ଚିତ୍ରଦୁର୍ଗ,୩୧।୧୦: ସ୍କୁଲରେ ହେବାକୁ ଥିବା ନାଟକ ଭଗତ୍ ସିଂଙ୍କୁ ଫାଶୀ ଦିଆଯିବାର ଦୃଶ୍ୟ ଅଭ୍ୟାସ କରୁଥିବା ବେଳେ କର୍ନାଟକ ଚିତ୍ରଦୁର୍ଗ ଜିଲାରେ ରବିବାର ରାତିରେ ଏକ ଅଘଟଣ ଘଟିଛି। ଏଥିରେ ସପ୍ତମ ଶ୍ରେଣୀରେ ପଢୁଥିବା ଜଣେ ଛାତ୍ରଙ୍କ ମୃତ୍ୟୁ ଘଟିଛି। ସେ ହେଲେ ସଞ୍ଜୟ ଗୌଡ଼ା(୧୨)
ସୂଚନା ଯୋଗ୍ୟ, ନଭେମ୍ବର ୧ରେ କନ୍ନଡ ରାଜ୍ୟ ଉତ୍ସବ ଅବସରରେ ଚିତ୍ରଦୁର୍ଗ ଜିଲାର ଏକ ସ୍କୁଲରେ ସାଂସ୍କୃତିକ କାର୍ଯ୍ୟକ୍ରମ କରିବାକୁ ସ୍ଥିର ହୋଇଥିଲା। ଏନେଇ ଛାତ୍ର ସଞ୍ଜୟ ସଂଗ୍ରାମୀ ଭଗତ ସିଂଙ୍କ ଜୀବନୀ ଉପରେ ଅଭିନୟ କରିବା ପାଇଁ ଭାଗ ନେଇଥିଲେ। ଏପରିକି ସ୍କୁଲରେ ମଧ୍ୟ ରିହର୍ସାଲ କରାଯାଉଥିଲା। ହେଲେ ରବିବାର ଘରେ ଏକାକୀ ଥିବା ବେଳେ ସଞ୍ଜୟ ଫାଶୀ ଦିଆଯିବାର ଦୃଶ୍ୟ ଅଭ୍ୟାସ କରୁଥିଲେ।
ଅନ୍ୟପକ୍ଷେ ସଞ୍ଜୟଙ୍କ ମା’, ବାପା ତାଙ୍କ ହୋଟେଲରେ ଥିଲେ। ରାତି ପ୍ରାୟ ୯ଟା ବେଳେ ସଞ୍ଜୟଙ୍କ ମା’ ଘରକୁ ଆସି କବାଟ ଖୋଳିବାକୁ ଡାକିଥିଲେ। ହେଲେ ସଞ୍ଜୟ କୌଣସି ଉତ୍ତର ଦେଇ ନ ଥିଲେ। ଘର ଝରକା ପଟେ ଦେଖିଲା ବେଳକୁ ସଞ୍ଜୟ ପଙ୍ଖାରେ ଫାଶୀ ଲଗାଇ ଓହଳି ଥିଲେ। ପରିବାର ଲୋକେ ତାଙ୍କୁ ଉଦ୍ଧାର କରି ସ୍ଥାନୀୟ ଡାକ୍ତରଖାନାକୁ ନେଇଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ସଞ୍ଜୟଙ୍କ ବାପା ଥାନାରେ କରିଥିବା ଅଭିଯୋଗ ମୁତାବକ, ରାଜ୍ୟ ଉତ୍ସବ ପାଳନ ନିମନ୍ତେ ସ୍କୁଲ ସାଂସ୍କୃତିକ କାର୍ଯ୍ୟକ୍ରମରେ ସଞ୍ଜୟ ଭଗତ୍ ସିଂଙ୍କ ଭୂମିକାରେ ଅଭିନୟ କରିଥାଆନ୍ତେ। ହେଲେ ଅଭିନୟ ନେଇ ଅଭ୍ୟାସ ବେଳେ ଏଭଳି ଘଟଣା ଘଟିଥିବା କହିଛନ୍ତି। ଏନେଇ ପୋଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି।