ନୂଆଦିଲ୍ଲୀ,୬।୫: ଆଜିକାଲି ଯୁବବର୍ଗଙ୍କୁ କ୍ରିକେଟ୍ ନିଶା ଘାରିଛି। କ୍ରିକେଟ୍ ଦେଖିବା ଏବଂ ଖେଳିବାକୁ ମଜା ଲାଗିଥାଏ। ବେଳେବେଳେ ଏହି ଖେଳ ବିପଜ୍ଜନକ ପ୍ରମାଣିତ ହୁଏ। କ୍ରିକେଟରେ ଖେଳାଳିମାନେ ବଲ ଦ୍ୱାରା ଆଘାତ ପାଇ ଅନେକ ସମୟରେ ଆହତ ହୁଅନ୍ତି। ମହାରାଷ୍ଟ୍ରରେ ଏଭଳି ଏକ ମାମଲା ସାମ୍ନାକୁ ଆସିଛି। ଏଠାରେ ଜଣେ ବ୍ୟାଟ୍ସମ୍ୟାନ ଏପରି ଏକ ଶଟ ମାରିଥିଲେ ଯେ ବଲ ବୋଲରଙ୍କ ପ୍ରାଇଭେଟ୍ ପାର୍ଟକୁ ଆଘାତ କଲା ଏବଂ ସେ ସେଠାରେ ହିଁ ଟଳିପଡିଥିଲେ।
ପୁଣେର ଲୋହେଗାଓଁରେ କ୍ରିକେଟ ଖେଳୁଥିବାବେଳେ ୧୧ ବର୍ଷର ନାବାଳକଙ୍କ ସହ ଏହି ଘଟଣା ଘଟିଛି। ତାଙ୍କ ନାମ ଶୌର୍ଯ୍ୟ ଓରଫ ଶମ୍ଭୁ କାଲିଦାସ ଖଣ୍ଡଭେ ବୋଲି ଜଣାପଡିଛି। ଶୌର୍ଯ୍ୟ ତାଙ୍କ ସାଙ୍ଗମାନଙ୍କ ସହ କ୍ରିକେଟ ଖେଳୁଥିବାବେଳେ ଏହି ଦୁର୍ଘଟଣା ଘଟିଥିଲା। ଏହି ଦୁର୍ଘଟଣା ପରେ ସେଠାରେ ଉତ୍ତେଜନା ଦେଖାଦେଇଥିଲା।
ମିଳିଥିବା ସୂଚନା ଅନୁଯାୟୀ, ଶୌର୍ଯ୍ୟ ବୋଲିଂ କରୁଥିଲେ ଏବଂ ଅନ୍ୟ ଜଣେ ପିଲା ବ୍ୟାଟିଂ କରୁଥିଲେ, ଶୌର୍ଯ୍ୟ ବଲ ଫିଙ୍ଗିବା ମାତ୍ରେ ବ୍ୟାଟିଂ କରୁଥିବା ଅନ୍ୟ ପିଲା ଏକ ସଟ ଖେଳିଥିଲେ, ବଲ ଶୌର୍ଯ୍ୟଙ୍କ ପ୍ରାଇଭେଟ୍ ପାର୍ଟରେ ବାଜିଥିଲା। ହଠାତ୍ ସେ ପଡିଯାଇଥିଲେ। ଶୌର୍ଯ୍ୟ ପଡ଼ିଯିବା ପରେ ସେଠାରେ ଉପସ୍ଥିତ ଥିବା ଅନ୍ୟ ଲୋକମାନେ ତାଙ୍କ ଆଡକୁ ଦୌଡିଥିଲେ। ଏହା ପରେ ତାଙ୍କୁ ଡାକ୍ତରଖାନା ନିଆଯାଇଥିଲା। ସେଠାରେ ତାଙ୍କୁ ମୃତ ଘୋଷଣା କରାଯାଇଥିଲା।
କ୍ରିକେଟ ବଲ ବେଳେବେଳେ ସାଂଘାତିକ ପ୍ରମାଣିତ ହୁଏ। ବୃତ୍ତିଗତ କ୍ରିକେଟ ରେ ମଧ୍ୟ କ୍ରିକେଟ ବଲ ଅନେକ ଲୋକଙ୍କ ଜୀବନ ନେଇଛି, ଯେଉଁଥିରୁ ଅଷ୍ଟ୍ରେଲୀୟ କ୍ରିକେଟର ଫିଲ ହ୍ୟୁଜଙ୍କ ଘଟଣା ଅତ୍ୟନ୍ତ ପ୍ରସିଦ୍ଧ। ବ୍ୟାଟିଂ କରୁଥିବାବେଳେ ଫିଲ ହ୍ୟୁଜ ଏକ ବଲରେ ଆଘାତ ପାଇଥିଲେ, ଯାହା ପରେ ସେ ପ୍ରାଣ ହରାଇଥିଲେ। ଫିଲ ହ୍ୟୁଜ ଏକ ବାଉନ୍ସର୍ ବଲର ଶିକାର ହୋଇଥିଲେ, ଯାହା ତାଙ୍କ ପାଇଁ ସାଂଘାତିକ ହୋଇଥିଲା।