ରାୟଗଡ଼ା,୨୦ା୮(ଆଶିଷ ରଞ୍ଜନ ପଣ୍ଡା)ଜାଲ୍ ସାର୍ଟିଫିକେଟ ଦେଇ ଚାକିରି କରିବା ମହଙ୍ଗା ପଡ଼ିଛି। ରାୟଗଡ଼ା ଜିଲା ଶିକ୍ଷା ବିଭାଗ ପକ୍ଷରୁ ୧୨ ଶିକ୍ଷୟିତ୍ରୀ ଶିକ୍ଷକଙ୍କୁ ଶନିବାର ଚାକିରିରୁ ବହିଷ୍କୃତ କରାଯାଇଥିବା ଜିଲା ଶିକ୍ଷାଧିକାରୀ ପୂର୍ଣ୍ଣଚନ୍ଦ୍ର ବରିହା ସୂଚନା ଦେଇଛନ୍ତ। ସେମାନଙ୍କ ମଧ୍ୟରୁ ୭ଜଣ ଜାଲ୍ ବି.ଏଡ୍. ସାର୍ଟିଫିକେଟ ଦେଇଥିବା ବେଳେ ଜଣେ ସି.ଟି., ଦୁଇ ଜଣ ଯୁକ୍ତ୨ ଓ ଜଣେ ଯୁକ୍ତ୩ ସାର୍ଟିଫିକେଟ ଦେଇ ଚାକିରି କରିଥିବା ତଦନ୍ତରୁ ଜଣାପଡ଼ିଛି।
ଜାଲ୍ ବି.ଏଡ୍. ସାର୍ଟିଫିକେଟ ଦେଇଥିବା ଶିକ୍ଷୟିତ୍ରୀ ଶିକ୍ଷକମାନେ ହେଲେ ଚନ୍ଦ୍ରପୁର ବ୍ଲକର ଗଣେଶ ଚନ୍ଦ୍ର ବିଷୋୟୀ, ପାର୍ଥେନ୍ଦୁ ବାରିକ, କାଶୀପୁର ବ୍ଲକର ଲୋକନାଥ ମହାପାତ୍ର ଏବଂ ମୁନିଗୁଡା ବ୍ଲକର ସୁମିତ୍ରା ଡାକୁଆ, ଶ୍ରୀକାନ୍ତ କୁମାର ଦାସ, ପୂର୍ଣ୍ଣଚନ୍ଦ୍ର ଶବର, କୋଲନରା ବ୍ଲକର ହରେଶ କୁମାର ପଣ୍ଡୁ। ଜାଲ୍ ସି.ଟି. ସାର୍ଟିଫିକେଟ ଦେଇ କାଶୀପୁର ବ୍ଲକରେ ନିଯୁକ୍ତି ପାଇଥିବା ପଞ୍ଜାବ ମାଝିଙ୍କୁ ମଧ୍ୟ ଚାକିରିରୁ ବହିଷ୍କାର କରାଯାଇଛି। ଅନ୍ୟ ଜଣେ ରାଜ୍ୟ ବାହାର ବିଶ୍ୱବିଦ୍ୟାଳୟର ଜାଲ୍ ସାର୍ଟିଫିକେଟ ଦେଇ ଶିକ୍ଷା ସହାୟକ ଚାକିରି କରୁଥିବା ଜଣାପଡ଼ିଛି। କେବଳ ରାଜ୍ୟ ବାହାର ସାର୍ଟିଫିକେଟ ନୁହେଁ, ଓଡ଼ିଶା ବିଏସ୍ଇ ଏବଂ ସିଏଚ୍ଏସ୍ଇ ସାର୍ଟିଫିକେଟ ମଧ୍ୟ ଜାଲ୍ ବୋଲି ରିପୋର୍ଟ ହସ୍ତଗତ ହୋଇଛି। ସେହିପରି ରାୟଗଡ଼ା ବ୍ଲକର ଚନ୍ଦନ କୁମାର ବେହେରା ଜାଲ୍ ଯୁକ୍ତ ୩ ସାର୍ଟିଫିକେଟ ଦାଖଲ କରିଥିବା ବେଳେ କାଶୀପୁର ବ୍ଲକର ଶମ୍ଭୁ କହଁର ଓ ରଘୁନାଥ ବିଡିକା ଜାଲ୍ ଯୁକ୍ତ ୨ ସାର୍ଟିଫିକେଟ ଦାଖଲକରି ଚାକିରି ପାଇଥିଲେ। ଭୁବନେଶ୍ୱରସ୍ଥିତ ରାଜ୍ୟ ସରକାରଙ୍କ ସିଏଚ୍ଏସ୍ଏଇ ବୋର୍ଡ ପ୍ରଦତ୍ତ ଭଳି ଜାଲ୍ ସାର୍ଟିଫିକେଟ ଦେଇଥିବା ତଦନ୍ତରୁ ଜଣାପଡ଼ିଥିଲା। ଉପରୋକ୍ତ ଶିକ୍ଷୟିତ୍ରୀ ଶିକ୍ଷକଙ୍କ ସାର୍ଟିଫିକେଟ ଯାଞ୍ଚ ପରେ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇଥିବା ଜିଲା ଶିକ୍ଷାଧିକାରୀ ତଥା ଶିକ୍ଷା ପ୍ରକଳ୍ପ ସଂଯୋଜକ ପୂର୍ଣ୍ଣଚନ୍ଦ୍ର ବରିହା କହିଛନ୍ତି। ଜିଲାପାଳଙ୍କ ନିର୍ଦ୍ଦେଶକ୍ରମେ ସେମାନଙ୍କ ନାମରେ ମାମଲା ରୁଜୁ କରିବା ପାଇଁ ଗୋଷ୍ଠୀ ଶିକ୍ଷାଧିକାରୀଙ୍କୁ ଜଣାଇ ଦିଆଯିବ ବୋଲି ସେ କହିଛନ୍ତି। ଜିଲାରେ ପୂର୍ବରୁ କେତେଜଣ ଶିକ୍ଷୟିତ୍ରୀ ଶିକ୍ଷକ ଜାଲ୍ ସାଟିଫିକେଟ୍ ଦେଇ ଚାକିରିରୁ ବହିଷ୍କୃତ ହୋଇଥିବା ବେଳେ ଏବେ ଆଉ ୧୨ଜଣ ଧରା ପଡ଼ିଛନ୍ତି। ତେଣୁ ଏହି ଯାଞ୍ଚକୁ କଡ଼ାକଡ଼ି କରାଗଲେ ଆହୁରି ଅନେକ ଶିକ୍ଷୟିତ୍ରୀ ଶିକ୍ଷକ ଧରାପଡ଼ିବେ ବୋଲି ବୁଦ୍ଧିଜୀବୀ ମତପ୍ରକାଶ କରିଛନ୍ତି। ତେବେ ଜାଲ୍ ସାର୍ଟିଫିକେଟ ଦେଇ ଦୀର୍ଘ ବର୍ଷ ଧରି ଚାକିରି କରି ରାଜକୋଷ ଖାଲି କରିଥିବା ଏହି ନକଲି ଶିକ୍ଷକ ଓ ଶିକ୍ଷୟିତ୍ରୀଙ୍କଠାରୁ ରାଜ୍ୟ ସରକାର କେଉଁ ଆଧାରରେ ଟଙ୍କା ଫେରସ୍ତ ନେବେ ତାହା ଦେଖିବାକୁ ବାକି ରହିଲା।