ଲଙ୍ଗଳେଶ୍ୱର, ୩।୫(ଡି.ଏନ.ଏ.) ବାଲିଆପାଳ ବ୍ଲକ ଚୌମୁଖ ବେଳାଭୂମିକୁ ଗତ କିଛିବର୍ଷ ହେଲା ବିଭିନ୍ନ ପ୍ରଜାତିର ଅଲିଭ ରିଡ଼ଲେ ଅଣ୍ଡାଦାନ ପାଇଁ ଉପଯୁକ୍ତ ସ୍ଥାନ ଭାବେ ବାଛିଛନ୍ତି। ରବିବାର ତୃତୀୟଥର ପାଇଁ ବନବିଭାଗ ପକ୍ଷରୁ ଅସ୍ଥାୟୀ ହେଚେରୀରେ ସଂରକ୍ଷିତ ରଖାଯାଇଥିବା ୧୩୫ ଅଣ୍ଡା ମଧ୍ୟରୁ ଜନ୍ମିତ ୧୨୮ ଶାବକକୁ ସମୁଦ୍ରକୁ ଛଡ଼ାଯାଇଛି ା
ରେଞ୍ଜର ଗଣେଶ ପ୍ରସାଦ ଲେଙ୍କାଙ୍କ ନିର୍ଦ୍ଦେଶରେ ଚୌମୁଖ ଫରେଷ୍ଟଗାର୍ଡ଼ ହୃଷିକେଶ ପ୍ରଧାନ, ସହଯୋଗୀ ଦୁର୍ଜୟ କୁମାର କରଣ, ଉତ୍ତମ କୁମାର ଖଟୁଆ, ବ୍ଲକ ଉପାଧ୍ୟକ୍ଷ ରାଜେଶ ଚୌଧୁରୀ ଏବଂ ସରପଞ୍ଚ ପ୍ରତିନିଧି ବେଣୁଧର ରଣଜିତଙ୍କ ଉପସ୍ଥିତିରେ ଏହି ଶାବକଗୁଡ଼ିକୁ ସମୁଦ୍ର ଭିତରକୁ ଛଡ଼ାଯାଇଥିଲା। ସେହିପରି ଦୁଇଟି ପର୍ଯ୍ୟାୟରେ ପ୍ରଜନନ ପାଇଁ ଅଣ୍ଡା ରଖାଯାଇଥିବା ଫରେଷ୍ଟଗାର୍ଡ଼ ହୃଷିକେଶ ପ୍ରଧାନ କହିଛନ୍ତି। ତେବେ ଏତେସଂଖ୍ୟାରେ କଇଁଛ ଏଠାକୁ ଅଣ୍ଡା ଦେବାକୁ ଆସୁଥିବା ବେଳେ ବନବିଭାଗ ପକ୍ଷରୁ ସେମିତି କିଛି ସୁରକ୍ଷା ବ୍ୟବସ୍ଥା ଗ୍ରହଣ କରା ନ ଯିବା କାରଣରୁ କିଛି ଶିକାରୀ ଏହି କଇଁଛମାନଙ୍କୁ ଶିକାର କରି ଖାଇଯାଉଥିବା ଏବଂ ପ୍ରସ୍ତାବିତ ବନ୍ଦର ପାଇଁ ସମୁଦ୍ରରେ ସର୍ଭେ କାର୍ଯ୍ୟରେ ନିୟୋଜିତ ଯନ୍ତ୍ରଚାଳିତ ଇଞ୍ଜିନ ବୁଲିବା ଯୋଗୁ କିଛି କଇଁଛଙ୍କ ମୃତ୍ୟୁ ଘଟୁଛି। ବନବିଭାଗ ପକ୍ଷରୁ ଏହି କଇଁଛମାନଙ୍କ ପାଇଁ ସ୍ବତନ୍ତ୍ର ସୁରକ୍ଷା ବ୍ୟବସ୍ଥା ଗ୍ରହଣ କରିବା ସହ ଉକ୍ତ ଅଞ୍ଚଳକୁ ଅଲିଭ ରିଡ଼ଲେଙ୍କ ଅଣ୍ଡାଦାନ ସ୍ଥାନ ଭାବେ ଘୋଷାଣା କରାଯାଇ ନିଷେଧାଞ୍ଚଳ ଘୋଷଣା କରିବାକୁ ସରପଞ୍ଚ ପ୍ରତିନିଧି ବେଣୁଧର ରଣଜିତ୍, ଉପାଧ୍ୟକ୍ଷ ରାଜେଶ ଚୌଧୁରୀ ସମେତ ବହୁ ପଞ୍ଚାୟତବାସୀ ଦାବି କରିଛନ୍ତି।