ଭୁବନେଶ୍ୱର,୧୧ା୧(ସ୍ପୋଟର୍ସ ବ୍ୟୁରୋ): ହିମାଚଳ ପ୍ରଦେଶର ଅଟଳ ବିହାରୀ ବାଜପେୟୀ କ୍ରିକେଟ ଷ୍ଟାଡିୟମରେ ମଙ୍ଗଳବାର ଆରମ୍ଭ ହୋଇଛି ଓଡ଼ିଶା ଓ ହିମାଚଳ ପ୍ରଦେଶ ମଧ୍ୟରେ ରଣଜୀ ଟ୍ରଫି ମ୍ୟାଚ୍। ପ୍ରଥମ ଦିବସରେ ଦୁଇଟି ଅର୍ଦ୍ଧଶତକ ଦେଖିବାକୁ ମିଳିଥିବା ବେଳେ ୧୨ ଉଇକେଟର ପତନ ଘଟିଛି। ଟସ୍ ହାରି ପ୍ରଥମେ ବ୍ୟାଟିଂ କରିଥିବା ଓଡ଼ିଶା ୧୯୧ ରନରେ ଅଲଆଉଟ ହୋଇଥିବା ବେଳେ ଷ୍ଟମ୍ପ ଅପସାରଣ ସୁଦ୍ଧା ହିମାଚଳ ୨ ଉଇକେଟରେ ୯୧ ରନ୍ ସଂଗ୍ରହ କରିଛି। ଓଡ଼ିଶା ପକ୍ଷରୁ ଗତ ମ୍ୟାଚର ଦ୍ୱିଶତକ ହାସଲକାରୀ ଶାନ୍ତନୁ ମିଶ୍ର ସର୍ବାଧିକ ୫୨ ରନ୍ କରିଥିଲେ। ପ୍ରଥମ ଘଣ୍ଟାରେ କୁହୁଡିଆ ପରିବେଶର ଫାଇଦା ଉଠାଇଥିଲେ ହିମାଚଳ ବୋଲର। ଓଡ଼ିଶା ମାତ୍ର ୪୬ ରନରେ ୩ ଉଇକେଟ ହରାଇଥିଲା। ଶାନ୍ତନୁଙ୍କ ବ୍ୟତୀତ କାର୍ତ୍ତିକ ବିଶ୍ୱାଳ(୨୨), ପ୍ରୟାସ ସିଂ(୩୯), ସୂର୍ଯ୍ୟକାନ୍ତ ପ୍ରଧାନ(୧୬) ଓ ବସନ୍ତ ମହାନ୍ତି(୧୪) କେବଳ ଦୁଇ ଅଙ୍କରେ ପହଞ୍ଚିଥିଲେ। ହିମାଚଳ ପକ୍ଷରୁ ବୈଭବ ଅରୋରା ୫ ଉଇକେଟ ନେଇଥିବା ବେଳେ ରିଷି ଧାଓ୍ବନ ଓ କଓ୍ବଁର ଅଭିନୟ ୨ଟି ଲେଖାଏ ଉଇକେଟ ନେଇଥିଲେ। ଜବାବରେ ପ୍ରଥମ ଦିନର ଖେଳ ଶେଷ ସୁଦ୍ଧା ହିମାଚଳ ୨ ଉଇକେଟରେ ୯୧ ରନ୍ କରିଛି। ଓପନର ପ୍ରଶାନ୍ତ ଚୋପ୍ରା ୬୭ ରନରେ ବ୍ୟାଟିଂ କରୁଛନ୍ତି। ଓଡ଼ିଶା ପକ୍ଷରୁ ବସନ୍ତ ମହାନ୍ତି ଓ ସୂର୍ଯ୍ୟକାନ୍ତ ପ୍ରଧାନ ଗୋଟିଏ ଲେଖାଏ ଉଇକେଟ ଅକ୍ତିଆର କରିଛନ୍ତି।
ସଂକ୍ଷିପ୍ତ ସ୍କୋର
ଓଡ଼ିଶା ପ୍ରଥମ ଇନିଂସ- ୫୦ ଓଭରରେ ୧୯୧/୧୦ (ଶାନ୍ତନୁ ମିଶ୍ର-୫୨, ପ୍ରୟାସ ସିଂ-୩୯, କାର୍ତ୍ତିକ ବିଶ୍ୱାଳ-୨୨, ବୈଭବ ଅରୋରା-୫/୫୧, ରିଷି ଧାଓ୍ବନ-୨/୪୪, କଓ୍ବଁର ଅଭିନୟ-୨/୩୯)। ହିମାଚଳ ପ୍ରଦେଶ ପ୍ରଥମ ଇନିଂସ- ୩୧ ଓଭରରେ ୯୧/୨ (ପ୍ରଶାନ୍ତ ଚୋପ୍ରା-୬୭*, ରାଘବ ଧାଓ୍ବନ-୨୭, ବସନ୍ତ ମହାନ୍ତି-୧/୨୨, ସୂର୍ଯ୍ୟକାନ୍ତ ପ୍ରଧାନ-୧/୩୨)।