ବରଗଡ଼,୩୦।୧୨(ପ୍ରେମାନନ୍ଦ ଖମାରୀ): ବରଗଡ଼ କୃଷିପ୍ରଧାନ ଜିଲା। କୃଷି ହିଁ ଜିଲାବାସୀଙ୍କ ଜୀବନ ଜୀବିକା। କୃଷିକ୍ଷେତ୍ରରେ ବାଧା ଉପୁଜିଲେ ଜିଲାବାସୀଙ୍କ ଜନଜୀବନ ମଧ୍ୟ ପ୍ରଭାବିତ ହୋଇଥାଏ। ଏଭଳି ଏକ ନିଚ୍ଛକ ଦୃଶ୍ୟ ସୋମବାର ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖ ରାସ୍ତାରେ ଦେଖିବାକୁ ମିଳିଛି। ସୋହେଲା ବ୍ଲକ ଅନ୍ତର୍ଗତ ପାଣିମୋରା ମଣ୍ଡିରେ ପଡ଼ି ରହିଥିବା ତାଙ୍କ ଧାନ ଉଠୁ ନ ଥିବା ଯୋଗୁ ଉକ୍ତ ଗ୍ରାମର ଦଶମ ଶ୍ରେଣୀ ଛାତ୍ର ମନୋଜ ସାହୁ ଧାନବିକ୍ରି ଦାବିରେ ଜିଲାପାଳଙ୍କ କାର୍ଯ୍ୟାଳୟ ସମ୍ମୁଖ ରାସ୍ତାରେ ହୋଇଥିବା ଚାଷୀଙ୍କ ଧାରଣାରେ ସାମିଲ ହୋଇଛନ୍ତି। ଧାରଣାରେ ମନୋଜଙ୍କୁ ଦେଖି ପଚାରିବାରୁ ସେ ଯାହା କହିଛନ୍ତି, ଯିଏ ବି ଶୁଣିବ, ତାଙ୍କ ଲୋମ ଟାଙ୍କୁରି ଉଠିବ।
ପାଣିମୋରା ଗ୍ରାମର ମା’ ପୂର୍ଣ୍ଣିମା ଏବଂ ବାପା ପବିତ୍ରଙ୍କ ଏକମାତ୍ର ପୁଅ ମନୋଜ। ସେ ବର୍ତ୍ତମାନ ଗ୍ରାମର ହାଇସ୍କୁଲରେ ଦଶମ ଶ୍ରେଣୀରେ ପଢ଼ୁଛନ୍ତି। ଆଉ କେଇମାସ ପରେ ସେ ମାଟ୍ରିକ ପରୀକ୍ଷା ଦେବେ। କିନ୍ତୁ ମା’ ଜଣେ ମାନସିକ ରୋଗୀ ହୋଇଥିବାବେଳେ ବାପା ଦୀର୍ଘଦିନ ହେଲା ପକ୍ଷାଘାତରେ ଶର୍ଯ୍ୟାଶାୟୀ ଅଛନ୍ତି। ଫଳରେ ସେ ତାଙ୍କର ୩ ଏକର ଜମିରେ ନିଜେ ଶ୍ରମିକ ଲଗାଇ ଚାଷବାସ କରି ଆସୁଛନ୍ତି ବୋଲି ମନୋଜ କହିଛନ୍ତି। ସେ ଧାନ ଅମଳ କରିଛନ୍ତି। ଅମଳ ଧାନକୁ ବିକ୍ରି ପାଇଁ ପ୍ରାୟ ୨୦ ଦିନ ହେଲା ପାଣିମୋରା ମଣ୍ଡିକୁ ଆଣିଛନ୍ତି। କିନ୍ତୁ ଏ ପର୍ଯ୍ୟନ୍ତ ତାଙ୍କ ଧାନ ବିକ୍ରି ହୋଇ ପାରି ନ ଥିବା ମନୋଜ କହିଛନ୍ତି।
ଧାନ ବିକ୍ରି ହୋଇ ପାରି ନ ଥିବା ଯୋଗୁ ସେ ଋଣ ପରିଶୋଧ କରି ପାରୁ ନାହାନ୍ତି। ସେହିପରି ଶ୍ରମିକଙ୍କୁ ପାରିଶ୍ରମିକ ମଧ୍ୟ ଦେଇ ପାରୁ ନାହାନ୍ତି। ଅନ୍ୟପଟେ ଆଜି ଧାନ ଉଠିବ, କାଲି ଉଠିବ ଭାବି ସେ ମାଟ୍ରିକ ପରୀକ୍ଷା ପ୍ରସ୍ତୁତି ଛାଡ଼ି ମଣ୍ଡିକୁ ଧାଁ ଧପଡ଼ ହେଉଛନ୍ତି ବୋଲି ମନୋଜ କହିଛନ୍ତି। ଧାନ ଉଠୁ ନ ଥିବା ପ୍ରତିବାଦରେ ଚାଷୀମାନେ ଜିଲାପାଳଙ୍କ କାର୍ଯ୍ୟାଳୟକୁ ଯାଉଥିବା ଜାଣି ତାଙ୍କ ସହିତ ଆସି ଧାରଣାରେ ସାମିଲ ହୋଇଛି ଏବଂ ଯେତେଶୀଘ୍ର ଧାନ ବିକ୍ରି ହେବ, ସେତେ ଭଲ ହେବ ବୋଲି ସେ କହିଛନ୍ତି।
