ଇମ୍ଫାଲ,୪ା୯ : ଉତ୍ତର-ପୂର୍ବାଞ୍ଚଳ ରାଜ୍ୟ ମଣିପୁରରେ ଦୀର୍ଘ ୪ ମାସ ହେଲା ଲାଗିରହିଥିବା ଜାତିଆଣ ସଂଘର୍ଷ ଓ ହିଂସାକାଣ୍ଡରେ ପାଖାପାଖି ୨୦୦ ଲୋକଙ୍କ ଜୀବନ ଯାଇଥିବାବେଳେ ୫୦ ହଜାରରୁ ଅଧିକ ଲୋକ ବିସ୍ଥାପିତ ହୋଇଛନ୍ତି। ବିସ୍ଥାପିତଙ୍କ ମଧ୍ୟରେ ୧୨,୬୯୪ ପିଲା ରହିଛନ୍ତି। ଘରଦ୍ୱାର ଛାଡ଼ିଥିବା ଏହି ପିଲାମାନେ ବିଭିନ୍ନ ରିଲିଫ କ୍ୟାମ୍ପରେ ଆଶ୍ରୟ ନେଇଛନ୍ତି। ହିଂସା ଯୋଗୁ ଶତାଧିକ ପିଲା ଗଭୀର ମାନସିକ ଆଘାତ ପାଇଛନ୍ତି, ଯାହାଙ୍କ ପାଇଁ ପେସାଦାରି କାଉନ୍ସେଲିଂର ଆବଶ୍ୟକତା ରହିଥିବା ସରକାରୀ ତଥ୍ୟରୁ ଜଣାପଡ଼ିଛି। ଡାକ୍ତରୀ ଟିମ୍ ଏବଂ ଶିଶୁ ମନସ୍ତତ୍ତ୍ୱବିଦ୍ମାନେ ସ୍ବେଚ୍ଛାସେବୀ ଭାବେ ଉକ୍ତ ପିଲାମାନଙ୍କୁ କାଉନ୍ସେଲିଂ ଦେଉଥିବା ମଣିପୁର ସାମାଜିକ କଲ୍ୟାଣ ବିଭାଗ ପକ୍ଷରୁ କୁହାଯାଇଛି। ଗଭୀର ମାନସିକ ଆଘାତ ପାଇଥିବା ପିଲାଙ୍କୁ ପାଇଲେ, ଆମେ ସେମାନଙ୍କୁ ଚିହ୍ନଟ କରି ପେସାଦାରି ପରାମର୍ଶଦାତାମାନଙ୍କ ପାଖକୁ ନେଇଯାଉଛୁ। ସେମାନେ ଖୁବ୍ଶୀଘ୍ର ସ୍ବାଭାବିକ ସ୍ଥିତିକୁ ଫେରିବା ଆଶା କରାଯାଉଛି ବୋଲି ସାମାଜିକ କଲ୍ୟାଣ ବିଭାଗ ନିର୍ଦ୍ଦେଶକ ଏନ୍ଜି ଉତ୍ତମ ସିଂ କହିଛନ୍ତି। ମାନସିକ ଆଘାତପ୍ରାପ୍ତ ଜଣେ ସଙ୍ଗେ ସଙ୍ଗେ ହୋଇ ନ ଥାନ୍ତି। ସପ୍ତାହେ କିମ୍ବା ମାସେ ପରେ ସେମାନଙ୍କଠାରେ ଏଭଳି ଲକ୍ଷଣ ଦେଖାଯାଇଥାଏ। ସେଥିପାଇଁ ପ୍ରତି ଜିଲାର ଶିଶୁ ସୁରକ୍ଷା କାର୍ଯ୍ୟାଳୟ ଜରିଆରେ କାଉନ୍ସେଲରଙ୍କୁ ନିୟୋଜିତ କରାଯାଇଛି। ସେମାନେ ରିଲିଫ କ୍ୟାମ୍ପ୍କୁ ଯାଇ ବିସ୍ଥାପିତ ପିଲାମାନଙ୍କ ମାନସିକ ସ୍ବାସ୍ଥ୍ୟର ଚିକିତ୍ସା କରିବା ସହ ଯେଉଁମାନଙ୍କର ପେସାଦାରି କାଉନ୍ସେଲିଂର ଆବଶ୍ୟକତା ରହିଛି, ସେମାନଙ୍କୁ ଚିହ୍ନଟ କରୁଛନ୍ତି। ଖେଳ ଓ ନାଚ ମାଧ୍ୟମରେ ମାନସିକ ବିଷାଦଗ୍ରସ୍ତ ପିଲାଙ୍କୁ ଚିହ୍ନଟ କରାଯାଉଛି। ସେମାନଙ୍କୁ କାଗଜରେ କିଛି ଆଙ୍କିବା ପାଇଁ କୁହାଯାଉଛି।
ଅନ୍ୟପକ୍ଷରେ ରିଲିଫ କ୍ୟାମ୍ପଗୁଡ଼ିକ ଉପଯୁକ୍ତ ଯୋଜନାରେ କରା ନ ଯାଇ ଆବଶ୍ୟକତା ଆଧାରରେ ପ୍ରତିଷ୍ଠା କରାଯାଇଥିବାରୁ ସେଠାରେ ଅନେକ ସମସ୍ୟା ରହିଥିବା ୟୁନିସେଫ୍ ଟିମ୍ କହିଛି। ଶିଶୁ ଅନୁକୂଳ ରିଲିଫ କ୍ୟାମ୍ପ୍ ସ୍ଥାପନ ଲାଗି ଉକ୍ତ ଟିମ୍ ପରାମର୍ଶ ଦେଇଛି। ରିଲିଫ କ୍ୟାମ୍ପଗୁଡ଼ିକରେ ପିଲାମାନଙ୍କ ଯତ୍ନରେ ଯେପରି କୌଣସି କମି ନ ହୁଏ, ସେଥିପାଇଁ ପ୍ରତି ସପ୍ତାହରେ ମୁଖ୍ୟ ସଚିବଙ୍କ ସ୍ତରରେ ସମୀକ୍ଷା ବୈଠକ କରାଯାଉଥିବା ସାମାଜିକ କଲ୍ୟାଣ ନିର୍ଦ୍ଦେଶକ କହିଛନ୍ତି। ସେହିପରି ଅପପୁଷ୍ଟିର ଶିକାର ହୋଇଥିବା ପିଲାମାନଙ୍କୁ ଇମ୍ଫାଲର ଜେଏନ୍ଆଇଏମ୍ଏସ୍କୁ ନିଆଯାଇ ସେଠାରେ ଚିକିତ୍ସା କରାଯାଉଛି। ଅତ୍ୟଧିକ ଅପପୁଷ୍ଟିର ସମ୍ମୁଖୀନ ହୋଇଥିବା ୧୬ ପିଲାଙ୍କୁ ଚିକିତ୍ସା କରାଗଲାଣି।
ଇମ୍ଫାଲରୁ ଶେଷ ୧୦ କୁକି ପରିବାର ବିତାଡ଼ିତ
ଇମ୍ଫାଲର ନିଉ ଲାମ୍ବୁଲାନେ ଅଞ୍ଚଳରୁ ଶେଷ ୧୦ କୁକି ପରିବାରର ୨୪ ଜଣ ସଦସ୍ୟଙ୍କୁ ମଣିପୁର ସରକାର କୁକି ଅଧ୍ୟୁଷିତ କାଙ୍ଗପୋକ୍ପି ଜିଲାକୁ ସ୍ଥାନାନ୍ତର କରିଛନ୍ତି। ଏହି ପରିବାର ଦୀର୍ଘ ଦଶନ୍ଧି ହେଲା ନିଉ ଲାମ୍ବୁଲାନେରେ ରହିଥିଲେ। ଏପରିକି ୪ ମାସ ପୂର୍ବରୁ ମଣିପୁର ହିଂସାକାଣ୍ଡ ବେଳେ ମଧ୍ୟ ସେମାନେ କୁଆଡ଼େ ଯାଇ ନ ଥିଲେ। ସେମାନଙ୍କୁ ଅନ୍ୟ ସମ୍ପ୍ରଦାୟ ଟାର୍ଗେଟ କରୁଥିବାରୁ ସରକାର ଶନିବାର ଏଭଳି ପଦକ୍ଷେପ ଗ୍ରହଣ କରିଛନ୍ତି। ସେମାନଙ୍କୁ ନିରାପଦ ସହ ଇମ୍ଫାଲଠାରୁ ୨୫ କି.ମି. ଦୂର କାଙ୍ଗପୋକ୍ପି ଜିଲାର ମୋଟବୁଙ୍ଗ୍କୁ ନିଆଯାଇଛି। ଅନ୍ୟପକ୍ଷରେ ସେମାନଙ୍କୁ ବଳପୂର୍ବକ ଘରୁ ତଡ଼ିଦିଆଯାଇଥିବା କୁକି ପରିବାର ଅଭିଯୋଗ କରିଛନ୍ତି। କୁକି ଅଞ୍ଚଳରେ ସୁରକ୍ଷା ଦେଉଥିବା ଜଣେ ସ୍ବେଚ୍ଛାସେବୀଙ୍କ କହିବା ଅନୁଯାୟୀ, ଗୃହ ବିଭାଗ ନିର୍ଦ୍ଦେଶରେ ୟୁନିଫର୍ମରେ ଥିବା ସଶସ୍ତ୍ର ବ୍ୟକ୍ତିମାନଙ୍କର ଏକ ଟିମ୍ ସେପ୍ଟେମ୍ବର ୧ ବିଳମ୍ବିତ ରାତିରେ ନିଉ ଲାମ୍ବୁଲେନ୍ରେ ପହଞ୍ଚତ୍ କୁକି ପରିବାର ସଦସ୍ୟମାନଙ୍କୁ ସେମାନଙ୍କ ଘରୁ ଜୋର ଜବରଦସ୍ତ ବାହାର କରିଦେଇଥିଲେ। ଏପରିକି ସେମାନଙ୍କୁ ଜିନିଷପତ୍ର ପ୍ୟାକ୍ କରିବାକୁ ସମୟ ଦିଆଯାଇ ନ ଥିଲା। ନିଉ ଲାମ୍ବୁଲେନ୍ରେ ୩୦୦ରୁ ଊର୍ଦ୍ଧ୍ୱ କୁକି ପରିବାର ରହୁଥିଲେ। ମେ’୩ରେ ମଣିପୁର ହିଂସା ଆରମ୍ଭ ହେବା ପରେ ଅଧିକାଂଶ ପରିବାର ସେଠାରୁ ପଳାଇ ଯାଇଥିଲେ।