ଖୋର୍ଦ୍ଧା ଅଫିସ,୮ା୩:କୋଭିଡ୍ ମହାମାରୀ ସମୟରେ ନିୟମିତ ଟିକାକରଣରୁ ବଞ୍ଚିତ ପିଲାମାନଙ୍କୁ ଟିକାକରଣ ନିମନ୍ତେ ସୋମବାର ଖୋର୍ଦ୍ଧା ଜିଲା ମୁଖ୍ୟ ଚିକିତ୍ସାଳୟ କାର୍ଯ୍ୟାଳୟ ମାତୃ ଓ ଶିଶୁ ଯତ୍ନ କେନ୍ଦ୍ର ପରିସରରେ ରାଜ୍ୟସ୍ତରୀୟ ସଘନ ମିଶନ ଇନ୍ଦ୍ରଧନୁଷ ୪.୦ ଟିକାକରଣ କାର୍ଯ୍ୟକ୍ରମ ଶୁଭାରମ୍ଭ ହୋଇଛି। ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ନିର୍ଦ୍ଦେଶକ ବିଜୟ କୁମାର ପାଣିଗ୍ରାହୀ ଏହାକୁ ଉଦ୍ଘାଟନ କରିଛନ୍ତି। ଜନ୍ମରୁ ୨ବର୍ଷ ପର୍ଯ୍ୟନ୍ତ ଶିଶୁଙ୍କୁ ଟିକା ଖୁଆଇ ଏହି ଅଭିଯାନର ଶୁଭାରମ୍ଭ କରିଥିଲେ। ସିଡିଏମଓ ଆର୍ତ୍ତବନ୍ଧୁ ନାୟକ, ଏଡିଏମଓ(ପରିବାର କଲ୍ୟାଣ) ଡା.ରଘୁନାଥ ନାୟକ, ଡା.ଶଶିଭୂଷଣ ପଣ୍ଡା, ଡା.ନୀହାର ରଞ୍ଜନ ରାୟ, ଡା.ସୁନୀଲ କୁମାର ଦାଶ, ଏସଭିଏଲଏମ ରବିଶଙ୍କର ପଟ୍ଟନାୟକ, ଡିପିଏମ୍ ପ୍ରକାଶ ଚନ୍ଦ୍ର ବାନାର୍ଜୀ ପ୍ରମୁଖ ଉପସ୍ଥିତ ଥିଲେ।
ଏହି ଅବସରରେ ସ୍ବାସ୍ଥ୍ୟ ନିର୍ଦ୍ଦେଶକ ପାଣିଗ୍ରାହୀ କହିଥିଲେ ଯେ, ଏହି ଟିକାକରଣର ଆଭିମୁଖ୍ୟ ହେଉଛି ଆଦୌ କିମ୍ବା ଅଧାରୁ ଟିକା ନେଇ ନ ଥିବା ଜନ୍ମରୁ ୨ବର୍ଷ ପର୍ଯ୍ୟନ୍ତ ଶିଶୁ ଓ ଗର୍ଭବତୀଙ୍କ ସୂଚୀ ଏବଂ ସେମାନଙ୍କର ଟିକାକରଣ କରିବା ଯାହାଦ୍ୱାରା ଟିକାକରଣ ଶତପ୍ରତିଶତ ହୋଇପାରିବ। ଏହି ଟିକା ଶିଶୁଙ୍କୁ ୧୨ଟି ରୋଗରୁ ସୁରକ୍ଷା ଦେଇଥାଏ। ଏନଏଫଏଚଏସର ୨୦୨୦-୨୧ ସର୍ଭେ ଅନୁଯାୟୀ ଓଡ଼ିଶାରେ ସମ୍ପୂର୍ଣ୍ଣ ଟିକାକରଣ ହାର ହେଉଛି ୯୦.୫ ପ୍ରତିଶତ, ଯାହାକି ଦେଶର ଅନ୍ୟ ରାଜ୍ୟ ତୁଳନାରେ ସର୍ବାଧିକ। କେନ୍ଦ୍ରସରକାର ଓଡ଼ିଶାର ୧୨ଟି ଜିଲାକୁ ସଘନ ମିଶନ ଇନ୍ଦ୍ରଧନୁଷ ୪.୦ ଟିକାକରଣ ଅଭିଯାନରେ ଚିହ୍ନଟ କରିଛନ୍ତି। ସେଗୁଡିକ ହେଲା ଗଞ୍ଜାମ, ଯାଜପୁର, ଝାରସୁଗୁଡା, କେନ୍ଦ୍ରାପଡ଼ା, କେନ୍ଦୁଝର, କୋରାପୁଟ, ଖୋର୍ଦ୍ଧା, ମାଲକାନଗିରି, ମୟୂରଭଞ୍ଜ, ସମ୍ବଲପୁର, ସୁନ୍ଦରଗଡ଼ ଏବଂ ୫ଟି ମହାନଗର ନିଗମ। ଏହି ଅଭିଯାନ ମାର୍ଚ୍ଚରୁ ମେ’ ମାସ ପର୍ଯ୍ୟନ୍ତ ତିନୋଟି ପର୍ଯ୍ୟାୟରେ ଏବଂ ପ୍ରତ୍ୟେକ ପର୍ଯ୍ୟାୟ ୭ଦିନ ପର୍ଯ୍ୟନ୍ତ ଟିକାକରଣ କରାଯିବ। ପ୍ରଥମ ପର୍ଯ୍ୟାୟ ମାର୍ଚ୍ଚ ୭, ଦ୍ୱିତୀୟ ପର୍ଯ୍ୟାୟ ଏପ୍ରିଲ ୪ ଓ ତୃତୀୟ ପର୍ଯ୍ୟାୟ ମେ’୨ରୁ ଆରମ୍ଭ ହେବ। ଏଥିଲାଗି ଜିଲାସ୍ତରରେ ଟାସ୍କ ଫୋର୍ସ ଜିଲାପାଳଙ୍କ ଅଧ୍ୟକ୍ଷତାରେ ଗଠନ କରାଯାଇଛି। ଏହି କମିଟି ଏହାର ତଦାରଖ କରିବ। ଏହି ଅଭିଯାନର ସଫଳତା ପାଇଁ ରାଜ୍ୟସ୍ତରୀୟ ନୋଡାଲ ଅଫିସରଙ୍କୁ ନିୟୋଜିତ କରାଯାଇଛି। ୧୨ଟି ଜିଲାରେ ୧୬୮ଟି ଗୋଷ୍ଠୀସ୍ତରୀୟ ସର୍ଭେ ଅନୁଯାୟୀ ୧୦,୯୯୭ଜଣ ପିଲା(ଜନ୍ମରୁ ୨ବର୍ଷ) ଏବଂ ୨୬୩୧ଜଣ ଗର୍ଭବତୀଙ୍କୁ ୪୬୨୫ ଟିକା ଅଧିବେଶନ ଜରିଆରେ ଟିକାକରଣ ଲକ୍ଷ୍ୟ ଧାର୍ଯ୍ୟ କରାଯାଇଛି। ଏହି କାର୍ଯ୍ୟକ୍ରମ ସଫଳତା ପାଇଁ ୟୁନିସେଫ, ବିଶ୍ୱ ସ୍ବାସ୍ଥ୍ୟ ସଙ୍ଗଠନ, ଏସଆଇଓୟୁଏନଡିପି ସହଯୋଗର ହାତ ବଢାଇଛନ୍ତି। ସେହିପରି ଖୋର୍ଦ୍ଧା ସିଡିଏମଓ ନାୟକ କହିଥିଲେ, ଖୋର୍ଦ୍ଧା ଜିଲାରେ ଟିକାକରଣ ହାର ୮୪ ପ୍ରତିଶତ ରହିଛି। ଆଗାମୀ ଦିନରେ ଏହାକୁ ୯୫ ପ୍ରତିଶତ ସଫଳତା ହାସଲ ଲାଗି ଉଦ୍ୟମ କରାଯିବ। ଯେପରି ସମସ୍ତ ଶିଶୁ ଓ ଗର୍ଭବତୀଙ୍କୁ ଟିକାକରଣ କରାଯିବ, ସେଥିପ୍ରତି ଗୁରୁତ୍ୱ ଦିଆଯାଇଛି। ଖୋର୍ଦ୍ଧା ଜିଲା ଏହି ଅଭିଯାନ ପାଇଁ ସହରାଞ୍ଚଳରେ ୧୮୫ଟି ସେକ୍ସନରେ ୫୫୯ ଶିଶୁ, ୬୮ ଗର୍ଭବତୀ ଏବଂ ୬୩ଟି ସେକ୍ସନରେ ୧୮୪ ଶିଶୁ, ୨୫ଜଣ ଗର୍ଭବତୀ ମୋଟ ୨୪୮ ସେକ୍ସନରେ ୭୪୩ ଶିଶୁ ଓ ୯୩ ଗର୍ଭବତୀଙ୍କୁ ପ୍ରଥମ ରାଉଣ୍ଡ ଟିକାକରଣ କରାଯିବ। ଡିପିଏମ ବାନାର୍ଜୀ କହିଥିଲେ, ଖୋର୍ଦ୍ଧା ଜିଲା ୨୦୧୮ରେ ୯୦ପ୍ରତିଶତ ଟିକାକରଣ ସଫଳତା ହାସଲ କରି ଜାତୀୟସ୍ତରରେ ପୁରସ୍କୃତ ହୋଇଛି।