ଭାଜପା ପ୍ରାର୍ଥୀଙ୍କର ୧୨ ଗାଡ଼ି, ୧୧୫୦ ଗ୍ରାମ୍ ସୁନା
08 ରାଜନଗର, ୧୯ା୫(ଭାସ୍କର ରାଉତରାୟ)ରାଜନଗର ବିଧାନସଭା ନିର୍ବାଚନମଣ୍ଡଳୀ ପାଇଁ ନିର୍ବାଚନ ମଇଦାନରେ ୯ ପ୍ରାର୍ଥୀ ଅଛନ୍ତି। ଶାସକ ବିଜେଡିରୁ ଧ୍ରୁବ ଚରଣ ସାହୁ, କଂଗ୍ରେସରୁ ଅଶୋକ କୁମାର ପ୍ରତିହାରୀ, ଭାଜପାରୁ ଲଳିତ କୁମାର ବେହେରା, ସମାଜବାଦୀ ପାର୍ଟିରୁ ପ୍ରଶାନ୍ତ କୁମାର ପାତ୍ର, ସ୍ବାଧୀନ ଭାବେ ଦିବ୍ୟରଞ୍ଜନ ସ୍ବାଇଁ, ମନୋଜ କୁମାର ରାଉତ, ଜୀବନକୃଷ୍ଣ ରୟ, ସ୍ନେହଲତା ରାଏ, ଅଜିତ୍ କୁମାର ନାୟକ ପ୍ରମୁଖ ପ୍ରତିଦ୍ୱନ୍ଦ୍ୱିତା କରୁଛନ୍ତି। ୩ ପ୍ରମୁଖ ଦଳର ପ୍ରାର୍ଥୀଙ୍କ ମଧ୍ୟରେ ଭାଜପା ପ୍ରାର୍ଥୀ ଲଳିତ କୁମାର ବେହେରା ସବୁଠୁ ଧନୀ ବୋଲି ଜଣାପଡ଼ିଛି। ଲଳିତଙ୍କ ପାଖରେ ୧୧୫୦ ଗ୍ରାମ୍ ସୁନା ଥିବା ବେଳେ ୧୨ଟି ଗାଡ଼ି ତାଙ୍କ ନଁାରେ ରହିଛି।
ନାମାଙ୍କନପତ୍ରରେ ଦାଖଲ ହୋଇଥିବା ସତ୍ୟପାଠରୁ ମିଳିଥିବା ତଥ୍ୟ ମୁତାବକ, ଭାଜପା ପ୍ରାର୍ଥୀ ଲଳିତ କୁମାର ଗତ ୫ ବର୍ଷରେ ୧ କୋଟି ୩୨ ଲକ୍ଷ ୨୪ ହଜାର ୮୮୦ ଟଙ୍କା ଆୟ ଦର୍ଶାଇଥିବା ବେଳେ ତାଙ୍କ ସ୍ତ୍ରୀ ୨୦୨୨-୨୩ରେ ୪ ଲକ୍ଷ ୯୯ ହଜାର ୯ଶହ ଟଙ୍କା ଆୟ ଦର୍ଶାଇଛନ୍ତି। ତାଙ୍କ ପାଖରେ ୧ ଲକ୍ଷ ୭୩ ହଜାର ନଗଦ ଜମା ଥିବା ବେଳେ ସ୍ତ୍ରୀଙ୍କ ପାଖରେ ୪୭ ହଜାର ଟଙ୍କା ରହିଛି। ତାଙ୍କର ବିଭିନ୍ନ ସ୍କିମ୍ରେ ୩୭ ଲକ୍ଷ ଟଙ୍କାର ବୀମା ରହିଥିବା ବେଳେ ସ୍ତ୍ରୀଙ୍କ ନାମରେ ୭ ଲକ୍ଷ ୧୦ ହଜାର ଟଙ୍କାର ବୀମା ରହିଛି। ତାଙ୍କ ପାଖରେ ୧ କେଜି ୧୫୦ ଗ୍ରାମ୍ ସୁନା, ୫ ଶହ ଗ୍ରାମ୍ ରୁପା ଓ ୧୦ ଗ୍ରାମ୍ ହୀରା ରହିଥିବା ବେଳେ ସ୍ତ୍ରୀଙ୍କ ପାଖରେ ୧୧୫ ଗ୍ରାମ୍ ସୁନା, ୩ ଶହ ଗ୍ରାମ୍ ରୁପା ରହିଛି। ତାଙ୍କ ପାଖରେ ଗ୍ଲାମର ଏଫ୍-୧, ସ୍ପ୍ଲେଣ୍ଡର ପ୍ଲସ୍, ଆଚିଭର-୧୫୦ ବାଇକ୍ରୁ ଆରମ୍ଭ କରି ଫର୍ଚୁନର ସିଗ୍ମା, ମେସ୍ଟ୍ରୋ, ମହିନ୍ଦ୍ରା ଥର, ମାରୁତି ସ୍ବିଫ୍ଟ, ସେଲ, ବୋଲେରୋ ପିକ୍ଅପ୍ ଓ ଭାରତ ବେଞ୍ଜ୍ ଭଳି ୧୨ଟି ଗାଡ଼ି ରହିଛି। ତାଙ୍କ ସ୍ଥାବର ସମ୍ପତ୍ତିର ମୂଲ୍ୟ ୮ କୋଟି ୨୫ ଲକ୍ଷ ୪୮ ହଜାର ୮୪୦ ଟଙ୍କା ହୋଇଥିବା ବେଳେ ଅସ୍ଥାବର ସମ୍ପତ୍ତିର ମୂଲ୍ୟ ୨ କୋଟି ୧୪ ଲକ୍ଷ ୪୩ ହଜାର ଟଙ୍କା। ତାଙ୍କ ସ୍ତ୍ରୀଙ୍କ ଅସ୍ଥାବର ସମ୍ପତ୍ତିର ମୂଲ୍ୟ ୧୫ ଲକ୍ଷ ୨୨ ହଜାର ୫ଶହ ଟଙ୍କା। ଲଳିତଙ୍କ ନଁାରେ ବିଭିନ୍ନ ବ୍ୟାଙ୍କରେ ୨ କୋଟି ୪୨ ଲକ୍ଷ ୮୦ ହଜାର ୯୮୫ ଟଙ୍କାର ଋଣ ରହିଥିବା ସତ୍ୟପାଠରେ ଦର୍ଶାଇଛନ୍ତି।
ବିଜେଡିରୁ ପ୍ରାର୍ଥୀ ହୋଇଥିବା ବର୍ତ୍ତମାନର ବିଧାୟକ ଧ୍ରୁବ ସାହୁ ୫ ବର୍ଷରେ ୨୯ ଲକ୍ଷ ୨୪ ହଜାର ୯୯୫ ଟଙ୍କା ଆୟ ଦର୍ଶାଇଥିବା ବେଳେ ତାଙ୍କ ସ୍ତ୍ରୀଙ୍କର ଆୟ ୨୦ ଲକ୍ଷ ୮୦ ହଜାର ୩୭୦ ଟଙ୍କା। ଧ୍ରୁବଙ୍କ ପାଖରେ ୬୭ ହଜାର ୨ଶହ ଟଙ୍କା ନଗଦ ଜମା ଥିବା ବେଳେ ସ୍ତ୍ରୀଙ୍କ ପାଖରେ ୩୧ ହଜାର ୭୫୦ ଟଙ୍କା ରହିଛି। ବିଭିନ୍ନ ବ୍ୟାଙ୍କରେ ୨୯ ଲକ୍ଷ ୭୫ ହଜାର ୪୩ ଟଙ୍କା ଜମା ଥିବା ବେଳେ ୪ ଲକ୍ଷ ୯୫ ହଜାର ୩୫ ଟଙ୍କାର ବୀମା ତାଙ୍କ ନାମରେ ରହିଛି। ସେହିପରି ତାଙ୍କ ସ୍ତ୍ରୀଙ୍କ ନାମରେ ୨୪ ଲକ୍ଷ ୭୬ ହଜାର ୭୧୯ ଟଙ୍କା ଓ ପୁଅ ନଁାରେ ୧୧ ଲକ୍ଷ ୧୯ ହଜାର ୪୫୨ ଟଙ୍କାର ବୀମା ରହିଛି। ତାଙ୍କ ପାଖରେ ସ୍କର୍ପିଓ ଗାଡି ସହିତ ହିରୋହୋଣ୍ଡା ସିଡିଡନ୍ ଓ ବଜାଜ ସ୍କୁଟର ରହିଛି। ତାଙ୍କ ପାଖରେ ୫୦ ଗ୍ରାମ୍, ସ୍ତ୍ରୀଙ୍କ ପାଖରେ ୩ ଶହ ଗ୍ରାମ୍ ଓ ପୁଅ ପାଖରେ ୩୦ ଗ୍ରାମ୍ର ସୁନା ରହିଛି। ଧ୍ରୁବଙ୍କ ଅସ୍ଥାବର ସମ୍ପତ୍ତିର ମୂଲ୍ୟ ୮୧ ଲକ୍ଷ ୨୦ ହଜାର ୧୨୭ ଟଙ୍କା, ସ୍ତ୍ରୀଙ୍କର ୪୯ ଲକ୍ଷ ୪୬ ହଜାର ୯୪୬ ଟଙ୍କା ଓ ପୁଅର ଅସ୍ଥାବର ସମ୍ପତ୍ତିର ମୂଲ୍ୟ ୧୧ ଲକ୍ଷ ୧୯ ହଜାର ୪୫୨ ଟଙ୍କା ବୋଲି ସତ୍ୟପାଠରେ ଦର୍ଶାଯାଇଛି। ତାଙ୍କର ସ୍ଥାବର ସମ୍ପତ୍ତିର ମୂଲ୍ୟ ୧୭ ଲକ୍ଷ ୬ ହଜାର ୮ଶହ ଟଙ୍କା ହୋଇଥିବା ବେଳେ ଭୁବନେଶ୍ୱର ଘର ତାଙ୍କ ସ୍ତ୍ରୀଙ୍କ ନାମରେ ଥିବାରୁ ତାଙ୍କ ସ୍ଥାବର ସମ୍ପତ୍ତିର ମୂଲ୍ୟ ୧ କୋଟି ୨୫ ଲକ୍ଷ ଟଙ୍କା। ଧ୍ରୁବଙ୍କ ନଁାରେ ୬୦ ଲକ୍ଷ ୯୮ ହଜାର ୧୩୬ ଟଙ୍କାର ବ୍ୟାଙ୍କଋଣ ରହିଛି।
କଂଗ୍ରେସ ପ୍ରାର୍ଥୀ ଅଶୋକ କୁମାର ପ୍ରତିହାରୀ ଗତ ୨ ବର୍ଷରେ ୯ ଲକ୍ଷ ୧୯ ହଜାର ୯୯୦ ଟଙ୍କା ଆୟ ଦର୍ଶାଇଛନ୍ତି। ତାଙ୍କ ପାଖରେ ୫୦ ହଜାର ଟଙ୍କା ହାତଜମା ଥିବା ବେଳେ ୨୦ ଗ୍ରାମ୍ ସୁନା ରହିଛି। ତାଙ୍କର ରେନୁଆଲ ଡଷ୍ଟର, ମହିନ୍ଦ୍ରା ବୋଲେରୋ ଭଳି ଦୁଇଟି ୪ଚକିଆ ଗାଡ଼ି ସହ ଗୋଟିଏ ହିରୋହୋଣ୍ଡା ବାଇକ୍ ରହିଛି। ତାଙ୍କର ଅସ୍ଥାବର ସମ୍ପତ୍ତିର ମୂଲ୍ୟ ୨୬ ଲକ୍ଷ ୩୯୯ ହଜାର ୧୧୦ ଟଙ୍କା ହୋଇଥିବା ବେଳେ ସ୍ଥାବର ସମ୍ପତ୍ତିର ମୂଲ୍ୟ ୪୦ ଲକ୍ଷ ଟଙ୍କା। ତାଙ୍କର ବିଭିନ୍ନ ବ୍ୟାଙ୍କରେ ୧୧ ଲକ୍ଷ ଟଙ୍କାର ଋଣ ରହିଛି।