ଅମରପାଲି, ୧୩।୧୧ (ଡି.ଏନ.ଏ.)-ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ବାଗବର ପଞ୍ଚାୟତ ଅନ୍ତର୍ଗତ କୁମୁରସିଂହା ଗ୍ରାମରେ ସୋମବାର ରାତିରେ ଅଜଣା ଜନ୍ତୁ ଆକ୍ରମଣରେ ୨୫ଟି ମେଣ୍ଢାଙ୍କର ମୃତ୍ୟୁ ହୋଇଛି। ଏଥିରେ ଅନ୍ୟ ୮ ମେଣ୍ଢା ଗୁରୁତର ହୋଇଥିବା ଅଭିଯୋଗ ହୋଇଛି। ସୂଚନାମତେ କୁମୁରସିଂହା ଗ୍ରାମରୁ ଟିକିଏ ଦୂରରେ ଗ୍ରାମର କପିଳ ମହାକୁର ଗୁହାଳ କରି ସେଠାରେ ପ୍ରାୟ ୫୨ଟି ମେଣ୍ଢା ପାଳନ କରିଥିଲେ। ଗତ ରାତିରେ କୌଣସି ବନ୍ୟଜନ୍ତୁ ଆସି ଗୁହାଳରେ ଥିବା ମେଣ୍ଢାପଲଙ୍କୁ ଆକ୍ରମଣ କରିଥିଲା। କାର୍ତ୍ତିକ ଚତୁର୍ଦ୍ଦଶୀ ଥିବାରୁ ଗାଁରେ ଡାକବାଜି ଯନ୍ତ୍ର ବାଜୁଥିଲା। ଫଳରେ ଆକ୍ରମଣ ସମୟରେ ମେଣ୍ଢାମାନଙ୍କର ଶଦ୍ଦ ଶୁଭାଯାଇ ନଥିଲା । ଏପରିକି ମେଣ୍ଢା ଗୁହାଳ ପାଖରେ କୌଣସି ବ୍ୟକ୍ତି ମଧ୍ୟ ଜଗୁ ନ ଥିଲେ । ଏହାର ସୁଯୋଗ ନେଇ ପ୍ରାୟ ୫ଟି ମେଣ୍ଢାଙ୍କୁ ଆକ୍ରମଣ କରିଥିଲା ବନ୍ୟଜନ୍ତୁ । ଆକ୍ରମଣ ପରେ ଜନ୍ତୁଟି ୧୪ ମେଣ୍ଢାଙ୍କୁ ଖାଇ ଦେଇଥିବା ଅନୁମାନ କରାଯାଇଛି। ଅନ୍ୟ ୧୧ ମେଣ୍ଢାଙ୍କ ମୃତଦେହ ଜବତ କରାଯାଇ ବ୍ୟବଚ୍ଛେଦ କରାଯାଇଛି। ଆକ୍ରମଣରେ ଗୁରୁତର ହୋଇଥିବା ୮ ମେଣ୍ଢାଙ୍କୁ ଚିକିତ୍ସା କରାଯାଇଥିବା ବୀରମହାରାଜପୁର ଭିଏସ୍ ଡା. ସୁବ୍ରତ ପୁରୋହିତ ପ୍ରକାଶ କରିଛନ୍ତି । ମାତ୍ର କପିଳଙ୍କ ଅଭିଯୋଗ ମତେ ତାଙ୍କର ୫୨ଟି ମେଣ୍ଢାରୁ ୨୫ ମେଣ୍ଢାଙ୍କ ମୃତ୍ୟୁ ହୋଇଛି । କପିଳ ମେଣ୍ଢା ପାଳନ କରି ଏଥିରେ ପରିବାର ଚଳାଉଥିଲେ । ମୃତ ମେଣ୍ଢାଙ୍କର ଆନୁମାନିକ ମୂଲ୍ୟ ପ୍ରାୟ ୧ ଲକ୍ଷ ଟଙ୍କା ହେବ। ତେଣୁ ତାଙ୍କୁ କ୍ଷତିପୁରଣ ଦେବାକୁ ଦାବି ହେଉଛି । ଏ ନେଇ ସୋନପୁର ଡିଏଫ୍ଓ ସୁଶାନ୍ତ ସାମନ୍ତରାୟଙ୍କୁ ପଚାରିବାରୁ କହଛନ୍ତି ଯେ, ବନ ବିଭାଗ ଘଟଣାସ୍ଥଳକୁ ଯାଇ ତଦନ୍ତ କରିଛି। କୌଣସି ବନ୍ୟଜନ୍ତୁ ଆକ୍ରମଣ କରିଥିବା ପ୍ରାଥମିକ ତଦନ୍ତରୁ ଜଣାପଡୁଛି । ୧୧ ମୃତ ମେଣ୍ଢାଙ୍କ ମୃତଦେହ ଜବତ କରି ବ୍ୟବଚ୍ଛେଦ କରିଛୁ । ବିଭାଗ ପକ୍ଷରୁ ଯଥାଶୀଘ୍ର କ୍ଷତିପୂରଣ ଯୋଗାଇ ଦିଆଯିବ ।