ମଲ୍ଟି ଟ୍ୟାପ୍ ମଲ୍ଟି କ୍ୟାପ୍ ହାତଧୁଆ ଯୋଜନା, କିଚେନ୍ ଗାର୍ଡେନ୍, ରନ୍ଧନ ଗ୍ୟାସ ସଂଯୋଗ, ମଧ୍ୟାହ୍ନ ଭୋଜନ ପରିଚାଳନାରେ ସ୍ବୟଂ ସହାୟକ ଗୋଷ୍ଠୀଙ୍କ ଭୂମିକା, ମଧ୍ୟାହ୍ନ ଭୋଜନର ଗୁଣବତ୍ତା ଓ ପରିଚାଳନା ସୁଦୃଢ଼ ପାଇଁ ବିଶ୍ୱ ଖାଦ୍ୟ ସଙ୍ଗଠନ, ୟୁନିସେଫ୍, ଅକ୍ଷୟ ପାତ୍ର ଫାଉଣ୍ଡେଶନ୍ ଟ୍ରଷ୍ଟ ଏବଂ ମାନ୍ନା ଟ୍ରଷ୍ଟ ପ୍ରଭୃତିର ସହଭାଗିତାକୁ ଉଚ୍ଚ ପ୍ରଶଂସା କରିଥିଲେ। ଓଡ଼ିଶା ପକ୍ଷରୁ ଉପସ୍ଥାପନ ହୋଇଥିବା ୧,୦୬୨ କୋଟି ଟଙ୍କାର ମଧ୍ୟାହ୍ନଭୋଜନ ବାର୍ଷିକ ଅଟକଳ ଯୋଜନାକୁ ବିଚାରକୁ ନେଇ କେନ୍ଦ୍ର ଶିକ୍ଷା ବିଭାଗ ଯଥାଶୀଘ୍ର ପଦକ୍ଷେପ ନେବ ବୋଲି ସେ କହିଛନ୍ତି। ଓଡ଼ିଶାରେ ଏସ୍ସିଇଆର୍ଟି ପକ୍ଷରୁ ନିଆଯାଇଥିବା ପଦକ୍ଷେପ ‘ଶିକ୍ଷାନବିସମାନଙ୍କର ବିକଳ୍ପ ଇଣ୍ଟନର୍ର୍ଶିପ୍ ପ୍ରୋଗ୍ରାମ’ ପ୍ରଶଂସନୀୟ ପ୍ରୟାସ ବୋଲି ସେ ଅଭିହିତ କରିଛନ୍ତି। ଭାରତ ସରକାରଙ୍କ ଦ୍ୱାରା ପ୍ରସ୍ତୁତ ହେବାକୁ ଥିବା କରିକୁଲମ୍ରେ ଓଡ଼ିଶାକୁ ଅଗ୍ରଣୀ ଭୂମିକା ନେବା ପାଇଁ ସଚିବ କରୱାଲ୍ ଆହ୍ବାନ ଦେଇଛନ୍ତି।