ବସ୍ତା,୧୭।୧୦(ସ୍ବ.ପ୍ର.)-କେନ୍ଦ୍ରମନ୍ତ୍ରୀ ପ୍ରତାପ ଷଡ଼ଙ୍ଗୀ ବୁଧବାର ଅପରାହ୍ନରେ ଅଚାନକ ବସ୍ତା ହସ୍ପିଟାଲ ପରିଦର୍ଶନ କରିଥିଲେ। ତାଙ୍କ ସହ ରଘୁନାଥ ମହାନ୍ତି ଓ ଅନ୍ୟ ନେତୃମଣ୍ଡଳୀ ଉପସ୍ଥିତ ଥିଲେ। ସେମାନେ ଡାକ୍ତରଖାନାର ବିଭିନ୍ନ ଓ୍ବାର୍ଡ ବୁଲି ଦେଖିବା ସହ ଚିକିତ୍ସାଧିକାରୀ ଦେବବ୍ରତ ଜେନାଙ୍କୁ ହସ୍ପିଟାଲର ଅଭାବ ଅସୁବିଧା ପଚାରି ବୁଝିଥିଲେ। ବସ୍ତା ହସ୍ପିଟାଲରେ ଆବଶ୍ୟକୀୟ ଡାକ୍ତର ପଦବୀ ଫାଙ୍କା ଥିବା ଜାଣି ପାରି କେନ୍ଦ୍ରମନ୍ତ୍ରୀ ଉଦ୍ବେଗ ପ୍ରକାଶ କରି ଏ ସମ୍ପର୍କରେ ସେ ବିଭାଗୀୟ ଅଧିକାରୀଙ୍କ ସହ ଆଲୋଚନା କରିବେ ବୋଲି କହିିଥିଲେ। ମନ୍ତ୍ରୀଙ୍କ ଡାକ୍ତରଖାନା ଗସ୍ତ ଶୁଣି ହସପିଟାଲ ପରିସର ଲୋକାରଣ୍ୟ ହୋଇଯାଇଥିଲା। ଉପସ୍ଥିତ ଲୋକେ ଆବଶ୍ୟକ ଡାକ୍ତର ନ ଥିବା, ଗର୍ଭବତୀ ମହିଳାଙ୍କ ପ୍ରସବ ଲାଗି ଉପକରଣ ଦିଆଯାଉ ନ ଥିବା, ପରିବେଶକୁ ପରିଷ୍କାର ପରିଚ୍ଛନ୍ନ ରଖାଯାଉ ନ ଥିବା ଏବଂ ଆବଶ୍ୟକୀୟ ଔଷଧ ମିଳୁ ନ ଥିବା ଅଭିଯୋଗ କରିଥିଲେ। ୫୦ ଶଯ୍ୟା ବିଶିଷ୍ଟ ଏହି ହସ୍ପିଟାଲରେ ୨୪ ଘଣ୍ଟିଆ ଜରୁରୀକାଳୀନ ଡାକ୍ତରୀ ସେବା ମିଳୁ ନ ଥିବା ଦୁର୍ଘଟଣାଗ୍ରସ୍ତ ଓ ଗର୍ଭବତୀ ମହିଳାଙ୍କୁ ଶେଷ ମୁହୂର୍ତ୍ତରେ ବାଲେଶ୍ୱର ମୁଖ୍ୟ ହସପିଟାଲକୁ ପଠାଯାଉଥିବା ଅଭିଯୋଗ ହୋଇଥିଲା। ଖୋଲା ବେଡ଼ରେ ଥିବା କେତେକ ରୋଗୀଙ୍କୁ ବେଡ଼ଶିିଟ୍ ଦିଆଯାଉ ନ ଥିବା ଏହି ପରିଦର୍ଶନ ବେଳେ କେନ୍ଦ୍ରମନ୍ତ୍ରୀ ଦେଖିଥିଲେ। ଏ ସମ୍ପର୍କରେ କାର୍ଯ୍ୟରତ ନର୍ସଙ୍କୁ ପଚାରିବାରୁ କେତେକ ରୋଗୀ ବେଡ଼ଶିିଟ ଚୋରି କରିନେଇ ଯାଉ ଥିବା କହିବାରୁ ସେଠାରେ ଉପସ୍ଥିତ ଲୋକେ ଓ ରୋଗୀ ସମ୍ପର୍କୀୟଙ୍କ ମଧ୍ୟରେ ତୀବ୍ର ଉତ୍ତେଜନା ପ୍ରକାଶ ପାଇଥିଲା। ହସପିଟାଲର ବିଭିନ୍ନ ସମସ୍ୟା ନେଇ କେନ୍ଦ୍ର ମନ୍ତ୍ରୀ ଜିଲାପାଳଙ୍କୁ ଅବଗତ କରାଇବେ ବୋଲି କହିଥିଲେ।