ବ୍ରହ୍ମପୁର,୨୧ା୧୧(ନରସିଂହ ସାହୁ): ଗଞ୍ଜାମ ଜିଲାର ୧୩ ବିଧାନସଭା ନିର୍ବାଚନ ମଣ୍ଡଳୀ ମଧ୍ୟରୁ ୨୦୧୯ ନିର୍ବାଚନରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସମେତ ବିଜେଡିରୁ ୧୨ ବିଧାୟକ ନିର୍ବାଚିତ ହୋଇଥିଲେ। କେବଳ ସାନଖେମୁଣ୍ଡି ଆସନରୁ କଂଗ୍ରେସ ପ୍ରାର୍ଥୀ ଜିତିଥିଲେ। ଗୋପାଳପୁରରୁ ନିର୍ବାଚିତ ବିଧାୟକ ବିଜେଡିରୁ ୩ବର୍ଷ ତଳୁ ବହିଷ୍କୃତ ହୋଇଛନ୍ତି। ଇତିମଧ୍ୟରେ ଦିଗପହଣ୍ଡି ବିଧାୟକଙ୍କ ପରଲୋକ ହୋଇଯାଇଛି। ଫଳରେ ଜିଲାରେ ଏବେ ୧୦ ବିଧାୟିକା ବିଧାୟକ ବିଜେଡିର ଅଛନ୍ତି।
କିଛିମାସ ପରେ ୨୦୨୪ ନିର୍ବାଚନ ହେବ। ତେଣୁ ଜିଲାରେ ମୁଖ୍ୟତଃ ଶାସକ ବିଜେଡି ଓ ମୁଖ୍ୟ ବିରୋଧୀ ଭାଜପାର ପ୍ରାକ୍ ପ୍ରସ୍ତୁତି ଜୋରଦାର ଚାଲିଛି। ଅସ୍ତିତ୍ୱ ହରାଇଥିବା କଂଗ୍ରେସ ନୀରବରେ ରହିଛି। ବିଜେଡି ସଭାପତି ତଥା ମୁଖ୍ୟମନ୍ତ୍ରୀ ମହିଳା କାର୍ଡ ଖେଳୁଥିବାରୁ ଆଗାମୀ ନିର୍ବାଚନରେ ଅର୍ଦ୍ଧାଧିକ ଆସନରେ ମହିଳା ପ୍ରାର୍ଥୀ ଲଢ଼ିବାର ରାଜନୀତି ମହଲରେ ଚର୍ଚ୍ଚା ହେଉଛି। ଶଙ୍ଖ ଦଳରୁ ବିଦା ହୋଇଥିବା ଗୋପାଳପୁର ବିଧାୟକଙ୍କ ୩ ଅନୁଗତ ବିଧାୟକ ଟିକେଟ ପାଇବେ କି ନାହିଁ ସେମାନେ ଆଶା ଓ ଆଶଙ୍କାରେ ଥିବା କର୍ମୀ ମହଲରୁ ଆଲୋଚନା ହେଉଛି। ତନ୍ମଧ୍ୟରୁ ଜଣେ ଲଗାତର ଭାବେ ୩ ଥର, ଆଉଜଣେ ୨ ଥର ଓ ଜଣେ ଥରେ ନିର୍ବାଚିତ ହୋଇଛନ୍ତି। ପ୍ରଥମଥର ବିଧାୟକ ହୋଇଥିବା ଜଣକ ଦଳର କର୍ମୀଙ୍କ ଆକ୍ରୋଶର ଶୀକାର ହୋଇଥିବା ବେଳେ ୨ ଥର ଜିତିଥିବା ବିଧାୟକ ବିଭିନ୍ନ ମାମଲାରେ ଛନ୍ଦି ହୋଇଛନ୍ତି। ୩ ଥର ଜିତି ହ୍ୟାଟ୍ରିକ ହୋଇଥିବା ବିଧାୟକ ଅସୁସ୍ଥତା ଥିବାରୁ ସେଠାରେ ନୂଆ ଚେହେରାଙ୍କୁ ବିଜେଡି ପ୍ରାର୍ଥୀ କରିବା ସମ୍ଭାବନା ଥିବା ଆଲୋଚନା ଚାଲିଛି।
ଅନ୍ୟପକ୍ଷରେ ଗୋପାଳପୁର ଓ ସାନଖେମୁଣ୍ଡି ଆସନ ଉପରେ ବିଜେଡି ଫୋକସ କରିଛି। ସାନଖେମୁଣ୍ଡି କଂଗ୍ରେସ ହାତରୁ ଛଡ଼ାଇ ଆଣିବାକୁ ଦଳ ଏବେଠୁ ରଣନୀତି ଆରମ୍ଭ କରିଛି। ଗୋପାଳପୁର ସମ୍ମାନର ପ୍ରଶ୍ନ ହୋଇଥିବାରୁ ସେଠାର ଦଳୀୟ ସାଙ୍ଗଠନିକ ଦାୟିତ୍ୱ ବ୍ରହ୍ମପୁର ବିଧାୟକଙ୍କୁ ନ୍ୟସ୍ତ କରିଛି। ଦିଗପହଣ୍ଡି ବିଜେଡି ରାଜନତିରେ ଗୋଷ୍ଠୀ କନ୍ଦଳ ଉଗ୍ର ହୋଇଥିବାରୁ ସେଠାରେ ଦଳରୁ କାହାକୁ ପ୍ରାର୍ଥୀ କରାଯିବ ଏବେ ଅସ୍ପଷ୍ଟ ରହିଛି। ଖଲିକୋଟ, କବିସୂର୍ଯ୍ୟନଗର ଆସନରେ ମଧ୍ୟ ବିଜେଡିର ବିଦ୍ରୋହୀମାନେ ବିଧାୟିକା ବିପକ୍ଷରେ ଅଛନ୍ତି। ଚିକିଟି, ସୋରଡ଼ା ଓ ପୋଲସରା ନିର୍ବାଚନ ମଣ୍ଡଳୀରେ ବିରୋଧୀ ଭାଜପା ସାଙ୍ଗଠନିକ ସ୍ଥିତି ବଢ଼ୁଥିବାରୁ ସେଥିପ୍ରତି ବିଜେଡି ନଜର ରଖିଛି। ଖୁବ ନିକଟରେ ଚିକିଟିରେ ବିଜେଡି ପରିବର୍ଦ୍ଧିତ କାର୍ଯ୍ୟକାରିଣୀ ବୈଠକ ଓ କର୍ମୀ ସମ୍ମିଳନୀ କରାଯିବ ବୋଲି ଜିଲା ସଂଗଠନ ପକ୍ଷରୁ ସୂଚନା ମିଳିଛି। ଏସବୁ କାରଣରୁ ଜିଲା ବିଜେଡି ରାଜନୀତି ରୋଚକ ହୋଇଛି। ଆଗାମୀ ନିର୍ବାଚନରେ ୧୩ଟି ଯାକ ଆସନ ବିଜେଡି ଦଖଲ କରିବାର ଆଶା ରଖିଛି।