ମାଲକାନଗିରି,୨୨ା୫(ଦୁର୍ଯ୍ୟୋଧନ ପାତ୍ର): ଛତିଶଗଡ଼ ସୁକ୍ମା ଜିଲାରେ ଡିଆର୍ଜି ବାହିନୀ ଓ ୨୦୪, ୨୦୬, ୨୦୮ କୋବ୍ରା ବାହିନୀ ମିଳିତ ଭାବେ ଦୁଲେଡ, ବେଝେତୋଙ୍ଗ, ରାସାପଲ୍ଲୀ, ପିନାରନ୍ଦା, ଇରାପଲୀ, ମେଟାମୁଡେମ ଓ ଆଖପାଖ ଅଞ୍ଚଳରେ ସର୍ଚ୍ଚ ଅପରେଶନକରି ୧୦ଜଣ ମାଓବାଦୀଙ୍କୁ ଗିରଫ କରିଛନ୍ତି। ସେହିପରି ଦାନ୍ତଓ୍ବୋଡା ଜିଲା ଅରନପୁର ଥାନା ଅଞ୍ଚଳରୁ ୨ ଜଣ ମାଓବାଦୀଙ୍କ ମଧ୍ୟ ଗିରଫ କରାଯାଇଛିି।
ଏମାନଙ୍କୁ ଦୁଲେଡ୍ ଗ୍ରାମ ନିକଟ ଜଙ୍ଗଲରୁ ଗିରଫ କରାଯାଇଛି। ଏମାନେ ହେଲେ ୧ ଲକ୍ଷ ପୁରସ୍କାର ଘୋଷିତ ମାଓବାଦୀ ମାଡବୀ ବୁସ୍କାଙ୍କ ସହ ମାଡବୀ ଜଗା, ପଦାମ ଜୋଗା, ସୋଡି ଗଙ୍ଗା, ମାଡବି ହୁଙ୍ଗା, ସୋଡି ମୁଡା, ମଡକମ ଦେବା, ମଡକମ ହିଙ୍ଗା, ବେଟି ହୁଙ୍ଗା ଓ ମଡକମ ନନ୍ଦା। ଏମାନେ ଡିଏକେଏମ୍ଏସ୍, ଏର୍ନାପାଲ୍ଲୀ ଆର୍ପିସ୍ି ମିଲିସିଆ ସଦସ୍ୟ, ବୋଟେତୋଙ୍ଗଡ ଏକେଏମ୍ଏସ୍ ସଦସ୍ୟ ଭାବେ କାର୍ଯ୍ୟ କରୁଥିଲେ। ତଦନ୍ତ କରିବାରୁ ମାଡବି ଜଗା, ମାଡବି ବୁସ୍କା, ପଦାମ ଜଗା, ସୋଡି ଗଙ୍ଗା, ମାଡବି ହୁଙ୍ଗା ଚନ୍ତାଗୁଫା ଅଞ୍ଚଳରେ ୨୦୨୩ ଡିସେମ୍ବରରେ ମିନପା ଗ୍ରାମକୁ ଯାଉଥିବା ସମୟରେ ଜଣେ ଗ୍ରାମବାସୀଙ୍କୁ ଅପହରଣକରି ହତ୍ୟା କରିଥିବା ରେକର୍ଡ ରହିଛି। ଏମାନଙ୍କୁ ବୁଧବାର କୋର୍ଟ ଚାଲାଣ କରାଯାଇଛି।
ସେହିପରି ଦାନ୍ତଓ୍ବୋଡା ଜିଲା ଅରନପୁର ଥାନା ଅଞ୍ଚଳ ନିଲାବାୟା, କେଶାପାରା ଓ ପୋଟାଲି ଗ୍ରାମରେ ସିଆର୍ପିଏଫ୍ ୧୧୧ ବାହିନୀ ସର୍ଚ୍ଚ ଅପରେଶନ କରୁଥିବା ସମୟରେ ପୋଟାଲୀ ଗ୍ରାମରୁ ୨ ଜଣ ମାଓବାଦୀଙ୍କୁ ଗିରଫ କରିଛି। ଏହି ୨ଜଣଙ୍କ ମଧ୍ୟରୁ ଜଣେ ହୁଙ୍ଗା ଓରଫ ଗଟମୁ ସୋଡି ଓ ଅନ୍ୟ ଜଣେ ଜଗା କୁଡାମୀ ବୋଲି ଜଣାପଡ଼ିଛି। ଏମାନେ ପୋରଦେମ ମିଲିସିଆ ସଦସ୍ୟ ଭାବେ କାର୍ଯ୍ୟ କରୁଥିବା ପୋଲିସ ସୂତ୍ରରୁ ସୂଚନା ମିଳିଛି। ଏଥିସହ ଏହି ୨ଜଣଙ୍କ ନିକଟରୁ ଗୋଟିଏ ଟିଫିନ ବୋମା, ଦୁଇଟି ଡିଟୋନେଟର, ତାର ଓ ମାଓବାଦୀ ପୋଷ୍ଟର ଇତ୍ୟାଦି ଜବତ କରାଯାଇଛି। ଏହି ଦୁଇଜଣଙ୍କ ନାମରେ ବିଭିନ୍ନ ଥାନାରେ ଭିନ୍ନ ଭିନ୍ନ ଘଟଣାରେ କେସ୍ ରେକର୍ଡ ହୋଇଛି। ବୁଧବାର ସେମାନଙ୍କୁ କୋର୍ଟ ଚାଲାଣ କରାଯାଇଥିବା ପୋଲିସ ସୂତ୍ରରୁ ପ୍ରକାଶ ା