ଲକ୍ଷ୍ମୀପୁର,୪ା୩(ଅନନ୍ତ ନାୟକ): କୋରାପୁଟ ଜିଲା ଲକ୍ଷ୍ମୀପୁର ବ୍ଲକକୁ ସବ୍ଡିଭିଜନ ଦାବିରେ ଲକ୍ଷ୍ମୀପୁର ବିକାଶ ପରିଷଦ ପକ୍ଷରୁ ସୋମବାର ୧୨ ଘଣ୍ଟିଆ ବନ୍ଦ ପାଳନ କରାଯାଇଥିଲା। ସକାଳ ୬ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଉକ୍ତ ଅଞ୍ଚଳରେ ଗାଡ଼ିମୋଟର ଚଳାଚଳ ଓ ଦୋକାନ ବଜାର ସମ୍ପୂର୍ଣ୍ଣ ବନ୍ଦ ରହିଥିଲା। ବିକାଶ ପରିଷଦ କର୍ମକର୍ତ୍ତାମାନେ ୩୨୬ ନମ୍ବର ଜାତୀୟ ରାଜପଥରେ ଟାୟାର ଜାଳି, ରାସ୍ତା ଅବରୋଧ କରି ବନ୍ଦ ପାଳନ କରିଥିଲେ। ଫଳରେ ଜାତୀୟ ରାପଥର ଉଭୟ ପାର୍ଶ୍ୱରେ ଗାଡ଼ିମୋଟର ଚଳାଚଳ କରି ନ ପାରି ଅଟକି ରହିଥିଲା।
ଦୀର୍ଘ ବର୍ଷ ହେଲା ନାରାୟଣପାଟଣା, ଦଶମନ୍ତପୁର, ବନ୍ଧୁଗାଁ ଓ ଲକ୍ଷ୍ମୀପୁର ୪ ବ୍ଲକକୁ ନେଇ ଲକ୍ଷ୍ମୀପୁରକୁ ସବ୍ଡିଭିଜନ ପାଇଁ ଦାବି ହୋଇଆସୁଛି। ୨୦୧୮ରେ କୈଳାସ ଚନ୍ଦ୍ର କୁଲେସିକା ବିଧାୟକ ଥିବାବେଳେ ମଧ୍ୟ ଲକ୍ଷ୍ମୀପୁରକୁ ସବ୍ଡିଭିଜନ ପାଇଁ ଦାବି କରିଥିଲେ। ସରକାର ଏହାକୁ ବିଚାରକୁ ନେଇ ଦାବିପୂରଣ ଦିଗରେ ପଦକ୍ଷେପ ନେବେ ବୋଲି ସେତେବେଳେ ପ୍ରତିଶ୍ରୁତି ଦେଇଥିଲେ।
୫ ବର୍ଷ ପରେ ମଧ୍ୟ ଏହି ଦାବି ପୂରଣ ହୋଇନାହିଁ। ବିକାଶ ପରିଷଦ କର୍ମକର୍ତ୍ତା ଏହି ଦାବିକୁ ଦୋହରାଇ ଲକ୍ଷ୍ମୀପୁର ବନ୍ଦ ସହ ଧାରଣା ଦେଇଥିଲେ। ଧାରଣା ସ୍ଥଳରେ ବିଡିଓ ଗୁରେଶ୍ୱର ଭୋଇ, ତହସିଲଦାର ନୈବେଦ୍ୟ ଭୋଇ, ଏସ୍ଡିପିଓ ବିରଞ୍ଚତ୍ ନାରାୟଣ ଜଗତ ଓ ଆଇଆଇସି ସୁଜ୍ଞାନୀ ସାହୁ ପହଞ୍ଚି ଲୋକଙ୍କ ସହ ଆଲୋଚନା କରିଥିଲେ। ଲୋକମାନେ ଜିଲା ପ୍ରଶାସନ ଘଟଣାସ୍ଥଳକୁ ଆସି ଆଲୋଚନା କରିବାକୁ ଦାବି କରିଥିଲେ।
ଆଲୋଚନାରୁ କିଛି ସୁଫଳ ନ ମିଳିବାରୁ ଶେଷରେ ବିକାଶ ପରିଷଦ ସଦସ୍ୟ ଅମରେଶ ଶତପଥୀ, ମନୋଜ ସାହୁ, ଉମାଶଙ୍କର କର୍କରା ଓ ପ୍ରଶାସନିକ ଅଧିକାରୀ ମିଳିତ ଭାବେ ଜିଲା ପ୍ରଶାସନିକ ଅଧିକାରୀଙ୍କ ନିକଟକୁ ଆଲୋଚନା ପାଇଁ କୋରାପୁଟ ଯାଇଥିଲେ। ସେଠାରେ ସେମାନେ ଜିଲାପାଳଙ୍କ ସହିତ ଆଲୋଚନା କରିଥିଲେ। ଆଲୋଚନା ବେଳେ ଲକ୍ଷ୍ମୀପୁର ସବ୍ଡିଭିଜନ ପାଇଁ ତ୍ୱରିତ ପଦକ୍ଷେପ ନେବାକୁ ସରକାରଙ୍କ ଦୃଷ୍ଟିକୁ ଅଣାଯିବ ବୋଲି ଜିଲାପାଳ ଭି.କୀର୍ତ୍ତିଭାସନ ପ୍ରତିଶ୍ରୁତି ଦେବା ପରେ ରାସ୍ତାରୋକୋ ପ୍ରତ୍ୟାହୃତ ହୋଇଥିଲା। ବନ୍ଦରେ ବନ୍ଧୁଗାଁ ବ୍ଲକ ଉପାଧ୍ୟକ୍ଷା ଗୀତାଞ୍ଜଳି ପିଡ଼ିକା ଓ ଦଶମନ୍ତପୁର ବ୍ଲକ ପୂର୍ବତନ ଅଧ୍ୟକ୍ଷ ରାଜେନ୍ଦ୍ର ହୁଇକା ସହଯୋଗ କରିଥିଲେ।