ବ୍ରହ୍ମପୁର ଅଫିସ,୧୨ା୧୨: ବ୍ରହ୍ମପୁର ମହାନଗର ନିଗମ (ବିଇଏମସି) ମେୟର ସଂଘମିତ୍ରା ଦଳେଇଙ୍କ ନେତୃତ୍ୱରେ ଡେପୁଟି ମେୟର ଇ. ବିବେକ ରେଡ୍ଡୀଙ୍କ ସମେତ ବିଭିନ୍ନ ଦଳର ୧୦ ଜଣ କର୍ପୋରେଟର ଆସନ୍ତା ୧୬ ତାରିଖରେ କେରଳ ରାଜଧାନୀ ଥିରୁଭାନନ୍ତପୁରମ ଯିବେ। ସେଠାରେ ୧୭ରୁ ୧୯ ତାରିଖ ପର୍ଯ୍ୟନ୍ତ ରହି କେରଳ ସରକାରଙ୍କ ବିଭିନ୍ନ ବିକାଶମୂଳକ ଯୋଜନା ପରିଦର୍ଶନ କରି ୨୦ ତାରିଖରେ ଫେରିବେ। ମେୟରଙ୍କ ସୂଚନାନୁସାରେ ଥିରୁଭାନନ୍ତପୁରମ ମ୍ୟୁନିସିପାଲ କର୍ପୋରେଶନରେ କାର୍ଯ୍ୟକାରୀ ହେଉଥିବା କଠିନ ବର୍ଜ୍ୟବସ୍ତୁ ପରିଚାଳନା, ସ୍ବଚ୍ଛ ଭାରତ କାର୍ଯ୍ୟକ୍ରମ, ରାସ୍ତାଘାଟ ଓ ଡ୍ରେନ ନିର୍ମାଣ କାର୍ଯ୍ୟ ଆଦି ବିଇଏମ୍ସି ଟିମ୍ ଅନୁଧ୍ୟାନ କରିବେ।
ଓଡ଼ିଶା ନଗର ଉନ୍ନୟନ ବିଭାଗର ଅନୁମୋଦନକ୍ରମେ କେରଳ ଯାଉଥିବା ଟିମରେ ବିଜେଡି କର୍ପୋରେଟର ସୁରେନ୍ଦ୍ର କୁମାର ମହାରଣା, ଶ୍ୱେତାରେଖା ତ୍ରିପାଠୀ, ସୋନାଲି ଗନ୍ତାୟତ, ତିରୁପତି ପାତ୍ର, ସମୀର କୁମାର ମିଶ୍ର, ମଳୟ କୁମାର ବିଶୋୟୀ, ସୂର୍ଯ୍ୟକାନ୍ତ ସୁବୁଦ୍ଧି ଓ ଆଇ. ଶ୍ରୀନିବାସ ରାଓ ଅଛନ୍ତି। ଅନ୍ୟମାନଙ୍କ ମଧ୍ୟରେ ଭାଜପା କର୍ପୋରେଟର ପ୍ରଦୀପ କୁମାର ଶତପଥୀ ଓ ସ୍ବାଧୀନ କର୍ପୋରେଟର ପ୍ରଶାନ୍ତ କୁମାର ପଟ୍ଟନାୟକଙ୍କ ନାମ ମଧ୍ୟ ରହିଛି। ତେବେ ନିଗମକୁ ନିର୍ବାଚିତ ଏକମାତ୍ର କଂଗ୍ରେସ ମହିଳା କର୍ପୋରେଟରଙ୍କ ନାମ ନଥିବା ରାଜନୈତିକ ଚର୍ଚ୍ଚାକୁ ଆସିଯାଇଛି। ନିଗମ ସୂତ୍ରରୁ ମିଳିଥିବା ଖବର ଅନୁସାରେ ମେୟର, ଡେପୁଟି ମେୟର ଓ ୧୦ କର୍ପୋରେଟରଙ୍କ ଯିବା ଆସିବା ବିମାନ ଟିକେଟ ବିଇଏମସି ପକ୍ଷରୁ ବହନ କରାଯିବ। ଥିରୁଭାନନ୍ତପୁରମରେ ରହଣି ଓ ଅନ୍ୟାନ୍ୟ ଖର୍ଚ୍ଚ କେରଳ ସରକାରଙ୍କ ମ୍ୟୁନିସିପାଲ କର୍ପୋରେସନ ବ୍ୟୟ କରିବ। ଟିମ୍ ସେଠାର ସହରାଞ୍ଚଳ ଉନ୍ନୟନ ଯୋଜନାଗୁଡ଼ିକ ଅନୁଧ୍ୟାନ କର ଆସିବା ପରେ ରେଶମ ସହରରେ ସେହି ଢ଼ାଞ୍ଚାରେ କାର୍ଯ୍ୟକାରୀ ଲାଗି ପଦକ୍ଷେପ ନିଆଯିବ ବୋଲି କୁହାଯାଇଛି।
