ନୂଆଦିଲ୍ଲୀ, ୪।୪: ରାଜ୍ୟ ଅନୁସୂଚିତ ଜନଜାତି (ଏସ୍ଟି) ତାଲିକାରେ ସାମିଲ ଲାଗି ଓଡ଼ିଶା ସରକାର ଦେଇଥିବା ୧୬୯ଟି ପ୍ରସ୍ତାବକୁ ପ୍ରାରମ୍ଭିକ ଭାବେ ଅନୁଧ୍ୟାନ କରାଯାଇଛି। ୧୨୦ଟି ପ୍ରସ୍ତାବ ଉପରେ ଅଧିକ ସମର୍ଥନ ରିପୋର୍ଟ ଆବଶ୍ୟକ। ରାଜ୍ୟ ସରକାର ୧୨୦ଟି ପ୍ରସ୍ତାବ ଉପରେ ଆନୁଷଙ୍ଗିକ ତଥ୍ୟ/ସମର୍ଥନ ରିପୋର୍ଟ ଯୋଗାଇଦେବା ଆବଶ୍ୟକ ବୋଲି ବିଭାଗୀୟ ମନ୍ତ୍ରୀ ବିଶ୍ୱେଶ୍ୱର ଟୁଡୁ ଲୋକ ସଭାରେ କହିଛନ୍ତି। ବରିଷ୍ଠ ବିଜେଡି ଏମ୍ପି ପିନାକୀ ମିଶ୍ରଙ୍କ ପ୍ରଶ୍ନର ଉତ୍ତରରେ ମନ୍ତ୍ରୀ ଏହା କହିଥିଲେ। ଏସ୍ଟି ତାଲିକାରେ ଉପରୋକ୍ତ ସମ୍ପ୍ରଦାୟଗୁଡ଼ିକୁ ସାମିଲ କରା ନ ଯିବାର କାରଣ କ’ଣ ବୋଲି ପିନାକୀ ପ୍ରଶ୍ନ କରିଥିଲେ। ରାଜ୍ୟ ଏସ୍ଟି ତାଲିକାରେ ସେମାନଙ୍କୁ ଅନ୍ତର୍ଭୁକ୍ତ କରିବା ଲାଗି ବିଜେଡି ଏମ୍ପିମାନେ ଦାବି ଉଠାଇଥିଲେ। ଉକ୍ତ ପ୍ରସ୍ତାବ ମଧ୍ୟରୁ କେତେକ ନୂଆ, ଆଉ କେତେକ ଉପ-ଜନଜାତି ଏବଂ ଅନ୍ୟ କେତେକରେ ଉଚ୍ଚାରଣଗତ ଭିନ୍ନତା ରହିଛି। ଏହି ସମ୍ପ୍ରଦାୟଗୁଡ଼ିକ ଅନୁସୂଚିତ ଜନଜାତିଙ୍କ ପାଇଁ ମିଳୁଥିବା ବିଭିନ୍ନ ସରକାରୀ ସୁବିଧା ସୁଯୋଗରୁ ବଞ୍ଚତ୍ତ ହେଉଛନ୍ତି ବୋଲି ବିଜେଡି ଏମ୍ପି କହିଥିଲେ।