ଭଞ୍ଜନଗର,୧୭।୩(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ପୋଲିସ ବିଗତ କିଛି ଦିନ ହେବ ବେଆଇନ ଗୋଚାଲାଣ ଉପରେ କଡ଼ା ଆଭିମୁଖ୍ୟ ଆପଣାଇଛି। ରବିବାର ଓ ସୋମବାର ୨ ଦିନରେ ପୋଲିସ ବେଆଇନ ଭାବେ ଚାଲାଣ ହେଉଥିବା ୧୨୮ଟି ଗାଈଗୋରୁ ଉଦ୍ଧାର କରିଛି। ଏନେଇ ପୋଲିସ ରବିବାର ଏକ ମାମଲା ରୁଜୁ କରି ଜଣକୁ ଗିରଫ କରି ଭଞ୍ଜନଗର କୋର୍ଟ ଚାଲାଣ କରିଥିଲା। ସୋମବାର ଆଉ ଏକ ମାମଲା ରୁଜୁ କରି ୫ ଜଣକୁ ଗିରଫ କରି କୋର୍ଟ ଚାଲାଣ କରିଛି। ଭଞ୍ଜନଗର ପୋଲିସ ବେଆଇନ ଗୋଚାଲାଣ ଉପରେ ଜୋରଦାର ଚଢାଉ କରିଛି । ଫଳରେ ଗାଈଗୋରୁ ବ୍ୟବସାୟୀମାନେ ଆତଙ୍କିତ ହୋଇପଡିଛନ୍ତି।
ସୂଚନାଯୋଗ୍ୟ, ଗଞ୍ଜାମ ଓ କନ୍ଧମାଳ ଜିଲାରୁ ଅନେକ ଗାଈଗୋରୁ ବେଆଇନ ଭାବେ ରାଜ୍ୟର ବିଭିନ୍ନ ଅଞ୍ଚଳ ଏବଂ ରାଜ୍ୟ ବାହାର କଂସାରିଖାନାକୁ ଚାଲାଣ ହେଉଛି। ଏନେଇ ବିଭିନ୍ନ ସମୟରେ ବିଭିନ୍ନ ସଙ୍ଗଠନ ପକ୍ଷରୁ ଅଭିଯୋଗ ହେଉଛି। କିନ୍ତୁ ପୋଲିସ ପ୍ରଶାସନ ଏନେଇ ବିଗତ ଦିନରେ କଡ଼ା ପଦକ୍ଷେପ ନେବାରେ ବିଫଳ ହେଉଛି। ଏହାର ସୁଯୋଗ ନେଇ ବ୍ୟବସାୟୀମାନେ ଅବାଧରେ ଗୋଚାଲାଣ କରୁଛନ୍ତି। ଏହିଭଳି ପରିସ୍ଥିତିରେ ଶନିବାର ରାତିରେ କନ୍ଧମାଳ ଜିଲାରୁ ୭୦ ଗାଈ ଧରି ବ୍ୟବସାୟୀମାନେ ସୋରଡ଼ା ଥାନା ଅନ୍ତର୍ଗତ ଜୟସିଂ ନେଉଥିଲେ। ସେଠାରୁ ରାଜ୍ୟର ବିଭିନ୍ନ ଅଞ୍ଚଳକୁ ଚାଲାଣ ହୋଇଥାନ୍ତା। କିନ୍ତୁ ଭଞ୍ଜନଗର ନିକଟସ୍ଥ ନିଧିଆପଲ୍ଲିଠାରେ କିଛି ସାଧୁସନ୍ଥ ବେଆଇନ ଗୋ ଚାଲାଣ ନେଇ ଦେଖିବା ପରେ ଭଞ୍ଜନଗର ଥାନାଧିକାରୀ ଜିବନାନନ୍ଦ ଜେନାଙ୍କୁ ସୂଚନା ଦେଇଥିଲେ। ଏହାପରେ ପୋଲିସ ଘଟଣାସ୍ଥଳରେ ପହଞ୍ଚି ଗାଈଗୋରୁଙ୍କୁ ଉଦ୍ଧାର କରି କରଚୁଲି ଆଶ୍ରମରେ ନେଇ ଛାଡିଥିଲା। ଏହି ମାମଲାରେ ଜଣକୁ ଗିରଫ କରାଯାଇଥିଲା। ସୋମବାର ପ୍ରତ୍ୟୁଷରେ ୫୮ ଗାଈ ଗୋରୁ ଧରି ୫ ଜଣ ଅଭିଯୁକ୍ତ କନ୍ଧମାଳ ଜିଲାରୁ ଡହ ରାସ୍ତା ଦେଇ ସୋରଡ଼ା ଅଭିମୁଖେ ଯାଉଥିଲେ। ଏନେଇ ପୋଲିସ ସୂଚନା ପାଇ ଅଭିଯୁକ୍ତମାନଙ୍କୁ ଗିରଫ କରିଥିଲା। ଏଥିସହ ଉଦ୍ଧାର ଗାଈଗୋରଙ୍କୁ କରଚୁଲି ଆଶ୍ରମରେ ନେଇ ଛଡ଼ାଯାଇଛି। ଗିରଫ ୫ ଅଭିଯୁକ୍ତ କୁଲାଙ୍ଗୀ ଓ ଲାଠିପଡ଼ା ଗ୍ରାମର। ପୋଲିସର ଆଭିମୁଖ୍ୟକୁ ନେଇ ଗୋ ମାତା ପ୍ରେମୀ ଖୁସିବ୍ୟକ୍ତ କରିଛନ୍ତି ।
