କଟକ ଅଫିସ, ୨୭ା୧୨: କନଷ୍ଟେବଳ, ଲାନ୍ସ ନାଏକ, ହାବିଲଦାର ଓ ସିଆଇ ହାବିଲଦାର ପଦବୀରୁ ଏଏସ୍ଆଇ ପଦବୀକୁ ପଦୋନ୍ନତି ଦିଆଯିବ। ଏହି ପଦୋନ୍ନତି ନିମନ୍ତେ ଆବଶ୍ୟକ ତାଲିମ ପାଇଁ ଡିଜିପି ଅଭୟ ଅନୁମୋଦନ କରିଛନ୍ତି। ମନୋନୀତ ପ୍ରାର୍ଥୀଙ୍କ ମଧ୍ୟରେ ୮୪୯ ଜଣ ଅଣସଂରକ୍ଷିତ ବର୍ଗର ଓ ୨୪୩ ଜଣ ଅନୁସୂଚିତ ଜନଜାତି ବର୍ଗର। ଓଡ଼ିଶା ପୋଲିସ ପକ୍ଷରୁ ଏଥିପାଇଁ ଲିଖିତ ପରୀକ୍ଷା କରାଯାଇଥିଲା। ଏଥିରେ ଏଏସ୍ଆଇ ପଦବୀ ପାଇଁ ସମୁଦାୟ ମାର୍କର ୪୦ ପ୍ରତିଶତ ରଖିବା ବାଧ୍ୟତାମୂଳକ ଥିଲା। ମନୋନୀତ ପ୍ରାର୍ଥୀମାନଙ୍କୁ ୪ ମାସର ଏଏସ୍ଆଇ ପାଠ୍ୟ ଖସଡାରେ ପ୍ରଶିକ୍ଷଣ ଦିଆଯିବ। ଏହି ପ୍ରଶିକ୍ଷଣ ୨୦୨୧ ଫେବୃୟାରୀ ୧୫ରୁ ଆରମ୍ଭ ହେବ। ପରେ ସେମାନଙ୍କୁ ଥାନାରେ ୨ ମାସର ବ୍ୟବହାରିକ ପ୍ରଶିକ୍ଷଣ ଦିଆଯିବ। ଏହାପରେ ନିୟମିତ ଏଏସ୍ଆଇ ଭାବେ ସମସ୍ତଙ୍କୁ ନିଯୁକ୍ତି ଦିଆଯିବ। ପରେ ସେମାନଙ୍କୁ ମାମଲା ଅନୁସନ୍ଧାନ ଓ ତଦନ୍ତ କରିବାକୁ କ୍ଷମତା ପ୍ରଦାନ କରାଯିବ ବୋଲି ପୋଲିସ ମୁଖ୍ୟାଳୟ ପକ୍ଷରୁ ଶନିବାର ଏକ ପ୍ରେସ୍ ନୋଟ୍ ଜରିଆରେ ଅବଗତ କରାଯାଇଛି।