ଅସ୍ତରଙ୍ଗ,୨୭।୮(ପ୍ରଦୀପ୍ତ କୁମାର ଦୀକ୍ଷିତ): ପୁରୀ ଜିଲା ଅସ୍ତରଙ୍ଗର ନୂଆଗଡ଼ ଜେଟି ନିକଟରୁ ଚାରିଦିନ ତଳେ ମା’ କାଳୀ ଏବଂ ମା’ ପାର୍ବତୀ ନାମକ ଦୁଇଟି ବୋଟ ସମୁଦ୍ରକୁ ମାଛ ଧରିବାକୁ ଯାଇଥିଲା। ଶନିବାର ସକାଳେ ମା’ କାଳୀ ବୋଟ୍ ଦେବୀନଦୀ ମୁହାଣ ଠାରୁ ୩ କିମି ଏବଂ ମା’ ପାର୍ବତୀ ବୋଟ ୨କିମି ଦୂରରେ ଥିବାବେଳେ ହଠାତ ବୋଟ୍ଦ୍ୱୟର ଇଞ୍ଜିନ (ଗିଅର ବକ୍ସ) ଭାଙ୍ଗିଯାଇଥିଲା। ଫଳରେ ଉଭୟ ବୋଟ୍ ସମୁଦ୍ରରେ ଫସିରହିଛି। ୪୮ ଘଣ୍ଟା ପରେ ବି ବୋଟ୍ ଦୁଇଟିରେ ଥିବା ମୋଟ ୧୨ଜଣ ମତ୍ସ୍ୟଜୀବୀଙ୍କୁ ଉଦ୍ଧାର କରାଯାଇପାରିନାହିଁ। ସେମାନଙ୍କୁ ଉଦ୍ଧାର କରିବାକୁ ଏକ ଟ୍ରଲର ଯାଇଥିଲେ ମଧ୍ୟ ସମୁଦ୍ର ଅଶାନ୍ତ ଥିବାରୁ ନିରାଶରେ ଫେରିଆସିଛି। ଏହି ଘଟଣା ସମ୍ପୃକ୍ତ ମତ୍ସ୍ୟଜୀବୀଙ୍କ ପରିବାରର ଚିନ୍ତା ବଢାଇଥିବାବେଳେ ପ୍ରଶାସନର ପରବର୍ତ୍ତୀ ପଦକ୍ଷେପକୁ ଅପେକ୍ଷା ରହିଛି।
ମା’ ପାର୍ବତୀ ବୋଟରେ ବସନ୍ତ ନାୟକ, ଅଜୟ ମହାନ୍ତି, ରମେଶ ମହାନ୍ତି, ବୁଦ୍ଧେଶ୍ୱର ଦଳାଇ, ପ୍ରଭାସ ଚନ୍ଦ୍ର ସିଲ୍, ଶିବ ପରିଡା ରହିଥିବାବେଳେ ମା’ କାଳୀ ବୋଟରେ ଥିବା ୬କର୍ମଚାରୀଙ୍କ ନାମ ମିଳିପାରିନାହିଁ। ଦେବୀ ମୁହାଣଠାରୁ ୨ରୁ ୩ କିଲୋମିଟର ଦୂରରେ ଦୁଇଟି ବୋଟ ଥିବାବେଳେ ସେମାନେ ଆବଶ୍ୟକ ମୁତାବକ ନେଇଥିବା ଖାଦ୍ୟ ସାମଗ୍ରୀ ଖାଉଛନ୍ତି ବୋଲି ମା’ ପାର୍ବତୀ ବୋଟ୍ର ଡ୍ରାଇଭର ବସନ୍ତ ନାୟକ କହିଛନ୍ତି। ମତ୍ସ୍ୟଜୀବୀଙ୍କ ସୁରକ୍ଷାକୁ ଦୃଷ୍ଟିରେ ରଖି ୨୦୧୪ ମସିହାରେ ସରକାରଙ୍କ ଦ୍ୱାରା ନୂଆଗଡ଼ ସାମୁଦ୍ରିକ ଥାନା ସ୍ଥାପିତ ହୋଇଥିଲା। ତେବେ ଦେବୀ ମୁହାଣ ମଧ୍ୟରେ ଫସିରହିଥିବା ଦୁଇଟି ବୋଟ ସମେତ ୧୨ଜଣ କର୍ମଚାରୀଙ୍କୁ ନୂଆଗଡ଼ ସାମୁଦ୍ରିକ ଥାନା ପୋଲିସ ଉଦ୍ଧାର କରିପାରିନାହିଁ। ନୂଆଗଡ଼ ସାମୁଦ୍ରିକ ଥାନାର ମୁଖ୍ୟ ସମସ୍ୟା ହେଉଛି, ୨୦୦୮ ମସିହାର ସ୍ପିଡ୍ ବୋଟ ଯାହାର କ୍ଷମତା ୧୨ଟନ ବିଶିଷ୍ଟ, ତାହା କାମରେ ଲାଗୁନାହିଁ। ଦେବୀ ନଦୀ ମୁହାଣର ଅଶାନ୍ତ ସମୁଦ୍ରକୁ ଯାଇ ଉଦ୍ଧାର କରିପାରି ନାହିଁ। ଜୀବନ ସହ ସଂଗ୍ରାମ କରି ଦୀର୍ଘ ୪୮ଘଣ୍ଟାରୁ ଊର୍ଦ୍ଧ୍ୱ ହେଲା। ଦେବୀ ମୁହାଣ ମଧ୍ୟରେ ୨ଟି ବୋଟ ରହିଛି। ଏଥିସହ ସମୁଦ୍ରରେ ଫସିଥିବା ମା’ ପାର୍ବତୀ ବୋଟ୍ର ଡ୍ରାଇଭର ଏବଂ ଅନ୍ୟ କର୍ମଚାରୀଙ୍କ ସହିତ ସୁବିଧା ଅସୁବିଧା ସମ୍ପର୍କରେ ଅସ୍ତରଙ୍ଗ ତହସିଲଦାର ପ୍ରିୟଙ୍କା ପ୍ରିୟଦର୍ଶିନୀ ପତି କଥା ହୋଇଛନ୍ତି। ସୋମବାର ସକାଳୁ ଅସ୍ତରଙ୍ଗ ସହମତ୍ସ୍ୟ ଅଧିକାରୀ ସତ୍ୟବ୍ରତ ଦାଶ ସମ୍ପୃକ୍ତ ମତ୍ସ୍ୟଜୀବୀମାନଙ୍କୁ ଉଦ୍ଧାର କରିବା ପାଇଁ ନୂଆଗଡ଼ ଜେଟିଠାରୁ ମା’ ମଙ୍ଗଳା ଏବଂ ମା’ ଜାଡୁଆଣୀ ନାମକ ଅନ୍ୟ ଦୁଇଟି ବୋଟ୍ ସହ ୨୦ରୁ ଊର୍ଦ୍ଧ୍ୱ ମତ୍ସ୍ୟଜୀବୀଙ୍କୁ ନେଇ ଦେବୀ ନଦୀ ମୁହାଣକୁ ଯାଇଥିଲେ। କିନ୍ତୁ ବଙ୍ଗୋପସାଗରରେ ସୃଷ୍ଟ ଲଘୁଚାପ ଯୋଗୁ ସମୁଦ୍ର ଅଶାନ୍ତ ଥିବାରୁ ସେହି ବୋଟ ଦୁଇଟି ପାଖକୁ ଯାଇପାରିଲେ ନାହିଁ ବୋଲି ସହମତ୍ସ୍ୟ ଅଧିକାରୀ ଦାଶ କହିଛନ୍ତି। ଅପରାହ୍ନରେ ଅସ୍ତରଙ୍ଗ ମତ୍ସ୍ୟବିଭାଗ ପକ୍ଷରୁ ଲାଇଫ ଜ୍ୟାକେଟ ସହ ଏକ ଟ୍ରଲର ବୋଟ୍ ପଠାଯାଇଛି। ଅନ୍ୟପଟେ ଉକ୍ତ ବୋଟ୍ ଦ୍ୱୟକୁ ଉଦ୍ଧାର କରିବା ପାଇଁ ନୂଆଗଡ଼ ସାମୁଦ୍ରିକ ଥାନା ପକ୍ଷରୁ ପାରାଦୀପ କୋଷ୍ଟଗାର୍ଡଙ୍କ ସହାୟତା ଲୋଡ଼ାଯାଇଛି।