ନୂଆଦିଲ୍ଲୀ,୩।୧: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଙ୍ଗଳବାର ଭାରତୀୟ ବିଜ୍ଞାନ କଂଗ୍ରେସକୁ ସମ୍ବୋଧିତ କରିଛନ୍ତି। ସେ କହିଛନ୍ତି, ଆସନ୍ତା ୨୫ ବର୍ଷ ମଧ୍ୟରେ ଭାରତ ଯେଉଁ ଉଚ୍ଚତାରେ ରହିବ ସେଥିରେ ଭାରତର ବୈଜ୍ଞାନିକ ଶକ୍ତିର ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହେବ। ଯେବେ ଦେଶ ସେବା କରିବାର ସଂକଳ୍ପ ବିଜ୍ଞାନରେ ଥିବା ଉତ୍ସାହ ସହିତ ମିଳିତ ହୁଏ, ସେତେବେଳେ ଫଳାଫଳ ମଧ୍ୟ ଆଶ୍ଚର୍ଯ୍ୟଜନକ ଆସିଥାଏ। ବୈଜ୍ଞାନିକ ଆଭିମୁଖ୍ୟ ସହିତ ଆଜିର ଭାରତ ଆଗକୁ ବଢୁଛି, ଆମେ ମଧ୍ୟ ଏହାର ଫଳାଫଳ ଦେଖୁଛୁ। ବିଜ୍ଞାନ କ୍ଷେତ୍ରରେ ଭାରତ ଦ୍ରୁତ ଗତିରେ ବିଶ୍ୱର ଶୀର୍ଷ ଦେଶମାନଙ୍କରେ ପରିଣତ ହେଉଛି।
ଭିଡିଓ କନଫରେନ୍ସିଂ ମାଧ୍ୟମରେ ସାଇନ୍ସ କଂଗ୍ରେସରେ ଯୋଗ ଦେଇ ପ୍ରଧାନମନ୍ତ୍ରୀ ମୋଦି କହିଛନ୍ତି, ଷ୍ଟାର୍ଟଅପ ଦୃଷ୍ଟିରୁ ଆଜି ଆମ ଦେଶ ଭାରତ ଶ୍ରେଷ୍ଠ ୩ ଦେଶ ମଧ୍ୟରେ ଅଛି। ୨୦୧୫ ପର୍ଯ୍ୟନ୍ତ ଗ୍ଲୋବାଲ ଇନୋଭେସନ ଇଣ୍ଡେକ୍ସରେ ଭାରତ ୧୩୦ ଦେଶ ତାଲିକାରେ ୮୧ତମ ସ୍ଥାନରେ ଥିଲା, କିନ୍ତୁ ୨୦୨୨ରେ ଆମେ ୪୦ତମ ସ୍ଥାନରେ ପହଞ୍ଚିଛୁ। ଏଥର ଭାରତୀୟ ବିଜ୍ଞାନ କଂଗ୍ରେସର ବିଷୟବସ୍ତୁକୁ ବିଶ୍ୱରେ ସର୍ବାଧିକ ଆଲୋଚନା କରାଯାଉଛି। ଆଜି ଦେଶର ଚିନ୍ତାଧାରା କେବଳ ଯେ ବିଜ୍ଞାନ ମାଧ୍ୟମରେ ମହିଳାଙ୍କୁ ସଶକ୍ତ କରାଯିବା ଉଚିତ ନୁହେଁ, ମହିଳାମାନଙ୍କ ଅଂଶଗ୍ରହଣରେ ବିଜ୍ଞାନକୁ ମଧ୍ୟ ସଶକ୍ତ କରାଯିବା ଉଚିତ। ବିଜ୍ଞାନ ଏବଂ ଅନୁସନ୍ଧାନକୁ ଏକ ନୂତନ ପ୍ରେରଣା ଦେବା ଆମର ଲକ୍ଷ୍ୟ।