କେନ୍ଦୁଝର,୨ା୨(ସ୍ବ.ପ୍ର.): ଚମ୍ପୁଆସ୍ଥିତ ନିକଲସନ ଫରେଷ୍ଟ ଟ୍ରେନିଂ ସ୍କୁଲ ପରିସରରୁ ଗତ ୨୮ ତାରିଖରେ ୧୧ ଟି ମୂଲ୍ୟବାନ ଚନ୍ଦନ ଗଛକୁ ଦୁର୍ବୃତ୍ତମାନେ କାଟି ନେଇଛନ୍ତି। ତେବେ ଏ ନେଇ କୌଣସି ରିପୋର୍ଟ ଥାନାରେ ଦିଆଯାଇ ନାହିଁ। ଫଳରେ ଏହାକୁ ନେଇ ସ୍ଥାନୀୟ ଲୋକେ ଘୋର ଅସନ୍ତୋଷ ପ୍ରକାଶ କରିଛନ୍ତି। ଏ ନେଇ ବନବିଭାଗ ପାଖରେ କୌଣସି ସୂଚନା ନାହିଁ ବୋଲି ଡିଏଫ୍ଓ ଧନରାଜ ଏଚ୍ଡି କହିଛନ୍ତି।
ଏହି ଚନ୍ଦନ ଗଛର ମୂଲ୍ୟ ଲକ୍ଷାଧିକ ଟଙ୍କା ହେବ ବୋଲି କୁହାଯାଉଛି। ଏଣୁ ଚନ୍ଦନ ଗଛ ଚୋରି ହେଲେ ସ୍ଥାନୀୟ ପୋଲିସ ଷ୍ଟେଶନ ଓ ବନବିଭାଗକୁ ସୂଚନା ଦେବା ଜରୁରୀ। ଗତ ୨୮ ତାରିଖରୁ ଚୋରି ହୋଇଥିଲେ ହେଁ ସ୍ଥାନୀୟ ବନବିଭାଗ ଜିଲା ବନବିଭାଗ ମୁଖ୍ୟଙ୍କୁ ସୂଚନା ଦେଇ ନାହାନ୍ତି। ଯାହା ସମସ୍ତଙ୍କୁ ଚକିତ କରିଛି। ଅନ୍ୟପକ୍ଷରେ ଗଛଗୁଡ଼ିକ ଛୋଟ ଥିଲା ବୋଲି ସ୍କୁଲର ଜଣେ ରେଞ୍ଜ ଅଧିକାରୀ ସୂଚନା ଦେଇଛନ୍ତି। ଉକ୍ତ କଟା ଗଛଗୁଡ଼ିକ ଉପାଡ଼ି ପ୍ରମାଣ ନଷ୍ଟ କରାଯାଇଥିବା ସ୍ଥାନୀୟ ଲୋକ ଅଭିଯୋଗ କରିଛନ୍ତି।
ସୂଚନାଯୋଗ୍ୟ, ଉକ୍ତ ସ୍କୁଲ ଆଖପାଖ ଅଞ୍ଚଳରେ ବହୁ ସଂଖ୍ୟାରେ ଚନ୍ଦନ ଗଛ ରହିଛି। ଏଣୁ ଏନେଇ ତୁରନ୍ତ ପଦକ୍ଷେପ ନେବା ସହ ସେସବୁର ସୁରକ୍ଷା କରିବାକୁ ଦାବି ହେଉଛି।
