ବେଙ୍ଗାଲୁରୁ,୨୨।୮ : ୨୦୨୪ ଲୋକସଭା ନିର୍ବାଚନକୁ ଦୃଷ୍ଟିରେ ରଖି କର୍ନାଟକ କଂଗ୍ରେସ ଜନତା ଦଳ (ଧର୍ମନିରପେକ୍ଷ) ର ଅନେକ ବିଧାୟକଙ୍କ ସହ ଯୋଗାଯୋଗରେ ଅଛି ଏବଂ ସେମାନଙ୍କୁ ଦଳକୁ ଆଣିବାକୁ ଯୋଜନା କରୁଛି। ଏକ ରିପୋର୍ଟ ଅନୁଯାୟୀ, ଅଯୋଗ୍ୟତା ଅବା ଉପନିର୍ବାଚନରୁ ରକ୍ଷା ପାଇବା ପାଇଁ କଂଗ୍ରେସ ଦଳ ଆନୁଷ୍ଠାନିକ ଭାବେ ସମର୍ଥନ ପାଇବା ପାଇଁ ୧୨ ଜେଡିଏସ ବିଧାୟକଙ୍କୁ ବାଡ଼ ଡିଆଁଇବା ଉଦ୍ୟମ କରୁଛି। କୁହାଯାଉଛି ପୁରୁଣା ମହୀଶୁର ଅଞ୍ଚଳରେ ନିଜ ଭୋଟ ବ୍ୟାଙ୍କକୁ ଅଧିକ ସୁଦୃଢ଼ କରିବା ଲକ୍ଷ୍ୟରେ କଂଗ୍ରେସ ଅଧିକାଂଶ ଜେଡିଏସ ବିଧାୟକଙ୍କ ସହ ଗୁପ୍ତ ଯୋଗାଯୋଗରେ ଅଛି।
ରିପୋର୍ଟ ଅନୁଯାୟୀ, ଦୁଇ ରାଉଣ୍ଡ ବୈଠକ ହୋଇସାରିଛି ଏବଂ ହାଇ କମାଣ୍ଡର ଅନୁମୋଦନ ପରେ ଚୂଡ଼ାନ୍ତ ନିଷ୍ପତ୍ତି ନିଆଯାଇପାରେ। ପୁରୁଣା ମହୀଶୁର ନିର୍ବାଚନମଣ୍ଡଳୀରୁ ଜଣେ ବରିଷ୍ଠ ଜେଡିଏସ ବିଧାୟକ କଂଗ୍ରେସ ନେତାଙ୍କ ସହ ଯୋଗାଯୋଗ କରୁଥିବା କୁହାଯାଉଛି ଏବଂ ଯଦି ଯୋଜନା ଠିକଠାକ ଅନୁଯାୟୀ ଚାଲିଯାଏ ତେବେ ଜେଡିଏସ ବିଧାୟକଙ୍କ ଏକ ବଡ଼ ଦଳ କଂଗ୍ରେସରେ ଯୋଗଦେବେ। ତେବେ କଂଗ୍ରେସ ନେତା ତାଙ୍କ ଆଭିମୁଖ୍ୟରେ ସତର୍କ ଥିବା କୁହାଯାଉଛି ଏବଂ ଏ ବାବଦରେ ଚୂଡ଼ାନ୍ତ ନିଷ୍ପତ୍ତି ନେବା ପୂର୍ବରୁ କାହା ସହ ଆଲୋଚନା ନ କରିବାକୁ ନିର୍ଦ୍ଦେଶ ଦେଇଛନ୍ତି।
ଏହି ଚର୍ଚ୍ଚା ନେଇ ପୂର୍ବତନ ସିଏମ ଜେଡିଏସ ନେତା ଏଚଡି କୁମାରସ୍ବାମୀ କହିଛନ୍ତି କୌଣସି ଜେଡିଏସ ସଦସ୍ୟ କଂଗ୍ରେସରେ ଯୋଗଦେବେ ନାହିଁ। ’କଂଗ୍ରେସ ଭାଜପା ଏବଂ ଜେଡିଏସ କର୍ମୀଙ୍କୁ ଧମକ ଦେଉଛି ଏବଂ ସେମାନଙ୍କୁ ନିଜ ପଟକୁ ନେବାକୁ ଚେଷ୍ଟା କରୁଛି। ମୋ ଜ୍ଞାନ ଅନୁଯାୟୀ, କୌଣସି ବିଧାୟକ ଆମ ଦଳ ଛାଡିବେ ନାହିଁ। ନିଜର ବିଫଳତାକୁ ଲୁଚାଇବା ପାଇଁ କଂଗ୍ରେସ ଏଭଳି କାହାଣୀ ପ୍ରଚାର କରୁଛି। ସେମାନଙ୍କର ବିଫଳତା ଯୋଗୁ ପ୍ରାୟ ୨୦-୩୦ କଂଗ୍ରେସ ବିଧାୟକ କଂଗ୍ରେସ ଛାଡିବାକୁ ପ୍ରସ୍ତୁତ ହେଉଛନ୍ତି। ଏହାକୁ ଲୁଚାଇବା ପାଇଁ ସାଧାରଣ ଲୋକଙ୍କୁ ଭ୍ରମିତ କରିବା ଲାଗି ଏଭଳି କାର୍ଯ୍ୟ କରାଯାଉଛି।
ଭାଜପା ବିଧାୟକ ଏସ.ଟି ସୋମଶେଖର କଂଗ୍ରେସରେ ଯୋଗ ଦେଇପାରନ୍ତି ବୋଲି କଳ୍ପନାଜଳ୍ପନା ମଧ୍ୟରେ କୁମାରସ୍ବାମୀ ଯଶୱନ୍ତପୁର ନିର୍ବାଚନମଣ୍ଡଳୀରେ ଦଳର କର୍ମୀଙ୍କ ସହ ଏକ ବୈଠକ କରି ସେମାନଙ୍କୁ ଉପନିର୍ବାଚନ ପାଇଁ ପ୍ରସ୍ତୁତ ହେବାକୁ ପରାମର୍ଶ ଦେଇଛନ୍ତି।