ଛତ୍ରପୁର,୯ା୪(ଡି.ଏନ୍.ଏ): ଗଞ୍ଜାମ ଜିଲାରେ ଚଳିତ ବର୍ଷ ୧୦ ହଜାର ୬୫୩ ଜଣ ପଞ୍ଜୀକୃତ ଚାଷୀ ଧାନ ବିକିବାରୁ ବଞ୍ଚତ୍ତ ହୋଇଛନ୍ତି। ମାର୍ଚ୍ଚ ୩୧ ତାରିଖରେ ଗଞ୍ଜାମ ଜିଲାରେ ଧାନ କିଣା ପ୍ରକ୍ରିୟା ସରିଛି। କିନ୍ତୁ ଧାନ କିଣା ଲକ୍ଷ୍ୟ ପୂରଣ କରିବାରେ ପ୍ରଶାସନ ଫେଲ୍ ମାରିଛି। ସୂଚନାଯୋଗ୍ୟ, ଗତ ୨୦୨୧-୨୨ରେ ପଞ୍ଜୀକୃତ ଚାଷୀଙ୍କ ମଧ୍ୟରୁ ଗଞ୍ଜାମ ଜିଲାର ୨୬ ହଜାର ୩୪୩ ଜଣ ଚାଷୀ ଧାନ ବିକି ପାରିନଥିଲେ। ଠିକ୍ ସମୟରେ ଧାନ କିଣା ଟାର୍ଗେଟ ଆସୁନଥିବା, ଟୋକେନ୍ ଲ୍ୟାପ୍ସ ହେବା ଏବଂ ପ୍ରଥମ ପର୍ଯ୍ୟାୟରୁ ବଡ ଚାଷୀମାନଙ୍କ ଠାରୁ ଧାନ କିଣାଯାଉଥିବାରୁ ବହୁ ଛୋଟ ଚାଷୀ ନିଜ ଧାନ ବିକିପାରିନାହାନ୍ତି। ଋଷିକୁଲ୍ୟା ରୟତ ମହାସଭାର ସମ୍ପାଦକ ସୀମାଞ୍ଚଳ ନାହାକ ଏସବୁ କାରଣ ଦର୍ଶାଇ ଏହାକୁ ଦାୟୀ କରିଛନ୍ତି। ଏପରିକି ୨୦ଟି ପ୍ୟାକ୍ସ ଓ ମହିଳାସଂଘ ଆଦୌ ଧାନ କିଣିନାହାନ୍ତି। ମିଳିଥିବା ସୂଚନା ଅନୁସାରେ, ୩୬୫ ପ୍ୟାକ୍ସ, ୧୦୪ ଏସ୍ଏଚ୍ଜି ଓ ଗୋଟିଏ ପାଣି ପଞ୍ଚାୟତ ପକ୍ଷରୁ ଜିଲାର ୧ ଲକ୍ଷ ୨୦ ହଜାର ୫୮୪ ଜଣ ଚାଷୀଙ୍କ ଠାରୁ ୫୧ଲକ୍ଷ ୨୬ ହଜାର ୫୩.୬୨ କ୍ୟୁଇଣ୍ଟାଲ ଧାନ କିଣାଯାଇପାରିଥିଲା। ସରକାରଙ୍କୁ ଧାନ ବିକିବା ପାଇଁ ଚଳିତ ବର୍ଷ ଗଞ୍ଜାମ ଜିଲାର ୧ ଲକ୍ଷ ୩୧ ହଜାର ୨୩୮ଜଣ ଚାଷୀ ଅନଲାଇନ୍ରେ ପଞ୍ଜୀକୃତ ହୋଇଥିଲେ। ଏହି ଧାନ କିଣା ପ୍ରକିୟାରେ ଜିଲାର ୩୬୪ ମିଲର ମଧ୍ୟ ସାମିଲ ହୋଇଥିଲେ। ଆହୁରି ଜଣାଯାଇଛି ଯେ ପ୍ୟାକ୍ସକୁ ଦିଆଯାଇଥିବା ଲକ୍ଷ୍ୟ ଅନୁସାରେ ୧ ଲକ୍ଷ ୯ ହଜାର ୫୬ ଜଣ ଚାଷୀଙ୍କ ଠାରୁ ଧାନ କିଣିବା କଥା। ମାତ୍ର ପ୍ୟାକ୍ସଗୁଡିକ ୯୯ ହଜାର ୮୮୩ ଜଣ ଚାଷୀଙ୍କ ଠାରୁ ୪୨ ଲକ୍ଷ ୮୭ ହଜାର ୬୨୭.୪୩ କ୍ୟୁଇଣ୍ଟାଲ ଧାନ କିଣିପାରିଥିଲେ। ସେହିପରି ୧୦୪ ମହିଳା ସଂଘଗୁଡିକୁ ୨୨ ହଜାର ୭୪ ଜଣ ଚାଷୀଙ୍କଠାରୁ ଧାନ କିଣିବାକୁ ଟାର୍ଗେଟ ଦିଆଯାଇଥିଲା। ସେଥିରୁ ୨୦ ଜହାର ୫୯୪ଜଣ ଚାଷୀଙ୍କ ଠାରୁ ୮ ଲକ୍ଷ ୩୪ ହଜାର ୯୮୧.୩୬ କ୍ୟୁଇଣ୍ଟାଲ ଧାନ କିଣାଯାଇଛି। ଗୋଟିଏ ପାଣି ପଞ୍ଚାୟତକୁ ୧୦୭ ଜଣ ଚାଷୀଙ୍କ ଠାରୁ ଧାନ କିଣିବାକୁ ଲକ୍ଷ୍ୟ ଦିଆଯାଇଥିଲା । ସେଥିରୁ ୧୦୬ ଜଣ ଚାଷୀଙ୍କ ଠାରୁ ୩ ହଜାର ୪୦୯.୧୫ କ୍ୟୁଇଣ୍ଟାଲ ଧାନ କିଣାଯାଇଥିଲା।