ନୂଆଦିଲ୍ଲୀ,୧୧।୨: ଦେଶରେ ସାଇବର ଅପରାଧ ଦିନକୁ ଦିନ ଦ୍ରୁତ ଗତିରେ ବୃଦ୍ଧି ପାଇବାରେ ଲାଗିଛି। ଏନ୍ସିଆରବି ରିପୋର୍ଟ ଅନୁଯାୟୀ, ୨୦୨୦ରେ ସାଇବର ଅପରାଧ ୧୧ପ୍ରତିଶତ ବୃଦ୍ଧି ପାଇଛି। ଏନେଇ ଗୃହ ମନ୍ତ୍ରଣାଳୟ ସଂସଦୀୟ କମିଟିକୁ ସୂଚନା ଦେଇଛି। ଏନ୍ସିଆରବି ରିପୋର୍ଟ ଅନୁସାରେ ୨୦୧୭ରେ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳରେ ୨୧,୭୯୬ ସାଇବର ଅପରାଧ ପଞ୍ଜିକୃତ ହୋଇଛି। ସେହିପରି ୨୦୧୮ରେ ୨୭,୨୪୮ମାମଲା, ୨୦୧୯ରେ ୪୪,୭୩୫ ଓ ୨୦୨୦ ସୁଦ୍ଧା ଏହି ମାମଲା ୫୦,୦୩୫କୁ ବୃଦ୍ଧି ପାଇଛି। ୨୦୧୯ ତୁଳନାରେ ଏଥିରେ ୧୧.୮ ପ୍ରତିଶତ ବୃଦ୍ଧି ହୋଇଛି ବୋଲି ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି। ରିପୋର୍ଟ ଅନୁଯାୟୀ, ୨୦୧୯ରେ ଏହି ବର୍ଗରେ ଅପରାଧ ହାର ୩.୩ ପ୍ରତିଶତ ଥିଲା, ଯାହା ୨୦୨୦ରେ ୩.୭ପ୍ରତିଶତକୁ ବୃଦ୍ଧି ପାଇଛି। ୨୦୨୦ରେ ପଞ୍ଜୀକୃତ ହୋଇଥିବା ସାଇବର ଅପରାଧ ମଧ୍ୟରୁ ୬୦.୨ ପ୍ରତିଶତ ଠକେଇ ମାମଲା ରହିଥିବା ଜଣାପଡ଼ିଛି। ଅନ୍ୟପଟେ ସାଇବର ଅପରାଧ ମଧ୍ୟରେ ଦ୍ୱିତୀୟ ସ୍ଥାନରେ ରହିଛି ଯୌନ ଶୋଷଣ। ଯୌନଶୋଷଣ ସହ ଜଡିତ ସାଇବର ଅପରାଧରେ ସମୁଦାୟ ସାଇବର ଅପରାଧ ୬.୬ ପ୍ରତିଶତ ରହିଛି। ଏଥିସହ ଜଡିତ ୩୨୯୩ଟି ମାମଲା ପଞ୍ଜିକୃତ କରାଯାଇଥିବା ଜଣାପଡ଼ିଛି। ତେବେ ଦେଶରେ ସାଇବର ଅପରାଧ ବୃଦ୍ଧିକୁ ନେଇ ସଂସଦୀୟ କମିଟି ଉଦ୍ବେଗ ପ୍ରକାଶ କରିଛି। ସାଇବର ଅପରାଧୀ ଅପରାଧ ଘଟଇବା ପାଇଁ ନୂଆ ନୂଆ ପନ୍ଥା ଅପଣାଉଥିବା ବେଳେ ପୋଲିସର ବେପାରୁଆ ମନୋଭାବ ସାମ୍ନାକୁ ଆସୁଛି। ସେହିପରି ପଞ୍ଜାବ, ରାଜସ୍ଥାନ, ଗୋଆ ଓ ଆସାମରେ ଗୋଟିଏ ବି ସାଇବର କ୍ରାଇମ ସେଲ୍ ନ ଥିବା ବେଳେ ଆନ୍ଧ୍ର, କର୍ନାଟକ ଓ ଉତ୍ତରପ୍ରଦେଶରେ କେବଳ ଗୋଟିଏ କିମ୍ବା ଦୁଇଟି ସାଇବର କ୍ରାଇମ ସେଲ୍ ରହିଛି ବୋଲି କମିଟି ପକ୍ଷରୁ କୁହାଯାଇଛି। ତେଣୁ ସମସ୍ତ ରାଜ୍ୟର ସମସ୍ତ ଜିଲାରେ ପୋଲିସ ସାଇବର ସେଲ୍ ଗଠନ ପାଇଁ ସୁପାରିଶ କରିବାକୁ କମିଟି ମନ୍ତ୍ରଣାଳୟକୁ କହିଛି। ସମସ୍ତ ରାଜ୍ୟ ସେମାନଙ୍କ ସ୍ଥାନରେ ଥିବା ସାଇବର ଅପରାଧର ହଟ୍ସ୍ପଟ୍ ଖୋଜିବା ଉଚିତ୍ ଯାଦ୍ୱାରା ଅପରାଧୀଙ୍କୁ ରୋକାଯାଇପାରିବ ବୋଲି ସଂସଦୀୟ କମିଟି କହିଛି।