ଗୋଲାମୁଣ୍ଡା,୧୪ା୧୧(ବଟକୃଷ୍ଣ ପଣ୍ଡା): କଳାହାଣ୍ଡି ଜିଲା ଗୋଲାମୁଣ୍ଡା ପୋଲିସ ବୁଧବାର ନକଟିକାନୀ ଗାଁରେ ଚଢ଼ାଉ କରି ୬ ଶିଶୁ ସହ ୧୧ ଦାଦନ ଶ୍ରମିକଙ୍କୁ ଉଦ୍ଧାର କରିଛି। ଏହି ଘଟଣାରେ ପୋଲିସ ଦାଦନ ସର୍ଦ୍ଦାରଙ୍କ ୩ସହଯୋଗୀଙ୍କୁ ଗିରଫ କରି କୋର୍ଟ ଚାଲାଣ କରିଛି। ସେମାନେ ହେଲେ ଉଗ୍ରେ ଶବର, ଗିରିଧାରୀ ବାଗ ଓ ପବିତ୍ର ତାଣ୍ଡି।
ମିଳିଥିବା ସୂଚନା ମୁତାବକ, ଦାଦନ ସର୍ଦ୍ଦାର ପଡ଼ୋଶୀ ବଲାଙ୍ଗୀର ଓ ବରଗଡ଼ ଜିଲାର ଶ୍ରମିକମାନଙ୍କୁ ପ୍ରଲୋଭନ ଦେଖାଇ ତେଲଙ୍ଗାନା ରାଜ୍ୟର ସିକନ୍ଦରାବାଦ ସହରର ଏକ ଇଟାଭାଟିରେ ନିୟୋଜିତ କରିବା ପାଇଁ ଚାଲାଣ କରୁଥିଲେ। ପ୍ରଥମେ ବାଉନମାଲରୁ ଦେଉଳଗାଁ ଜଙ୍ଗଲକୁ ନେଇଥିବା ବେଳେ ସେଠାରୁ ଆଣି ନକଟିକାନୀ ଗ୍ରାମରେ ଲୁଚାଇ ରଖିଥିଲେ। କୌଣସି ସୂତ୍ରରୁ ଖବର ପାଇ ପୋଲିସ ଗ୍ରାମରେ ପହଞ୍ଚି ଶିଶୁଙ୍କ ସହ ୧୧ଜଣ ଦାଦନ ଶ୍ରମିକଙ୍କୁ ଉଦ୍ଧାର କରିଛି। ଏହା ଜାଣିବା ପରେ ମୁଖ୍ୟ ଦାଦନ ସର୍ଦ୍ଦାର ଫେରାରଥିବା ଜଣାପଡିଛି।
ଅନ୍ୟପଟେ ପୋଲିସ ଅନୁକମ୍ପା ଦେଖାଇ ସେମାନଙ୍କୁ ଖସାଇଦେଇଥିବା ଅଭିଯୋଗ ହେଉଛି। ଏ ନେଇ ଗୋଲାମୁଣ୍ଡା ଥାନା ଅଧିକାରୀ ଶ୍ୱେତାପଦ୍ମା ସେଠଙ୍କୁ ପଚାରିବାରୁ ପ୍ରଥମେ ୩ଜଣଙ୍କ ନାଁରେ ଅଭିଯୋଗ ଆସିବା ମାତ୍ରେ ଗିରଫ କରି କୋର୍ଟ ଚାଲାଣ କରିଛୁ। ଅନ୍ୟମାନଙ୍କ ନାଁରେ ଅଭିଯୋଗ ଆସିଛି ଓ ଖୁବ୍ଶୀଘ୍ର ସେମାନଙ୍କୁ ଗିରଫ କରାଯିବ ବୋଲି କହିଥିଲେ।