ଜଗତ୍ସିଂହପୁର ଅଫିସ,୧୮ା୨: ଜଗତ୍ସିଂହପୁର ଜିଲାରେ ଦ୍ୱିତୀୟ ପର୍ଯ୍ୟାୟ ନିର୍ବାଚନ ଶୁକ୍ରବାର ହେବ। ଏଥିରେ ଜଗତ୍ସିଂହପୁର ବ୍ଲକ ଅଞ୍ଚଳର ୪ଟି ଜିଲା ପରିଷଦ ଜୋନ ଅନ୍ତର୍ଗତ ୩୦ଟି ପଞ୍ଚାୟତରେ ୧୦୯୭ ଜଣ ପ୍ରାର୍ଥୀଙ୍କ ଭାଗ୍ୟ ପରୀକ୍ଷା ହେବ। ସେମାନଙ୍କ ମଧ୍ୟରୁ ୧୬ଜଣ ଜିଲା ପରିଷଦ ପ୍ରାର୍ଥୀ, ୧୧୫ ସରପଞ୍ଚ, ୯୮ ସମିତିସଭ୍ୟ ଓ ୮୬୮ ଜଣ ୱାର୍ଡ ସଭ୍ୟ ପ୍ରାର୍ଥୀ ରହିଛନ୍ତି। ଗୁରୁବାର ଏସ୍ଭିଏମ୍ ସ୍ବୟଂଶାସିତ ମହାବିଦ୍ୟାଳୟ ପରିସରରେ ପୋଲିଂ କାର୍ଯ୍ୟରେ ନିୟୋଜିତ କର୍ମଚାରୀମାନେ ନିର୍ବାଚନ ସାମଗ୍ରୀ ଗ୍ରହଣ କରି ବୁଥ୍ଗୁଡିକରେ ପହଞ୍ଚତ୍ଛନ୍ତି। ପୋଲିଂ କର୍ମଚାରୀ ମହାବିଦ୍ୟାଳୟ ପରିସରରୁ ବାହାରିବା ବେଳେ ଜିଲାପାଳ ତଥା ଜିଲା ନିର୍ବାଚନ ଅଧିକାରୀ ପାରୁଲ ପଟାୱରୀ ବ୍ୟବସ୍ଥାର ତଦାରଖ କରିଥିଲେ। ଅତିରିକ୍ତ ଜିଲାପାଳ ସଚ୍ଚିଦାନନ୍ଦ ସାହୁ, ଜଗତ୍ସିଂହପୁର ବିଡିଓ ଓ ତହସିଲଦାର ପ୍ରମୁଖ ନିୟୋଜିତ ପୋଲିଂ କର୍ମଚାରୀଙ୍କୁ ବୁଥ୍ରେ ପହଞ୍ଚାଇବାରେ ସହଯୋଗ କରିଥିଲେ। ରାତି ପାହିଲେ ନିର୍ବାଚନ ହେବାକୁ ଥିବାରୁ ଗୁରୁବାର ରାତିରୁ ଦଳୀୟ ନେତା, କର୍ମୀ, ପ୍ରାର୍ଥୀ ଓ ସମର୍ଥକମାନଙ୍କ ଛାତି ଧଡଧଡ ହେଉଛି। ରାତିରେ ଗଁା ଗହଳିରେ ଯେଉଁଭଳି ଭାବେ ଛକାପଞ୍ଝା ଲାଗି ରହିଛି ତାହା ନିଆରା ପରିବେଶ ସୃଷ୍ଟି କରିଛି। ପ୍ରାର୍ଥୀ ଓ ସମର୍ଥକମାନେ ପ୍ରତି ଘର ଉପରେ ନଜର ରଖିଛନ୍ତି। କେତେକ ସ୍ଥାନରେ ରାଜନୈତିକ ହିଂସା ସୃଷ୍ଟି ହୋଇଥିଲେ ସୁଦ୍ଧା ନିୟନ୍ତ୍ରଣ ଭିତରେ ରହିଛି। କିନ୍ତୁ ନିର୍ବାଚନ ନ ସରିବା ପର୍ଯ୍ୟନ୍ତ ପରିସ୍ଥିତି ସ୍ବାଭାବିକ ଅଛି କି ନାହିଁ ତାହା କହିବା ସହଜ ନୁହେଁ। ମୋଟାମୋଟି ଭାବେ ଏବେ ଭୋଟରଙ୍କ ଉପରେ ପ୍ରତ୍ୟେକଙ୍କ ନଜର। ଭୋଟରଙ୍କୁ ନିଜ ସପକ୍ଷକୁ ମନେଇବାକୁ ପ୍ରାର୍ଥୀମାନେ କଳ, ବଳ, କୌଶଳ ଲଗାଇ ଦେଇଛନ୍ତି।
ଜିଲା ସୂଚନା ଓ ଲୋକ ସମ୍ପର୍କ କାର୍ଯ୍ୟାଳୟ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ଏହି ବ୍ଲକର ୪୮୭ଟି ୱାର୍ଡରେ ୧,୨୧,୧୩୦ ଜଣ ଭୋଟର ସେମାନଙ୍କ ମତଦାନ ଅଧିକାର ସାବ୍ୟସ୍ତ କରିବେ। ତେବେ ୧୪୬୧ ଜଣ ପୋଲିଂ ଅଧିକାରୀ, ୪୮୭ ଜଣ ପୋଲିସ କର୍ମଚାରୀ ନିର୍ବାଚନ କାର୍ଯ୍ୟରେ ନିୟୋଜିତ ହୋଇଛନ୍ତି। ଆବଶ୍ୟକତାକୁ ଦୃଷ୍ଟିରେ ରଖି ୧୦% କର୍ମଚାରୀଙ୍କୁ ସଂରକ୍ଷିତ ରହିଛନ୍ତି। ଜଗତ୍ସିଂହପୁର ବ୍ଲକ ଅଞ୍ଚଳରେ ୧୧୨ଟି ମହିଳା ପୋଲିଂ ବୁଥ୍ ସମେତ ମଧୁସୂଦନପୁରସ୍ଥିତ ଜଗନ୍ନାଥ ହାଇସ୍କୁଲ ପରିସରରେ ଆଦର୍ଶ ମହିଳା ବୁଥ୍ କରାଯାଇଛି। ପାଟ୍ରୋଲିଂ ପାଇଁ ୩୦ଟି ମୋବାଇଲ ଦଳ ଗଠନ କରାଯାଇଛି। ପୋଲିସ ସବ୍ଇନ୍ସପେକ୍ଟର ଓ ଆସିଷ୍ଟାଣ୍ଡ ସବ୍ଇନ୍ସପେକ୍ଟର ଆଇନଶୃଙ୍ଖଳା ରକ୍ଷା ପାଇଁ ନିୟୋଜିତ ହୋଇଛନ୍ତି। ସୂଚନାଯୋଗ୍ୟ ଯେ, ଜଗତ୍ସିଂହପୁର ଜିଲା ପରିଷଦ ୧ନଂ. ଜୋନରେ ୯ଟି ପଞ୍ଚାୟତ, ୨ନଂ.ରେ ୭, ୩ନଂ.ରେ ୮ ଓ ୪ନଂ.ରେ ୬ଟି ପଞ୍ଚାୟତ ରହିଛି।