ପେଶ୍ୱାର,୧୪।୭: ପାକିସ୍ତାନର ଖାଇବର ପାଖତୁନଖ୍ବା ପ୍ରଦେଶରେ ବୁଧବାର ଏକ ବସରେ ଘଟିଥିବା ବୋମା ବିସ୍ଫୋରଣରେ ୧୨ ଜଣଙ୍କ ମୃତ୍ୟୁ ଘଟିଛି। ମୃତକଙ୍କ ମଧ୍ୟରେ ଥିଲେ ଚାଇନାର ୯ ଜଣ ଇଞ୍ଜିନିୟର। ତେବେ ଏହି ବିସ୍ଫୋରଣ ଘଟଣାକୁ ନେଇ ମୁହଁାମୁହିଁ ହୋଇଛନ୍ତି ଦୁଇ ପଡ଼ୋଶୀ ଦେଶ ଚାଇନା ଓ ପାକିସ୍ତାନ।
ଏହି ଘଟଣାକୁ ଆତଙ୍କବାଦୀ ଆକ୍ରମଣ ବୋଲି ବେଜିଂ ପକ୍ଷରୁ କୁହାଯାଇଛି। ଚାଇନାର ବୈଦେଶିକ ମନ୍ତ୍ରଣାଳୟ ପ୍ରବକ୍ତା ଝାଓ ଲିଜିଆନ ଘଟଣାର ନିନ୍ଦା କରିବା ସହ ବୋମା ବିସ୍ଫୋରଣ ପାଇଁ ଦାୟୀ ବ୍ୟକ୍ତିଙ୍କ ଉପରେ କଡ଼ା କାର୍ଯ୍ୟାନୁଷ୍ଠାନ ଦାବି କରିଛନ୍ତି। ଏଥିସହିତ ହାଇଡ୍ରୋପାଓ୍ବର ଡ୍ୟାମ ନିର୍ମାଣ କାର୍ଯ୍ୟରେ ଜଡ଼ିତ ଚାଇନା ଅଧିକାରୀଙ୍କୁ କଡ଼ା ସୁରକ୍ଷା ଦେବାକୁ ଇସଲାମାବାଦକୁ କହିଛନ୍ତି।
କିନ୍ତୁ ପାକିସ୍ତାନର ବୈଦେଶିକ ମନ୍ତ୍ରଣାଳୟ ପକ୍ଷରୁ ଜାରି କରାଯାଇଥିବା ବିଜ୍ଞପ୍ତିରେ କୁହାଯାଇଛି, ଯାନ୍ତ୍ରିକ ତ୍ରୁଟି କାରଣରୁ ବସଟି ଏକ ନଦୀରେ ପଶିଯାଇଥିଲା। ଫଳରେ ଗ୍ୟାସ ଲିକ୍ ହେବା ସହ ବିସ୍ଫୋରଣ ଘଟିଥିଲା। ଘଟଣାର ଅଧିକ ତଦନ୍ତ ଚାଲିଛି।
ଉଲ୍ଲେଖଯୋଗ୍ୟ, ପାକିସ୍ତାନର ଖାଇବର ପାଖତୁନଖ୍ବା ପ୍ରଦେଶରେ ଚାଲିଥିବା ହାଇଡ୍ରୋପାଓ୍ବର ଡ୍ୟାମ ନିର୍ମାଣ କାର୍ଯ୍ୟରେ ମୁତୟନ ଥିବା ୪୦ ଚାଇନିଜ ଇଞ୍ଜିନିୟର, ସର୍ଭେୟର ଓ ମେକାନିକାଲ ଷ୍ଟାଫଙ୍କୁ ନେଇ ଯାଉଥିବା ବସରେ ସକାଳ ୭ଟାରେ ବିସ୍ଫୋରଣ ଘଟିଥିଲା। ଏହି ଘଟଣାରେ ୯ ଚାଇନିଜ ଇଞ୍ଜିନିୟର ଓ ୩ ପାକିସ୍ତାନୀ ନାଗରିକଙ୍କ ମୃତ୍ୟୁ ଘଟିଥିବା କୁହାଯାଇଛି।