କଟକ ଅଫିସ,୩ା୧୨: ସମ୍ବଲପୁର ସିଟି,ଜିଏସ୍ଟି ସର୍କଲ-୨ ଅଧୀନ ୧୧୭ ବ୍ୟକ୍ତିଗତ ଓ ବାଣିଜି୍ୟକ ସଂସ୍ଥାର କୋଟି କୋଟି ଟଙ୍କା ବକେୟା ପଡ଼ିଛି। ଗତ ନଭେମ୍ବର ୨୫ତାରିଖ ସୁଦ୍ଧା କେତେ ଟଙ୍କା ଟିକସ ବାବଦକୁ ବାକି ରହିଛି, ତାହାର ତଥ୍ୟ ହସ୍ତଗତ ହୋଇଛି। ସେଥିମଧ୍ୟରେ ହାଇଟେକ୍ ବଟଲିଂ ଲିମିଟେଡ୍ର ୧.୧୨କୋଟି ଓ ସୁରେନ୍ଦ୍ର ସିଂ କାବ୍ଲିର ୪୫ଲକ୍ଷ ୧୧ହଜାର ୬୫୮ ଟଙ୍କାର ସର୍ବାଧିକ ବକେୟା ରହିଥିବା ଜଣାପଡ଼ିଛି। ସେହିପରି ଅଭିଷେକ ଚେଜାରାଙ୍କ ନାମରେ ୧୩ଲକ୍ଷ ୫ହଜାର ୮୩୬, ଅଭି ମହାନନ୍ଦଙ୍କ ନାମରେ ୧୩ଲକ୍ଷ ୯୩ହଜାର ୭୬୪, ସଞ୍ଜୀବ କୁମାର ପଣ୍ଡାଙ୍କ ନାମରେ ୧୦ ଲକ୍ଷ ୬୮ ହଜାର ୬୯୨, ଉମାକାନ୍ତ ପଟେଲଙ୍କ ନାମରେ ୧୩ ଲକ୍ଷ ୧୮ହଜାର ୮୫୨, ନନ୍ଦିନୀ ଗୋଏଲଙ୍କ ନାମରେ ୨୬ ଲକ୍ଷ ୩୩ହଜାର ୮୭୨ଟଙ୍କା ବୟୋ ରହିଛି। ସେହିପରି ଟିକେଶ ବେହେରାଙ୍କ ୧୬ ଲକ୍ଷ ୨୯ହଜାର ୩୫୦, ଗୁରତେଜ ସିଂ କାବଲିଙ୍କ ୧୮ଲକ୍ଷ ୩୧ ହଜାର ୯୦୮, ଲକ୍ଷ୍ମଣ ପ୍ରଧାନଙ୍କ ୧୦ ଲକ୍ଷ ୩୮ହଜାର ୩୨୨, ହାଇଟେକ ବଟଲିଂ ଲିମିଟେଡ୍ର୧୬ ଲକ୍ଷ ୨୯ହଜାର ୧୮୪, ଅନ୍ୟ ଏକ ହାଇଟେକ୍ ବଟଲିଂ ଲିମିଟେଡର ୩୪ ଲକ୍ଷ ୫୭ ହଜାର ୬୮୩ ଟଙ୍କା ଟିକସ ବାବଦରେ ବକେୟା ରହିଛି। ହାଇଟେକ୍ ବଟଲିଂ ନାମରେ ୪ଟି ଆକାଉଣ୍ଟ ରହିଛି। ଅନ୍ୟ ଏକ ଆକାଉଣ୍ଟର ବକେୟା ଟିକସ ୯ଲକ୍ଷ ୬୯ହଜାର ୭୦୭ ଟଙ୍କା ରହିଛି। ତେବେ ଉପରୋକ୍ତ ୧୧୭ ବ୍ୟକ୍ତି ଓ ସଂସ୍ଥାଗୁଡ଼ିକ ଅସଲି କି ନକଲି ତାହା ବିଭାଗ ପକ୍ଷରୁ ଯାଞ୍ଚ କରାଯିବା ପରେ ଦୃଢ କାର୍ଯ୍ୟାନୁଷ୍ଠାନ ନିଆଯାଇପାରିବ। ଚଳିତବର୍ଷ ନକଲି ଜିଏସ୍ଟି ଆକାଉଣ୍ଟ କରି ଇନ୍ପୁଟ ଟିକସ କ୍ରେଡିଟ (ଆଇଟିସି) ହାତେଇବା ଅଭିଯୋଗରେ ଅନେକ ବ୍ୟକ୍ତିଙ୍କୁ ଗିରଫ କରାଯାଇଛି।
ଏନେଇ ସମ୍ବଲପୁର ସିଟି ଜିଏସ୍ଟି ସର୍କଲ -୨ର ଡେପୁଟି କମିଶନର ସ୍ବସ୍ତି ବଡ଼ପଣ୍ଡା କହିଛନ୍ତି, ଉକ୍ତ ବକେୟା ତାଲିକା ମଧ୍ୟରୁ କେତେଜଣ ୧୦ ପ୍ରତିଶତ ବକେୟା ଅର୍ଥ ପଇଠକରି ବିଭାଗର ଆପିଲେଟ ଅଥରିଟିଙ୍କ ଦ୍ୱାରସ୍ଥ ହୋଇଛନ୍ତି। ତେଣୁ ତାଙ୍କ ଉପରେ କିଛି କରିହେବ ନାହିଁ। ଅନ୍ୟମାନଙ୍କ ଉପରେ ବିଭାଗ ଯାହା ନିଷ୍ପତ୍ତି ନେବ। ଏଠାରେ ସୂଚନାଯୋଗ୍ୟ, ଗତ ଜୁଲାଇ ୧୬ରେ ଏନଫୋର୍ସମେଣ୍ଟ ୱିଙ୍ଗ ଜିଏସ୍ଟି ଠକେଇ ର଼୍ୟାକେଟ ଧରିବା ସହ ୨ମାଷ୍ଟରମାଇଣ୍ଡଙ୍କୁ ଗିରଫ କରିଥିଲା। ସେମାନେ ହେଲେ, ରାଉରକେଲାସ୍ଥିତ ସ୍ମାର୍ଟଏଜିସ୍ ଟ୍ରେଡ୍ ଭେଞ୍ଚର ପ୍ରାଇଭେଟ ଲିମିଟେଡ୍ର ନିର୍ଦ୍ଦେଶକ ସୁଜୟ ମୈତ୍ର ଓ ତିରୁପତି ଟ୍ରେଡର୍ସର ମ୍ୟାନେଜିଂ ପାର୍ଟନର ତଥା ସଦ୍ଗୁରୁ ମେଟାଲ୍ସ ଆଣ୍ଡ ପାୱାର ପ୍ରାଇଭେଟ ଲିମିଟେଡ୍ର ଅଧିକୃତ ପ୍ରତିନିଧି ଗୁରୁଦିତ୍ ଡାଙ୍ଗ। ବାସ୍ତବରେ ଅଭିଯୁକ୍ତଦ୍ୱୟ କୌଣସି କମ୍ପାନୀ କିମ୍ବା କାରବାର କରି ନ ଥିଲେ। ଜାଲ୍ କାଗଜପତ୍ରରେ ୧୬ଟି କମ୍ପାନୀ ଚାଲିଥିବା ଦେଖାଇ ୬୪୧ କୋଟି ଟଙ୍କାର ବିଲ୍ ମାଧ୍ୟମରେ ୧୧୫.୧୦ କୋଟି ଟଙ୍କାର ଆଇଟିସି ହାତେଇଥିଲେ। ଏହି ଠକେଇଦ୍ୱାରା ସରକାର ବିପୁଳ ରାଜସ୍ବ ହରାଇଥିଲେ।
ସେହିପରି ଗତ ସେପ୍ଟେମ୍ବର ୨ରେ ଜିଏସ୍ଟି ଏନଫୋର୍ସମେଣ୍ଟ ୱିଙ୍ଗ ମାଷ୍ଟରମାଇଣ୍ଡ ଚାର୍ଟାର୍ଡ ଆକାଉଣ୍ଟାଣ୍ଟ ଅମିତ କୁମାର ଅଗ୍ରୱାଲଙ୍କୁ ଝାରସୁଗୁଡା ଓ ଜାଲ୍ ବ୍ୟବସାୟିକ ସଂସ୍ଥାର ମୁଖ୍ୟ ସତୀନ୍ଦ୍ର କୁମାର ଯାଦବଙ୍କୁ ଭୁବନେଶ୍ୱରରୁ ଗିରଫ କରିଥିଲା। ସେମାନେ ପ୍ରାୟ ୧୮୧୯ କୋଟି ଟଙ୍କା ଜାଲ୍ ବିଲ୍ ବଳରେ ପ୍ରାୟ ୩୨୩ କୋଟି ଟଙ୍କାର ଇନପୁଟ ଟିକସ ହଡ଼ପ କରିଥିଲେ।
ସୁଶାନ୍ତ ସାହୁ