ନୂଆଦିଲ୍ଲୀ,୧୪।୧୦ (ଆଇଏଏନ୍ଏସ୍):ଶିକ୍ଷକଙ୍କ ମାଡ଼ରେ ଗୁରୁତର ଆହତ ଜଣେ ୧୨ ବର୍ଷର ଛାତ୍ରଙ୍କ ମୃତ୍ୟୁ ହୋଇଯାଇଛି। ଉକ୍ତ ଷଷ୍ଠ ଶ୍ରେଣୀ ଛାତ୍ରଙ୍କ ମୁଣ୍ଡରେ ଗଭୀର ଆଘାତ ଲାଗିଥିଲା। ବେଡ୍ ନ ମିଳିବାରୁ ତାଙ୍କୁ ହସ୍ପିଟାଲରେ ଭର୍ତ୍ତି କରାଇବାରେ ବିଳମ୍ବ ହୋଇଥିଲା। ଫଳରେ ତାଙ୍କର ମୃତ୍ୟୁ ଘଟିଲା ବୋଲି କୁହାଯାଉଛି। ଖବର ଅନୁଯାୟୀ ଗ୍ରେଟର ନୋଏଡ଼ାର ବାଦଲପୁର ଅଞ୍ଚଳରେ ଥିବା ଏକ ସ୍କୁଲ୍ରେ ପ୍ରିନ୍ସ ନାମକ ଉକ୍ତ ଛାତ୍ର ପଢ଼ୁଥିଲେ। ଗତ ୭ ତାରିଖରେ ବାପା ତାଙ୍କୁ ନେଇ ସ୍କୁଲ୍ରେ ଛାଡ଼ି ଆସିଥିଲେ। ପୁଅ ସଂଜ୍ଞାହୀନ ହୋଇପଡ଼ିଥିବା ତାଙ୍କ ଘରକୁ ଫୋନ୍ କଲ୍ ଆସିଥିଲା। ସେ ସଙ୍ଗେ ସଙ୍ଗେ ପ୍ରିନ୍ସଙ୍କୁ ଏକ ଘରୋଇ କ୍ଲିନିକ୍କୁ ନେଇଥିଲେ। ଅଧିକ ଚିକିତ୍ସା ଲାଗି ତାଙ୍କୁ ହସ୍ପିଟାଲ ପଠାଇବାକୁ କୁହାଯିବାରୁ ପ୍ରଥମେ ସଫଦରଜଙ୍ଗ ପରେ ରାମ ମନୋହର ଲୋହିଆ ଏବଂ ଜି.ବି. ପନ୍ଥ ହସ୍ପିଟାଲ ନିଆଯାଇଥିଲା। ବେଡ୍ ଅଭାବରୁ ଉକ୍ତ ହସ୍ପିଟାଲଗୁଡ଼ିକ ଆଡମିଶନ କରିବାକୁ ମନା କରିଦେଇଥିଲେ। ଶେଷରେ ଏଲ୍ଏନ୍ଜେପି ହସ୍ପିଟାଲରେ ବେଡ୍ ମିଳିଥିଲା ଓ ଶନିବାର ସକାଳେ ପ୍ରିନ୍ସଙ୍କ ଅସ୍ତ୍ରୋପଚାର ହୋଇଥିଲା। ସେହିଦିନ ସନ୍ଧ୍ୟାରେ ତାଙ୍କର ମୃତ୍ୟୁ ଘଟିଥିଲା। ଶ୍ରେଣୀ ପରୀକ୍ଷାରେ ଫେଲ୍ ହେବାରୁ ଶିକ୍ଷକ ପ୍ରିନ୍ସଙ୍କୁ ବେତରେ ନିର୍ଘାତ ପିଟିଥିବା ତାଙ୍କ ସହପାଠୀମାନେ କହିଛନ୍ତି। ସେ ପଡ଼ିଯାଇ ବାନ୍ତି କରିବା ପରେ ସଂଜ୍ଞାହୀନ ହୋଇପଡ଼ିଥିଲେ॥
