ବଇଣ୍ଡା, ୨୫ା୮ : ନିଃଶୁଳ୍କ ହୋଇଥିବାରୁ ୧୦୮ ଆମ୍ବୁଲାନ୍ସ ଉପରେ ବଢ଼ୁଛି ନିର୍ଭରଶୀଳତା। ତତ୍କାଳ ସେବା ମଧ୍ୟ ଦେଉଛି ସନ୍ତୋଷ। ହେଲେ ଅନୁଗୋଳ ଜିଲା କିଶୋରନଗରରେ କେଁ ପୂରାଇଛି ଠିକା ସଂସ୍ଥା। ଜିଲା ସ୍ବାସ୍ଥ୍ୟ ପ୍ରଶାସନ ସହ ସଲାସୁତୁରା କରି କିଶୋରନଗରରେ ଥିବା ଆମ୍ବୁଲାନ୍ସକୁ ଠିକା ସଂସ୍ଥା ପଡ଼ୋଶୀ ଜିଲାକୁ ପଠାଇ ଦେଇଥିବା ଅଭିଯୋଗ ହେଉଛି। ଫଳରେ ଆବଶ୍ୟକତା ବେଳେ କିଶୋରନଗର ଅଞ୍ଚଳବାସୀଙ୍କ ନିକଟରେ ଠିକ୍ ସମୟରେ ଉପଲବ୍ଧ ହେଉନି ଏହି ଜରୁରୀ ସେବା। ଏହାକୁ ନେଇ ତେଜିବାରେ ଲାଗିଛି ଜନଅସନ୍ତୋଷ।
ବାମୁର ଗ୍ରାମବାସୀ କହିଛନ୍ତି, ୨୦୧୭ ମସିହାରେ କିଶୋରନଗର ବ୍ଲକକୁ ଜିଲା ସ୍ବାସ୍ଥ୍ୟ ବିଭାଗ ପକ୍ଷରୁ ୨ଟି ୧୦୮ ଆମ୍ବୁଲାନ୍ସ ଯୋଗାଇ ଦିଆଯାଇଥିଲା। ସେଥିରୁ ଗୋଟିଏ ବଇଣ୍ଡା ପ୍ରାଥମିକ ସ୍ବାସ୍ଥ୍ୟକେନ୍ଦ୍ରଠାରେ ଓ ଅନ୍ୟଟି କିଶୋରନଗର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ରହୁଥିଲା। କିନ୍ତୁ କର୍ମଚାରୀଙ୍କ ରହଣିରେ ଅସୁବିଧା ହେବାରୁ କିଶୋରନଗର ସ୍ବାସ୍ଥ୍ୟକେନ୍ଦ୍ରରୁ ଉକ୍ତ ଆମ୍ବୁଲାନ୍ସକୁ ୨୦୧୮ରେ ବାମୁର ମହାତ୍ମା ଗାନ୍ଧୀ ମେମୋରିଆଲ ଟ୍ରଷ୍ଟ ନିକଟରେ ରଖାଯାଇଥିଲା। ଆମ୍ବୁଲାନ୍ସ କର୍ମଚାରୀଙ୍କୁ ଟ୍ରଷ୍ଟ ପକ୍ଷରୁ ଘର ଯୋଗାଇ ଦିଆଯାଇଥିଲା। ଫଳରେ କିଶୋରନଗର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଉପରେ ନିର୍ଭରଶୀଳ ୧୬ ପଞ୍ଚାୟତବାସୀ ଆବଶ୍ୟକତା ବେଳେ ତତ୍କାଳ ସେବା ପାଇପାରୁଥିଲେ। ହେଲେ ଉକ୍ତ ଆମ୍ବୁଲାନ୍ସଟି ଅଚଳ ହୋଇପଡିଥିଲେ ମଧ୍ୟ ଦାୟିତ୍ୱରେ ଥିବା ଠିକାସଂସ୍ଥା ମରାମତି କରି ନ ଥିଲା। ଦୀର୍ଘଦିନ ଧରି ତାହା ପରିତ୍ୟକ୍ତ ଅବସ୍ଥାରେ ପଡ଼ିରହିବା ପରେ ୨୦୨୧ ମସିହାରେ ସ୍ବାସ୍ଥ୍ୟ ବିଭାଗ ପକ୍ଷରୁ କିଶୋରନଗର ଅଞ୍ଚଳ ପାଇଁ ଏକ ନୂଆ ୧୦୮ ଆମ୍ବୁଲାନ୍ସ ଯୋଗାଇ ଦିଆଯାଇଥିଲା। କିନ୍ତୁ ଠିକା ସଂସ୍ଥା କାହାକୁ କିଛି ନ ଜଣାଇ ଗତ ମେ ମାସରୁ ଉକ୍ତ ଆମ୍ବୁଲାନ୍ସକୁ ପଡ଼ୋଶୀ ଜିଲାକୁ ପଠାଇ ଦେଇଥିବା ଗ୍ରାମବାସୀ ଅଭିଯୋଗ କରିଛନ୍ତି। ଏପରି କି ଜିଲା ସ୍ବାସ୍ଥ୍ୟ ପ୍ରଶାସନ ସହ ସଲାସୁତୁରା କରିଥିବା ଠିକା ସଂସ୍ଥା ଏହାକୁ ଅଞ୍ଚଳବାସୀଙ୍କ ନିକଟରେ ଏଯାଏ ଗୋପନ ରଖିଆସିଛି। ଫଳରେ ଏଠାରେ ଲୋଡ଼ାପଡ଼ିଲେ ୩୬ କିଲୋମିଟର ଦୂର ବଇଣ୍ଡା ନଚେତ ୪୦ କିଲୋମିଟର ଦୂର ଆଠମଲ୍ଲିକ କିମ୍ବା ୨୫ କିଲୋମିଟର ଦୂର ରେଢ଼ାଖୋଲରୁ ୧୦୮ ଆମ୍ବୁଲାନ୍ସକୁ ଆସିବାକୁ ପଡ଼ୁଛି। ଏହାଦ୍ୱାରା ଦୁର୍ଘଟଣାଗ୍ରସ୍ତ ଓ ଗୁରୁତର ରୋଗୀଙ୍କୁ ଠିକଣା ସମୟରେ ମେଡିକାଲରେ ପହଞ୍ଚାଯାଇ ପାରୁନାହିଁ। ଅନେକ ସମୟରେ ଖର୍ଚ୍ଚାନ୍ତ ହୋଇ ଲୋକେ ଘରୋଇ ଗାଡି ଭଡା କରି ରୋଗୀ ପରିବହନ କରୁଥିବାରୁ ଯୋଜନାର ଉଦ୍ଦେଶ୍ୟ ପୂରଣ ହେଉ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ଏ ନେଇ ବାମୁର ପଞ୍ଚାୟତବାସୀ ଗତ ଜୁଲାଇ ୨୩ ତାରିଖରେ ଜିଲା ସ୍ବାସ୍ଥ୍ୟ ବିଭାଗ ନିକଟରେ ଅଭିଯୋଗ କରିଥିଲେ ମଧ୍ୟ ସୁଫଳ ମିଳୁନାହିଁ। ତୁରନ୍ତ ଏଥିପ୍ରତି ରାଜ୍ୟ ସରକାର ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି।
(ପରିକ୍ଷିତ ସାହୁ)